الموضوع: تجربتى مع الفتس الdsg فى جولف 6

موضوع جميل وربنا يباركلك فيه ان شاء الله

بصررراحة شرحك جميل جداااااااا ووافى

انا بتاريخ 7/4/2011اشتريت سياره ماركه فولكس واجن موديل جولف6 وبعد حوالى شهر ظهر فيها مشاكل بالفتيس فذهبت للتوكيل أكثر من 5 مرات مع العلم أنني من دمياط يبعد عن التوكيل 550كيلو فافاد المهندسين بالتوكيل أن هذا العيب عيب صناعه بالفتيس وأخذو تليفونى وقالولى احنا هنتصل بيك لما تيجي لينا قطع الغيار من ألمانيا وبعد فتره طلبونى وقالولى قطع الغيار جت وتعالى علشان نصلح الفتيس وفعلا رحت وقامو بتغيير قطع الغيار بالفتيس وفوجأت بأن العيب الموجود بالسياره زاد وأصبح يوجد بها أصوات غريبه وخبطات وأشياء أول مره أسمعها فى عربيه زيرو او حتى مستعمله ....أناحاليا أخاف من ركوب السياره وأخاف أن اعمل حادث أو تتعطل فى مكان غير آمن ولا أدرى ماذا أفعل فقررت اللجوء إليكم خصوصا وهى ما زالت فى فتره الضمان ولم تسير سوى 12000كيلو منهم 5000كيلو للتوكيل وهم حاليا رافضين للاستبدال انا اشتكيت للشركه الأم وقررت أعمل تنويه علشان ما حدش يشترى العربيه دى مع ان سعرها 205000جنيه وحسبي الله ونعم الوكيل

موضوع جميل شكرا لك بس انا محتار جدا انا في قطر ومحتار بين شراء جولف 6 كونفرت لين 1600 ومابين اوكتافيا فانتازيا 1600 وانا مش بتفرق معايا موضوع الهاتشباك والسيدان بس انا عايز اعرف انة لية value اعلي في مصر في اعادة البيع وقطع الغيار والبرستيج شكرا ليكم ومستني ردكم ضروري اخوكم محمود

السلام عليكم
يا باشا انت لازم طبعا تتخانق معاهم وطبعا متوسلش لقلة الادب بس لازم اسلوبك يكون زى الزفت معاهم
ثانيا انت ممكن تشتكى فى حماية المستهلك و كمان فى سيت اسمه Auto Arabia Media Group - The No1 Auto & Motorsport Media in Middle East ده بيستقبل شكوى الناس من العربيات اى ماركة و بيحل المشكلة ان شاء الله
وربنا يحل مشكلتك ان شاء الله

السلام عليكم
يا باشا انت لازم طبعا تتخانق معاهم وطبعا متوسلش لقلة الادب بس لازم اسلوبك يكون زى الزفت معاهم
ثانيا انت ممكن تشتكى فى حماية المستهلك و كمان فى سيت اسمه Auto Arabia Media Group - The No1 Auto & Motorsport Media in Middle East ده بيستقبل شكوى الناس من العربيات اى ماركة و بيحل المشكلة ان شاء الله
وربنا يحل مشكلتك ان شاء الله

المشاركة الأصلية كتبت بواسطة ahmedyehia515

السلام عليكم

الحمد لله عملت بالعربية الجديدة 2000 كم و دورت إذا حد اتكلم فى موضوع الdsg ده قبل كده و لا لأه فلقيت انو الكلام عليه قليل أوى لإنه من كان سنة كان لسه حاجة جديدة و كان ليه مشاكله فى الأول بس المفروض انو دلوقتى المشاكل ده اتحلت خلاص ( يا رب بعنى عشان انا حطيت فى العربية ده شقى عمرى الصغير و الكبير و الوسطانى)

إيه هوا الdsg :

