الموضوع: ان كنت ترى اننا على الطريق الصحيح فهذا الموضوع لا يهمك

المشاركة الأصلية كتبت بواسطة HAGAN

الي متي
الي متي كل هذا التوتر

• لحد ما (من بيده الأمر) يعمل بما يرضي الله و لصالح الشعب مش لصالح نفسه
• صعبة دي ؟
• :)

البيان بيشكك علني في المجلس العسكري
و بيوجه له الاتهام تلو الاخر

• و ماله ؟ مش الهة و مش رسل و مش صحابة الرسل و مش حتى اولياء الله الصالحين

الا نتعظ ممن حولنا من دول
الا ندرك حقيقة الازمة التي نواجهها
الا نعطي لانفسنا وقت للتفكير و التحليل

• ما دي الذلة يا باشمهندس , لكنها لا تبرر سرقة الثورة بعد كده

قلنا عصام شرف من الثورة و لقد شكل وزارته بنفسه و هم من يتخذون الان القرارات
فبدل ان نواجه حقيقة ان بلدنا منهارة اقتصاديا لانهم لا يستطيعون توفير كل هذه الاموال يطلع الاول من يشكك في وزير المالية انه فلول و بعد كده يقولو عنه انه هو الذي لا يريد ان يرفع نسبة الاجور

• ولا شكلها بنفسه ولا حاجة , الوزرا كلهم فلول فعلا , او على الأقل اغلبهم عشان ما نظلمش حد , و عصام شرف عمال يتلقى الصفحة تلو الصفعة من المجلس لحد ما بقى عامل زي الدمية , ياخد القرار و هما يلغوه تاني يوم , عااااااااااااااادي, و هاقول لك حاجة كمان , الحد الأقصى للأجور كان هايوفر المال اللازم للحد الادنى للأجور , و رفضوا يطبقوه , و الحد الأدنى للأجور + ظبط الأسعار كان هايخلي الناس دي تصرف و السوق يتحرك و ما يبقاش في الكساد الحالي , و برده ما حصلش

الا تعلمون يا سادة يا وطنيين
ان الحكومة المصرية مدانة لشركات القطاع العام مثل ( المقاولون العرب و حسن علام و اجيكو الخ الخ )
بمليارات الجنيهات الا تعلمون يا اخوان ان هذه الشركات بالتبعية مدانة لشركات المقاولات التي تعمل لديها من الباطن و المشاريع كلها السابقة شبه متوقفة او بيضخ فيها ملاليم كي لا تقف نهائيا و هي مشاريع حيوية وايضا الشركات مدانة للمكاتب الاستشارية و هكذا
الا تعلمون ان الدولة في حالة انهيار اقتصادي و ان الحكومة الحالية هي حكومة لا تملك مصباح سحري

• و رغم كده مستمرين في دعم حيتان الاعمال اللي يا اما بيبيعوا للشعب بالسعر العالمي يا اما بيصدروا و يحطوا العائد في جيوبهم و لا عزاء للشعب , مش غريبة دي ؟

و اننا نحاول ان تتماسك البلد حتي تنتهي من الانتخابات سريعا حتي تستطيع ان يتم تشكيل حكومة من الاغلبية التي سيختارها الشعب و التي ستكون محددة لواجهة البلد و شكلها للفترة المستقبلية


الا تعلمون يا اخواني ان الكام مطلب اللي في البيان دول بصراحة مطالب بسيطة جدا مع كونها مشروعة و لكنها لا تستدعي ابدا كل هذا القدر من التسخين علي الاعتصام و شل حركة البلد كلها

• يا سلام ,رسالة الى المجلس , نفذ يا عم و انقذ البلد و الناس هاترقص لك في الشارع :))))

الا تعلمون يا اخواني اننا يجب ان نتماسك حاليا حتي لو لم نكسب كل المكاسب

• فين يا باشمهندس المكاسب ؟ ما راحت كلها

الا تعلمون يا اخوان انكم يجب ان تنظرو لغيركم انهم ايضا عندهم بعض من الوطنية التي تسيل منكم
الا تعلمون يا اخواني انكم بتقلو يوما بعد يوم
الا تعلمون يا اخواني انكم دائما ما تأخذون الاتجاه الاسهل و علي سبيل المثال لا الحصر
لو ان الائتلافات التي تكونت في الفترة الحالية كانت مثلا عملت حملات لازالة الزبالة من الاحياء في خلال ستة اشهر بأستغلال كل وسائل الاعلام و غيرها من امكانيات تم توجيهها اليهم احتمال كنا نصبح دولة نظيفة
و لكن الكثير اتجه للرسم و الكنس مع ان ازالة الزبالة نفسها اللي علي بعد خطوات لم ينظر لها احد علشان رائحتها وحشه او مثلا

• هي شركات ازالة القمامة فين ؟ و بتتقاضى في الشهر كام ؟ و شغلها عامل كده ليه ؟ سؤال يستحق التفكير, هو الشعب يدفع لازالة القمامة و بعدين ينزل يزيل القمامة بنفسه ؟ طب بفرض نزل شالها مرة , و بعد كده ؟ يشتغل الشعب زبالين بقى و خلاص و هما اصلا بيدفعوا فلوس لازالة القمامة ؟ ده كلام ؟؟؟؟
  

كام ائتلاف يعمل مجموعات عمل لتنظيم المرور في العاصمة هل تتخيلون مدي النظام الذي كنا يمكن ان نجنيه بدل من النوم في الشوارع و في الخيام

• نفس الاجابة السابقة مع اضافة ان ده حصل فعلا في بعض المحافظات من الاخوان و من اخرين و والله ما رضيتش انشر عشان ما يتقالش بيهاجم الحكومة و خلاص , و في المقابل , برده الشعب بيدفع :(

