الموضوع: قصة الغلبان وتوكيل نيسان .. وقدرة الرحمن

نكمل بقى موضوع الزيت .. قبل ما تقولوا عليا نسيت

في أحد أيام شغلي اللي كانت بالدم مليانة .. أصلي بعيد عنكم شغال في السلخانة

شغلي كله كشف وإعدام .. وانا على كده كل الأيام

مفيش تفاهم غير بالسكينة .. مع الجزار واللحمة المسكينة

وبانسى قصة إن انا غلبان .. وإلا كنت ضعت من زمااااان

المهم

بعد ما خلصت أعمالي الدموية .. قلت إما أقيس زيت العربية

علشان اشوف كلام مين الصحيح .. الصقور .. ولا التوكيل الفصيح؟!!!

تتوقعوا لقيت إيه؟!!!

.

.

.

.

.

.

.

بالظبط .. زي ما توقعتوا .. لقيت الزيت مش زيادة .. لا لا لا ده معدي بمراحل

كان ممكن أروح لأي حد يفضي الزيادة دي .. أو حتى أفضيها أنا بنفسي

وبما إن التوكيل بعيد جدا جدا "حوالي 2 كيلو ونص من باب البيت" .. قررت إني لأ لازم أروحلهم

روحت ودخلت عالمهندس على طول

قلتله يا باشمهندس هو زيت التيدا بالفلتر كام لتر بالظبط؟

قالي موديل كام؟

قلتله 2009

قالي بكل ثقة : 4لتر إلا بؤ صغير جدا

قلتله طيب أنا سبق وقلتلك إني قرأت عالنت إنه 3بس

قالي تاني: إن اللي بيتكلم عالنت بيتكلم من دماغه وملهوش مرجعية

قلتله طب الواقع أيد كلام النت والزيت عندي زايد جدا وانتو اللى حاطينه بأيديكم ..أصدق مين بقى!!!
وبعدين يوم ماجيتلكم قولتولي إن الزيت كان زايد وده خطر وبوظ فلتر الهوا .. ومع ذلك بتقولوا الزيت المفروض 4 لتر طيب هو صاحب العربية كان حاطط فيها جركن ونص مثلا!!!

قالي زايد عندك ازاي يعني؟ لازم اتأكد الأول

قلتله اتأكد براحتك

راح نادى لواحد فني وقاله قيس الزيت بتاع التيدا

راح يقيس الزيت لقاه معدي

قال لأ لازم نسيب العربية شويه لحد ما الزيت يصفي براحته

قلتله أنا قايسه الصبح وكان نفس النتيجة .. وبعدين هو لما الزيت يصفى هيقل ولا يزيد؟!!!

قال لازم نسيبه نص ساعة

قلتله ماشي .. وربنا وحده اللي عالم النص ساعة دي هتفرق معايا أد إيه

في خلال النص ساعة قلت إما استغل الوقت ده واتصلت بالخط الساخن 16244 عشان استفسر منهم

ردت عليا واحدة من بتوع الاستفسارات

سألتها عن كمية الزيت

قالتلي حضرتك ممكن تسأل المهندس إللي في أقرب توكيل لك

قلتلها مانا في التوكيل ومختلف مع المهندس في النقطة دي فقلت أرجع لكم

قالت بصراحة معرفش

قلتلها ألف شكر

المهم .. بعد ما قاس الزيت تاني لقاه زايد طبعا

دخلوا العربية ورفعوها وفكوا الطبة ونزلوا الزيت كله في جركن ونزلوا العربية تاني وقعدوا يحطوا ويقيسوا .. لحد ما القياس بقى تمام ولسه فاضل في الجركن حوالي نص لتر

خليتهم حطوه في شنطة العربية .. وسيبتهم وجريت على اسكندرية

كان ورايا هناك كذا مشوار .. وعشت مع التكييف الجبار

وكنت محمل أوزان تقيلة .. بس التيدا طلعت أصيلة

روحنا وجينا بألف سلامة .. والتيدا طايرة زي الحمامة

بجد بحمد ربي الكريم .. اللي وهبني هذا النعيم

ربنا يحرسها ويصونهالي ..وابعدوا عني ياللي في بالي

وتوته تونه

.

.

.

.

بردو

.

.

.

.

لسه

.

.

.

.

مخلصتش

.

.

.

.

الحدوتة





هو انتوا لسه شوفتا حاجة ؟!!!!