الموضوع: واحد غلبان عايز يقسط مستعمل

المشاركة الأصلية كتبت بواسطة engamrnour80

اخى الفاضل الاستاذ حسين بنك فيصل مش بيرضى يقسط غير زيرو انا جربت قبل كده و رفضوا نهائيا
حتى كسر الزيرو برضو لا

الاخ الكريم م / عمرو
بنك فيصل بيقسط المستعمل .. وفي صديق لسه واخد منهم من 5 اشهر سيارة رينو ( رينبو ) موديل 99 .. و لكن تقسيط المستعمل يكون بضمان وديعة فقط .. الكلام ده كان في فرع روكسي .. و انا شخصيا سألت في فرع مدينة نصر ( في نفس الفترة الزمنية ) و أكدوا نفس الكلام ..
الا لو كان في حاجة جديدة في اليومين اللي فاتوا و النظام اتغير ..
تحياتي

يا جماعة إبعدوا عن حاجة إسمها تقسيط من خلال بنك - دة ربا في ربا مش تقيسط ولا حاجة.

والبنك لا بيبيع ولا بيشتري ، البنك بيدفعلك وياخد زيادة على اللي دفعه

التقسيط الحلال بيكون مع مالك السلعة ، مش مع طرف ثالث لا يملك السلعة ولا تهمه في شيء ؟؟؟!!

" اتقوا الله وذروا ما بقي من الربا إن كنتم مؤمنين ، فإن لم تفعلوا فأذنوا بحرب من الله ورسوله "

والله أنا مع كلام الراجل ده لو عايز تقسط بلاش تقسيط مع بنك يا حسام خالص ولو عايز تقسيط يبقى تقسيط مباشر وعندك كونتاكت كار والعالمية زي الف
ونصيحتى بعد خبر غلو البنزين أوعى تجيب عربية أصلا وهاتلك عجله ولا اقلك خليه تكتك عشان انا عارف مشوارك بعيد او بص ممكن تجيب مركب هاتاخدك من حلوان لحد كورنيش الجامعه وكده يبقى زي الفل ربنا يكرمك

يا جماعه بالنسبه لموضوع الربا دا صح فعلا بس لو مع بنك ربوى وكمان من خلال معرض يعنى 3 اطراف والبنك يقول للمعرض يسلمك العربيه
انما الموضوع مختلف مع بنك فيصل انا سالت وعملية شراء البنك للعربيه عشان يكسب او ياخد فايده اتفق الشيوخ فى نها عملية تورق وهى ادخال سلعة بيمن تداول الفلوس بين البنك وبينك وبكده تبقى شرعيه وكمان مش بيبعهالك الا لما يجبها والعقد كمان بيبقى عقد بيع سياره بالتمن الجديد اللى انت وافقت عليه وبالنسبه للتعامل مع البنوك عامة فالرسول صلى الله عليه وسلم كان راهن درعه عند يهودى بتمر والله اعلم واعلى وربنا يرحمنا من شرور انفسنا .
وشكرا

شكرا يا اخواني علي النصائح الغالية
والله موضوع الربا انا مش عارف فيه، هو بس اللي انا فاهمه اني مش باخد فلوس في ايدي علشان اشتري بيها السلعة و اسدد الفلوس بالربا
و بعدين قرض السيارة ده انا قريت في موقع دار الافتا انه مش حرام
انا باتعامل مع البنك مش مع المعرض
و يوم الاستلام بيروح يا اما مندوب من البنك يسلم المعرض الشيك
او يروح حد من المعرض يستلم الفلوس
يعني تعاملي المادي مع البنك مش مع المعرض خالص
يعني باشتري من البنك مش من حد تاني
انا مش عالمة بس انا اعتقد ان الدين يسر يعني
و بعدين هو يرضي ربنا اني اسأل علي عربية 128 تقسيط موديل 88 يقولي تدفع 30 الف اجمالي تمنها علي 3 سنين ؟؟؟؟
هو ده المتاح
لو انتوا واثقين تمام الثقة انه حرام طبعا انا مش هاقبل ده
ما باليد حيلة مش هانجيب عربيات

شاكر لكم جميعا
تحياتي

يا محمد باشا هو التوك توك ده بيمشي بعصير القصب يعني ؟؟؟
حتي لتر عصير القصب دلوقتي بقي باكتر من 2 جنيه
هو الاقتراح الوحيد الممكن موضوع النقل النهري ده " وشد القلوع يا مراكبي" و في الحالة دي نفتح منتدي فرعي للمراكب و البدالات في النايل موتورز "اقتراح للادارة "
الله يرحم ايام ال127 فاكر ؟؟؟؟؟