بسم الله الرحمن الرحيم

طبعا ده اول موضوع ليا هنا فى قسم هوندا و اتمنى انه مش يكون الاخير ان شاء الله تعالى

اسمحولى بس استفسر على شويه حاجات منكم و الله المستعان

انا حد بيعشق العربيات اليابانى بمعنى الكمله من تويوتا او لانسر او هوندا

انا معايا حاليا لانسر سبورت 2006 و قررت انى اغير العربيه و اشترى جديد و بالتالى قدامى 3 اختيارات
1- سيفيك
2- بومه تاني
3- تويوتا كرولا
و طبعا الصنى بره المجموعه لانى اصلا مش بحبها تماما و لا المازدا

من بعد البحث اكتر من 4 شهور على بومه زيرو و الحمد لله تعبت بس اهوه الوكيل نزل العربيات و ممكن دلوقتى اشترى زيرو

و التويوتا ركبت الشكل الجديد و بصراحه اتقفلت منها نفسيا رغم انى كنت بحب الشكل ده

و السيفيك ركبتها و جربتها ماشاء الله عليها

فدلوقتى انا فى حيره بجد و كمان عشان الفلوس اللى معايا محتار بين بومه 2011 زيرو و لانسر 2009 طبعا vti

اسباب الحيره و الاختيار و ده اللى انا عايز فيه مساعده من العصابه

1- البومه مش فارقه معايا شكلها قديم و لا جديد و لكن انا بعشقها جدا ميزتها انها 2011 على عكس السيفيك
2- السيفك لو فكرنا فى نفس السعر هلاقى 2009 منها vti و ال 2010 هتكون اغلى بكتير يعني انا شفت واحده ب 162 الف كسر زيرو و ده اعلى من امكانياتى على الاقل ب 15 الف
3- البومه جميله و سحب و قطع غيار متوفره جدا خصوصا فى بلدي طنطا لكن السيفيك هنا نادره شويه يمكن العربيات السيفيك هنا تتعد على الصوابع فخايف من الصنايعيه فى الشغل فيها و كمان قطع الغيار مش عارف سعرها يختلف اد ايه عن اللانسر البومه ( اكتر بأد ايه تقريبا )
4- من ناحيه الشكل و الراحه النفسيه الاتنين عجبنى جدا و داخلين دماغى اوي و مستريح ليهم هما الاتنين
5- المشكله انى متعود على البومه الرياضي و حافظها صم لو كحت هاعرف ايه اللى فيها كمان مشكله الوطو و الحك فى المطبات قلقانى جدا من السيفيك
6- طبعا الجري و التكيف و باقى الدنيا تروح لصالح السيفيك بلا منازع

من الاخر انا حافظ و فاهم البومه كويس و مريحه ليا لكن عايز اغيرها لفقرها فى الشياكه و الكماليات بالنسبه للسيفيك و كمان اللى مانعنى انى لو جبت بومه هتكون 2011 لكن لو سيفيك هتكون 2009 و ناس كتيره تقولك اشترى الموديل احسن من العربيه ممكن تكون وجهه النظر ده غلط لكن وججه نظر تقدر و تحترم فى نفس الوقت خايف من السيفيك و غلو قطع غيارها مقارنه بالبومه و كمان قلتها فى بلدي ده اللى مقلقنى

قولولى اعمل ايه و اتصرف ازاى لانى بجد محتار جدا جدا جدا وعايز راي الخبرا اللى ركبوا العربيتين و للاسف انا بحب الكماليات و مقدرش اركب سيفيك 2011 لانها هتكون lxi مش vti