الموضوع: شركة Qnet

سلام عليكم اعضاء نايل موتورز الكرام .............

واحد صاحبي مجند ف شركه كيو نت ( حلوة مجند دي ههههه ) عمال يقولي تعالى معايا ونسوق ونعمل وانا الموضوع مش مريحني .......... وقريت كلام سطحي قبل كده ع النت انه موضوع مليان مشاكل ونصب


ياريت حد يكون عارف كيو نت دي عبارة عن ايه يقولي وينورني


سلام عليكم

انا هقولك وجهة نظري بشكل عام ف موضوع Qnet ده لاني غير مقتنع بيه بالمره...

الشركه شغالة في التسويق عن طريق الانترنت, بتسوق مجموعة من المنتجات المختلفه
و اللي مالهاش علاقة ببعض, و على سبيل المثال لمنتجاتها... موبايلات, اكسيسوريز,
ساعات, اجهزة كهربائيه, اجازات و تايم شير.......... و غيره, و هتحس انهم بالبلدي بتوع كله

الشركة بتسوق لمنتجاتها عن طريق فريق تسويق في كل دولة معظمهم شباب, و في ناس كبار اكيد,
و بتشتغل بالـ Tree System و هو نظام تسويق معروف و في شركات كتيير بتعمل بيه على مستوى العالم,
و هو ان كل فرد يحاول انه يجذب اكبر قدر من معارفه او الاصدقاء و يخليهم Agents زيه
و يسوقوا هما كمان, لكن بيكون هو كمان مستفيد من ورا كل بيعه هيبيعوها لانهم بيتسجلوا تحت اسمه
من البداية, و يبدأ كل واحد فيهم يجذب اكبر قدر من الناس بردو يسوقوا و يبقوا Agents و هكذا
تبدأ معاهم عن طريق انك تشتري منتج منه... اي منتج, و كل الناس اللي هتجيبهم بردو لازم يشتروا,
في مقابل وعوود بالربح او المكسب المادي القريب جداا و الضخم جدااا و ده الشئ اللي بيغري كل الناس,
لكن هو غير شرعي لانه يعتبر بيجبرك تشتري منتج منه في مقابل الوعود بالربح و بيستغل نقطة ضعف الناس...

حضرتك تبدأ تاخد فلوس او عمولات على كل بيعه هتبيعها انت او المتسجلين تحت اسمك في السيستم...

طيب هل الكلام ده منطقي ؟؟؟ من وجهة نظري لأ... طيب لييه ؟؟؟ لانهم ببساطه عايزيين يخلوا
كل البشر بيسوقوا ليهم, على كده مين اللي هيشتري لما هيبقوا كل الناس بيسوقوا ليهم بس !!!!!

طيب هل السيستم ده منطقي طبقاً لسياستهم ؟؟؟ في رأي لأ بردو... طيب لييه ؟؟؟ كنت قرأت تحليل
رائع لمحلله اظن اسمها شرويت منصور, و كات بتحلل الموضوع بشكل منطقي جداا انه بالنظام ده
و بالطريقة دي لتطبيقه المفروض ان في مرحلة معينه عدد الـAgents لـ Qnet هيفوق او يتعدى
عدد سكان الأرض الحالي على حد تعبيرها, و بالتالي ده غير منطقي بالمره, و لو استثنينا موضوع
انه هيفوق عدد سكان الارض, و افترضنا انه عدد ضخم فقط, طيب مييين بردو اللي هيشتري !!!؟؟؟؟

ده لينك للتحليل اللي قرأته, و انا شايف انه ممتاز و متميز و منطقي جدااا و فيه Charts توضيحيه...

DO U STILL WANT TO JOIN NETWORK MARKETING? INFORM YOURSELF USING FACTS, LOGIC & MATH!!! | IRIC Valley

يرجعوا و يقنعوا الناس ان Bill Gates و الـ Fifa و غيرهم من الاسماء الرنانه كانوا بيمولوا
او سبونسرز على ما اظن لـ Qnet, و تلاقي اسم Qnet مكتوب على عربيات السباق في الفورميلا و غيره

كل ده انا غير مقتنع بيه بالمره, و مايغرنييش ادخل جوه هذه الدائره الوهميه... لا فيفا و لا غيره

ده باختصار موضوع Qnet و في رأي هي شركة بتستغل الناس بشكل غير شرعي
لكن في نفس الوقت قانوني, لانك مستحيييل تقول انهم بيخالفوا اي قانون في اي دولة...

دي وجهة نظري بشكل عام, و رأي الشخصي المتواضع, و يا رب اكون قدرت افيدك...

تقبــل تحيــاتي...