الموضوع: محل اكسسوارات سيارات

المشاركة الأصلية كتبت بواسطة besso

ازيكم يا رحاله

كنت عايز استفسر عن محلات اكسسوارات السيارات
اولا: المكان ؟
محتاج اى مكان ولافى حته زى سوق او شارع رئيسى (احنا عندنا محل فى بيتنا والشارع متفرع من شارع تجارىومن الناحيه التانيه لشارعنا طريق وتجارى برضه بس اقل شويه ينفع)
هو المحل مش هيبقى حاجه جامده يعنى بس هيبقى مثلا شاريط ليدات واكسسوارات من بتتلزق على العربيات وممكن اجيب قطاعه استيكرات(اه صحيح سعرها كام)يعنى الحكايه كلها فى الشكل الخارجى للسياره
وممكن فيما بعد اجيب اطقم سماعات وكده ووحده وحده يكبر وتبقى سلسله محلات وان شاء الله اوصل لتعديل العربيات كمان قولوا يارب

ثانيا:البضاعه؟
المفروض البضاعه دى بتيجى منين وازاى الجار ميضحكوش عليا فى الاسعار

ثالثا :الميزانيه؟ عايز اعرف اقل ميزانيه كام
والقطاعه تعملها كام وانواعها ايه

وعايز بقى شويه نصايح منكم

لازم المحل يكون على شارع رئيسى فيه عربيات كتير ماشية .....
و يكون فى قدامه وسع تقدر تركن فيه العربيات

بالنسبة للقطاعة دى اسمها ( كاتر بلوتر ) و انت محتاج اللى عرضها 70 سم
هى سعرها بداية من 4000 من محمد ابراهيم فى التوفيقية ..... بس لازم تجيب اللى معاها ضمان سنة ...... هى كويسة و شغالة معايا بقالها 3 سنين ..... بس عايزة اللى فاهمها ........ لكن احسن كاتر فى السوق هو الرولاند اليابانى و ده حوالى 11 الف جنيه من كيميت فى شارع بيروت مصر الجديدة ( كاتر من الاخر تقدر تحرت عليه براحتك )

لكن قبل الكاتر بلوتر انت لسه فى قدامك مشوار طويل فى التعلم عليها و على برنامج الكوريل درو و لازم يكون عندك داتا لشغل كتير .... خطوط + لوجوهات + صور فيكتور و حاجات كتير لازم تكون موجودة قبل الكاتر بلوتر

بالنسبة للبضاعة من التوفيقية

خش على اى محل كبير بيبيع جملة بس و اطلب حاجات كتير و اعمل نفسك قديم فى الشغلانة .... هات من دى خمسة و من دى اربعة و من دى تلاثة و مشى حالك على بال ما تتعلم

بس نصيحة ..... عشان تختصر الوقت ..... حاول تنزل باى شكل شغل فى محل كماليات ..... و اقعد فيه شهر كده لحد ما تفهم الدنيا ماشية ازاى ........ لان الموضوع بصراحة مش سهل خالص ....و كله تشعبات و تفاصيل و عشان تكسب منه كويس لازم تكون ملم بكل تفاصيله مهما كانت صغيرة .... و اصعب حاجة فيه الكاتر بلوتر .... غير الكاتر دى بضاعة و ممكن اى حد يجيبها ..... طالما معاه فلوس ........ بس الكاتر و الكمبيوتر ده هو الشغل المميز لاى محل كماليات و استيكرات ....... و هو اللى فيه المكسب من الاخر

اهم حاجة فى الموضوع ده كله ( الصناااااااااايعية ) دول اللى بيشغلو لك المحل و من غيرهم الموضوع ده مالوش لازمة


تحياتى و تمنياتى بالتوفيق ان شاء الله