السلام عليكم
سبحان الله
بعد الماتش بتاع الأهلي والزمالك لسه كنت باتكلم مع صاحبي عن حد السرقة والقتل ورجعت لقيت الموضوع الجميل ده
أنا هأعلق على حاجات
1- 4- أن يأخُذَ المسروق من حرزه، وحرز المال: ما تَعَوَّدَ الناس على حفظ أموالهم فيه كالخِزَانَة مثلاً.
الشرط ده بيدخلنا في المعنى الاهم في حد السرقة وهو أن الحد ليس عقوبة على السرقة ولكنه عقوبة على إفقاد المجتمع أو المدينة أو القرية الإحساس بالامان وثانيا وقف التنمية
إزاي
الشرط ده معناه إن لو واحد سرق من أهله أو من شريكة في شركته أو من مال هو حارسه أو نصب على واحد أو خد دين ورفض يسدده أو سرق متجر أو سيارة أو بيت غير محرز بمعنى غير مؤمن بإغلاقه جيدا وحمايته ضد السرقة
فهذا السارق لا يحد بقطع اليد لأنه لم يفقد المجتمع إحساسه بالأمان لأنه لم يعتد على حرمة مال محرز
ولكنه يعاقب بعقوبات اخرى غير الحد
لكن لو واحد قفل بيته أو سيارته كويس أو محله فلازم يشعر إنه بكده عمل اللي عليه ولابد أن توفر له البلد الإحساس بالأمن وإن ما فيش حد هيعتدي عليه ولا على دكانه ولا حد هيجرء إنه يقتحم عليه بيته أو يكسر قفل شركته
ولو الإحساس ده زال فكل واحد في المدينة هيبقى قاعد خايف ومرعوب في بيته لأنه فعلا ممكن حد يتهجم عليه ولو حاول يمنعه ممكن يقتله أو يقتل عياله وده اللي بيحصل
وكمان هيفضل كل ربع ساعة يبص من البلكونه يشوف عربيته اتسرقت ولا لسه
ولو ساكن في القاهرة عمره ما هيشتري شقة في اسكندرية لأنه خايف لتتنهب ولو اشترى هيخليها على البلاط وكمان هيشيل خلاطات المياه وضلف الابواب الداخلية كل ما ييجي يمشي لحسن حد يسرقهم في غيابه
وده معناه التأثير على النمو في البلد وعلى التطور والبناء والرفاهية والإحساس بالأمان والتقدم وكل شئ جميل
2- فيه إخوة كرام بيقولوا إن اللي مش عاوز تطبيق الشريعة هو حرامي أو غيره
أنا مش معاهم في كده
لأن فيه ناس خايفة من استغلال تطبيق الحدود بطريقة غير شرعية
وفيه ناس خايفة لحسن حد يتظلم ويطبق عليه الحد بغير ذنب
وانا بأطمنهم إن فيه قاعدة فقهية بتقضي بوقف تطبيق الحد لأي شبهة حتى ولو صغيره ودي مأخوذة من نص الحديث الشريف ( إدرؤوا الحدود بالشبهات ) ومثلها في القانون : الشك يفسر لصالح المتهم
ولا يمكن شرعا قبول تطبيق حد إلا إذا تيقن القاضي مليون في المائة أن الشخص ارتكبه وبكامل الشروط المذكورة في الموضوع
والشروط دي إجتهادات ممكن تتغير وتزيد أو تقل حسب رؤية المشرعين
والشهود لابد أن يشهد لهم بالعدل ولا يكون في تاريخهم أي شبهة تقلل من نزاهتهم
لدرجة إن الفقهاء اسقطوا شهادة من يرى نائما في الشارع على إعتبار أنه جاء بأمر فيه نوع من السفاهة
يعني بالبلدي كده مستحيل يقبل قاضي تحت مظلة الشريعة إن واحد يجيب اتنين شهود من الشارع ويديهم خمسين جنيه ويخليهم يشهدوا على حد
لأن ده بيسموه في الشريعة ( حد ) ودي كلمة ليها مدلولات كبييييرة
ولو تقدم واحد بشهادة زور فله عقوبات رادعة
ويكفي أن نعرف أن الرسول صلوات الله وسلامه عليه لما جائته المرأة تطلب منه تطبيق حد الزنا عليها أعرض عنها أكثر من مرة وحاول أن يثنيها ويقول لها لعلك قبلت لعلك لامستي والمرأة تصر أمام الناس فسألها وما الزنا فأخبرته بكلمات واضحة وعفيفة فامرها أن تذهب حتى تلد ثم جائته بإبنها بعد الولادة فأمرها أن ترجع حتى تفطمه فجائته بعد أن فطمته بالكامل وجائت به وهو يحمل خبزا ياكل منه
ولا مرة بعتلها علشان ينفذ عليها العقوبة ولا فكر الناس بالموقف أصلا طيلة هذه السنوات
يعني الموضوع مش موضوع جيب شوية ناس ونصفهم جنب بعض وننده على مسرووووور علشان يجيب السيف العريض أبو فيونكة وهات يا قطع رقبة وأيادي
والناس تهلل والله أكبر ويحيا العديل
الموضوع لا يتم إلا بعد المرور على عشرات الإجرائات والمراحل ويكون الهدف منه الردع لا الانتقام
وفي النهاية لو صاحب الشئ المسروق صعب عليه السارق وعفا عنه يتم النظر في القضية من جديد
3- أخي الكريم الذي تحدث عن خوفه من أن يقوم الإخوان بتطبيق الحدود
عايز اقول لحضرتك إنك وكتير من الناس واخدين أفكار مسبقة خاطئة عن الإخوان
النظام السابق عمل حاجز نفسي بين الإخوان وبين ناس كتير
الإخوان بإختصار مش جماعة فقهية ملتزمة بمذهب فقهي معين أو آراء محددة
الإخوان بيقولوا نرجع للفهم العام والشامل للإسلام واختار الرأي الفقهي اللي ترتاحله واعمل بيه لكن المهم تكون حياتنا مبنية على المبادئ العامة للدين
وعمر ما في دين بيأمر بالظلم أو الفساد
كمان الإخوان بيتمنوا يأتي اليوم اللي الناس فيه ما تحتاجش ترشح أو تنتخب واحد إخوانجي لمجلس الشعب أو للحكومة
بس ما يكونش بناء على إقصاء ليهم أو تشويه او حظرهم كما كان بالسابق
لكن يكون لما فيه ناس كوادر أكفاء وطنيين وأحرار وعندهم نزاهة ويحملون أفكارا إسلامية مستنيرة ووسطية ومش منتمين للإخوان ويقتقدموا لخدمة البلد وأخذ المسئوليات وكمان وده الأهم إنهم مستعدين يضحوا لغاية ما يثلوا لأهدافهم ويقفوا قدام الظالم ويقولوله الشعب يريد غسقاط النظام - ساعتها مش هتلاقي ولا واحد إخوانجي نازل يترشح
أنا كواحد إخوانجي هأستفيد ايه من السلطة طالما مبادئي بتأبى علي إني أستنفع ماديا منها
يعني بالبلدي كده السلطة في عين الوطنيين هي تكليف وليس تشريف
ومغرم وليه غنيمة
تقبلوا تحياتي
المفضلات