انا لا انتقد و لكن استفذني جدا الاستاذ اللي بيقول الي الامام و لا نامت اعين الجبناء
من هم الجبناء يا رجل هل من يرفض ان يشارك هو الجبان ام ان الجبان الذي يستقوي بالناس لتحقيق اغراض لا يعلمها احد غير الله من يريد النزول فله مطلق الحرية لكن لا يشكك في احد و لا يطلب من غيره مساندته

• الاغراض مكتوبة في البيان يا باشمهندس , و اللي يكدب على الناس اكيد كلمة جبان قليلة عليه , بس انا شايف اننا بنهرب من الحقيقة بتكديبها بصراحة

فليرينا قوته و قدرته طالما هو لا يدرك انه من الاقلية التي لا و لن تسكت حتي لو اللي كان مسك الوزارة بالمناسبة الاخ الثوري ممدوح حمزة كان الكل ايضا هينقلب عليه
لو الاسواني نفسه او نوارة نجم او وائل غنيم كان ايضا من بينكم من سيهرسه و لن يتركو لهم الفرصة للعمل

• يا باشمهندس انا حاسس ان فيه خلط , اولا , مين الأقلية دي ؟ اللي عايزين البلد تتصلح ؟ ولا اللي نازلين ؟ ولا الليبراليين ؟ ولا مين ؟ ثم ليه لهجة المخاطب (من بينكم من سيهرسه) ؟ لو اللي عايزين البلد تتصلح فانا منهم , ولو من اللي نازلين فانا ان شاء الله ملبي للدعوة طالما المطالب لصالح الشعب و طالما فيه استهبال في تحقيق حاجات بسيطة زي ما بتقول, و لو من العلمانيين و الليبراليين فانا من اعدائهم , و لو من بتوع الدستور اولا فانا من اعدائهم
• و بالنسبة لأيا كان مين هايلاقي اللي يهرسه , و الله ماحدش فوق المسائلة , هو احنا لازم نصنع آلهة منزهة عن الخطأ ؟ سيدنا ابو بكر نفسه قال ان احسنت فأعينوني و ان اسأت فقوموني , فيه حد في اي حكومة احسن من سيدنا ابو بكر ؟؟؟؟
• بالمناسبة انا مش باطيق الأخ الثوري ممدوح حمزة ده , يا ريت بلاش الخلط بين الثوار و القافزين على الثورة , و الا كان ساويرس بقى من الثائرين :))))))))
  

عادي اتعودنا بقي و بالمناسبة كنت اليوم في الشهر العقاري بعمل توكيل
و اقسم بالله ان من بيننا ناس جبناء هم الذين يرشون الموظفين كي لا يقفو في الطابور

• دي علاقة بين طرفين , الجبان ده لو ما لقاش موظف جبان زيه هايقف في الطابور زي ال(تيييييييييييت) و الموظف لو ما لقاش الجبان ده هايشتغل كويس برده زي ال(تيييييييت) , و في الحالتين مفروض ازالة الظروف اللي بتدفع في اتجاه ان واحد يحتاج يدفع رشوة , و ازالة الظروف اللي بتدفع موظف في اتجاه انه يرتشي , ثم يتم تطبيق (وليس وضع نظري) ردع قوي للطرفين

اعلمتم يا اخواني اننا نحتاج لزمن و الله مجرد زمن لا نستعجل و لا نشكك فلو ان بعد هزيمة 67 المخزية كانت قامت قيامة الجيش المهزوم و حدثت انقلابات و اعتداءات علي القادة و غيرهم من الجنود اكيد كنا اخذنا وقت اطول لتحقيق النصر الغالي في 73 بفضل من الله

• طب انا هاقول لك حاجة من اللي قريته يا باشمهندس , بعد 67 حصلت حركة تطهير في الجيش شالت قيادات الصف الأول كله, اللي كانوا فاسدين , و طلعت مكانهم قيادات الصف التاني اللي الحمد لله كانوا محترفين, و دول اللي ربنا جعلهم احد اسباب النصر, دي سنة الله في الكون , اللي مش بيتقي الله ربنا بيستبدله
  

يا جماعة يا شباب الموضوع يحتاج سنين كي نغير لن يتم ابدا بالضغط و هكذا
اخوك شارب السجائر مثلا او لا قدر الله المدمن هل بينتهي فجأة كده و لا بيحتاج الوقت و صبر

• تمام , لكن فيه اتنين مدمنين , واحد بياخد خطوات (بيروح يتعالج , بيغير اصحابه ... ) و واحد تاني بيقول انه بيتعالج و هو بيتعاطى عااااااااااادي جدا :))))))))) لا يستويان

و عموما اخيرا ادعو الله ان كنت انا علي خطأ فالينصركم الله
و ان كنتم انتم علي خطأ فالينصر الله الشعب المصري و يكشف لكم الحقيقة قبل ان تتشقق مصر
اهي دي و الله العظيم احلى دعوة
اللهم ارزقنا الحق حقا و ارزقنا اتباعه , و ارزقنا الباطل باطلا و ارزقنا اجتنابه


لكم تحياتي

م.حاتم السباعي

المشاركة الأصلية كتبت بواسطة HAGAN

طبعا كل الاعتذار للمهندس تامر
اني شاركت في الموضوع
بس انا اوضحت سبب مشاركتي
و ربنا يكرم بأستكمال الموضوع و يقتصر فقط علي المعارضين لسياسة المجلس العسكري و الضغط عليه
تحياتي

• يا باشمهندس المشاركة الموضوعية مرحب بيها دايما ايا كان الرأي المحتوية عليه, في النهاية هي وسيلة للوصول للحقيقة
• تحياتي
• :)

م.حاتم السباعي