ببساطة هوا اختصار direct-shift gearbox أو التحول المباشر للسرعات و اللى فهمته انو فتيس أوتوماتيك بس له 2 دبرياج واحد بيعشق على سرعات 1و3و5و7 و التانى على 2و4و6 و المارشدير. فإثناء ما العربية ماشية على الأول بيكون الجيربوكس مجهز التانى على الدبرياج التانى و النقلة بتحصل فى أجزاء من الثانية و الدبرياج الأول بيجهز الثالث و هكذا و على حسب كلام فولكس النقلة بتاخد 8 ميللى ثانية و قريت فى المانيوال انو بياخد زيت أقل ب75% من الفتيس الأوتوماتيك العادى بس طبعاً برده ليه عيوبه انو وزنى أتقل الضعف تقريباً و كمان تصنيعه أصعب فبيعلى من سعر العربية الإجمالى. آخر حاجة الفتيس ده بتاع فولكس بس فعشان كده مش موجود غير فى عربياتها و عربيات الشركات اللى تبعها زى سيات و سكودا و بوجاتى و أودى.

تجربتى مع الفتيس:

الفتيس فيه p,r,n,d,s و زى الستيبترونيك جنب الd فيه + - عشان لو عايز تقلبها مانيوال. طبعاً اللعب كله فى الd ,و ال+ - , و الs فهتكلم عن كل واحد لوحده

الوضع d :
مش زى كل العربيات الأوتو، فى الجولف لما تجيب الd و ترفع رجلك من على الفرامل بتلاقى العربية بتتحرك ، لازم فى الأول تديها سنة بنزين و بعدين تلاقيها بتتحرك و لو وقفت فى إشارة و فضلت على الd بحس انو العربية بتمور مع نفسها و اول ما أرفع رجل بتعشق تانى. المهم السواقة الهادية على الd العربية بتنقل السرعات بسرعة عشان تفضل سايق على أر بى أم قليل و صوت العربية يفضل هادى ، يعنى ممكن تجيب السابع على 65 كم/س و تلاقى العربية ماشية على أر بى أم 1200 . لو ابتديت تدوس سنة زيادة على الدواسة هتبتدى العربية تزود السرعة على الجير السابع برده و لو سرعة دوستك للدواسة زادت العربية هتبتدى تسقط غيارات عشان تاخد العزم اللى انت عايزه و ده غير الكيك داون عشان فى الكيك داون لازم تدوس الدواسة للآخر و بتلاقى الار بى ام على جامد و صوت العربية على أوى أنما اللى بقوله ده بيحصل بسلاسة لدرجة انك مبتحسش إلا لو متابع انت على غيار إيه و بالمناسبة على الشاشة بيكون مكتوب d1, d2 , d3 و هكذا عشان تعرف انت ماشى على انهى غيار.
اللى لاحظته برده انو لو دايس جامد بس مش للآخر العربية بتبتدى تحرق شوية على الغيارات على حسب دوستك يعنى مش دايماً بتنقل عند نفس الرقم و لو دايس جامد و بعدين خفيت الدوسة شوية بتبتدى تنقل للسرعات الأعلى عشان ترجع للأر بى ام القليل. بس فى السواقى الهادية العربية بتنقل بعد 2000 بشوية و بيزيدوا لو دايس بنزين شوية.
الكيك داون: لو انت ماشى على السابع على 90 مثلاً و دوست الدواسة للآخر مره واحدة بتلاقى العربية عملت الكيك داون العادى بس الفرق انها بتسقط "شوية" غيارات ، يعنى ممكن تلاقيها جابت الرابع مثلاً على حسب سرعتك . و صوت العربية بيعلى فعلاً .

الوضع s

الوضع ده هوا الوضع الرياضى و بيبقى مكتوب قدامك s1, s2, s3 على حسب انت ماشى على إيه و الفرق الجوهرى بينه و بين الd انو بيطلع عزم أكبر من الموتور فبينقل على أر بى أم أعلى و مش بتفرق معاه موضوع استهلاك البنزين و الدواسة بتبقى حساسة أوى لأى إختلاف فى قوة دوستك عليها.

الوضع + -

بكل بساطه ده وضع فرعى من الd و بيديك حرية اختيار أمتى تنقل بالظبط و النقل بيكون اما بتحريك الدركسيون للأمام او الخلف سنة صغيرة اوى أو من البدالات اللى فى الدركسيون و ده لوحدها حكاية. المهم العربية مش هتسيبك توصل للرد زون يعنى يدوب تلمسها و بتلاقى العربية نقلت لوحدها و نفس الكلام لو بتهدى بتلاقى العربية بتسقط معاك الغيارات لوحدها يعنى مثلاً لو ماشى على ال7 و دخلت على يوتيرن هتلاقى العربية لوحدها جابت التانى.

بدالات الدركسيون ,و ده صورتها ( نتيجة بحث google عن الصور حول http://image.motortrend.com/f/9469069+w750/112_0611_12z+2006_bugatti_veyron+shift_paddle.jpg)

و طبعاً لحد فترة قريبة جداً كانت البدالات ده فى عربيات الفورملا1 بس و بعدين ابتدت تنزل فى العربيات اللى مبنشفهاش فى مصر زى الفيرارى . المهم البدالات ده بتخليك تتحكم فى الجير اللى العربية ماشية بيه فى أى لحظة يعنى لو الفتيس على d و رحت دايس على + أو - العربية هتسقط غيار أو هتجيب اللى بعده على حسب إرادتك و هتلغى موضوع انو العربية تختار الجير ، يعنى بالظبط أكنك نقل الفتيس من d إلى + - و الكلام ده بيمشى فى الd & s بس لو دوست على + لمدة أكتر من ثانيتين العربية هترجع تانى لوضع d و هتختار الجير بنفسها أو لو لقت انك مش بتنقل لمده اكتر من 30 ثانية سواء + - بترجع أوتوماتيك عادى. و فعلاً السواقة بالبدالات ده ممتعة إلى أقصى درجة عشان بتحس انك فعلاً سايق عربية سباق.

الdsg كفتيس:

التسارع بتاع العربية خرافى، يعنى الوقت الضائع بين النقلات جه مش موجود ، بتحس انو العربية فتيس cvvt ، دواسة البنزين حساسة أوى لأى دوسة و فعلاً بحس ان العربية فاهمة بالظبط أنا عايز إيه. أنا مش بتاع شد و جرى و كده بس فعلاً العربية بتغرى جامد. استهلاك البنزين فعلاً قليل أوى انا لسه محسبتش الصفيحة بتعمل كام بس مش فارقة أوى عن ال1400 سى سى اللى كانت معايا قبلها. تسارع العربية ثابت من 0 لحد 140 و ده أقصى سرعة جبتها بييها و مش ناوى أجرب أعلى من كده و العربية جاية بجنوط 16 فثابتة و مبكونش قلقان فى الملفات.

بعد 2000 كم انا شايف انو الdsg اختراع عظيم و بيجمع بين حاجات صعب انو نلاقيها فى حاجة واحدة زى الاستهلاك الاقتصادى و الأداء العالى و الرياضى وقت اللزوم و متعة القيادة و بصراحة اللى يقول انو المانيوال متعة أكبر يبقى محتاج يجرب سواقة عربية بالفتيس جه و بالبدالات اللى فى الدركسيون. يعنى انا سقت الشيروكو قبل كده و كنت فاكر انو الأداء الخرافى ده عشان التربو بس طلع انو جزء منه بسبب الdsg .

معلش انا عارف أنى رغيت كتير بس انا حاسس انو الفتيس ده مظلوم و هوا فعلاً كان فى مشاكل فى موديلاته الاولى بس المفروض انو فولكس حلتها.

لو فى أى استفسارات عن الفتيس أو العربية ، أنا فى الخدمة

السلام عليكم

شرح اكثر من رائع ربنا يباركلك فى العربية بس ياترى حضرتك عامل كام الف دلوقتى بالعربية وايه اخبار الفتيس معاك لحد دلوقتى وهل حضرتك بتعمل صيانات فى التوكيل