الموضوع: تحذير أنتباة علشان متقعش في المصيدة ( ريسات معروضة حالات وحشة و احذر الغش )

المشاركة الأصلية كتبت بواسطة yascro

السلام عليكم
انا عندى ملاحظات على الموضوع ده
1- لازم تاخد ميكانيكى معاك وانت رايح تشترى البيك ويكون حد محترم
وبكده
تريح دماغك
2- ابراهيم اسعد دا راجل محترم وعضو فعال ف القسم وراجل خبره لا يستهان بيها
3_ الدنيا صغيره اوى و لو كان ابراهيم اسعد عمل اى نمره مش كويسه مع حد
كان الكلام وصل للناس بسرعه عشان الشغل ف البايكس (سمعه)
والحمد لله الراجل ده سمعته زى الالماظ
بس انا زعلان منه من انه اتنرفز ف المشاركات اللى فوق
حتى لو كان معاه عزره

الغالي yascro
أول حاجه أنا ماإتنرفزتش ولا حاجه ولو رجعت بصيت على ردي عالموضوع هتلاقيه بعد صلاة الفجر بعد ماخلصت شغل وقاعد في المعرض مع نفسي باتسلى عالكمبيوتر وبأدرس الجديد في سوق الموتسيكلات وبقلب عالمنتديات لعل وعسى أستفاد بمعلومه
وأعتقد إن التوقيت ده صعب حد يتنرفز فيه وأنا باعتبره توقيت هدوء الأعصاب بعد إنتهاء يوم حافل من الشغل والزيارات في المعرض والمناهده مع الزباين والشرح المستفيض لكل زبون مره وإتنين وتلاته
وعلى فكره كمان الموضوع ضحكني والأخر لقيته قلب جد والراجل بيقولي لو بتغلط فيا الله يسامحك
وعلى فكره أنا مكنتش هاغلط ولا هاشتم ولا اي حاجه من ده خالص
ولما قلت أستغفر الله العظيم ..... مش عايز أغلط كنت هاحط حاجه عبيطه لاتذكرمكان النقط
وأنا قلت أنا أقل من إني أغلط أو أسبب إهانه أو جرح لحد

تاني حاجه عايز أوضحهالك أغلب الميكانيكيه المحترمين مابيروحوش معاك في حته غير لو كان حبيبك أوي لأنه مش فاضي يسيب ورشته ويلف معاك عشان 50 جنيه ولا 100 جنيه يبقى هاتضطر تجيب ميكانيكي مش محترم وده هايبيعك في أقرب محطه
والموقف ده حصل معايا كتير
مع زباين متردده وساعات بيكون الميكانيكي هو سبب تردد المشتري
لحد لما يبقى الميكانيكي لوحده معايا من غير ما ياخد المشتري باله ويقوم قايلي طلعلي حسنتي على جنب وأمشيلك البيعه ودي نوعيه من الناس بكرها جدا وبيعمل كده عشان ياخد مني 100 جنيه مثلا عالفلوس لي هايخدها من الزبون وإتعشت
وطبعا بكون متأكد وعارف إني لوبعتله موتسيكل فيه حاجه كده ولا كده مش هايخليني أقول للزبون عليها وهايقولي دي بسيطه هاعملهالو عندي في الورشه يبقى إطمن هايكسر الورشه على دماغ الميكانيكي ومش هايجي يفتح بقه معايا بنص كلمه لأنه جاب معاه ميكانيكي ماليش فيه
لكن حد الله إلا لو بايعها بسعر بما يرضي الله
غير كده بجيبها في الزبون
وبأستفزه بيقوم مديني رد الفعل تلقائي غصب عني بأضطر أشتمه من ورا ضهره قدام الميكانيكي
بقوله ده باين عليه زبون رخم ورزل وبيتنك عليا طب والله العظيم مانا بايعهالو عشان مش طالبه جنايات عالصبح
وخده ياسطى مشيه من هنا عشان عفاريتي هاتتنطط عليه
ووالله كل ده علشان البيعه تقف وبكون
وشوفوا بأه العجب العجاب
الميكانيكي بيروح يوصله ويرجعلي بالليل يقولي ليه ياعم كده الزبون كان هايخلص وانت مارضيتش تبيعلو
أقوله معرفش هي جت كده وشكله زبون أشأم إبعد عنه إنت كمان عشان ده هايتعبك ويلففك وراه بالـ 100 جنيه بتاعته يقولي مش مشكله بيقع معايا زباين كتير ماتقلقش هابيعهالك أقوله ياعم أنا مش مستعجل على بيعها
يلف ويدور تاني ماهو عايز يجر رجلي علشان لما يتكعبل في زبون يكون مظبط المصلحه
وجر رجلي كمان علشان لما يتكعبل في زبون مش فاهم يعمل فرق سعر يني إحسبهالي بسعرها وهاتقول للزبون دي بكذا وبعد ما أمشيه أرجعلك أخد الفرق وبيكون طبعا فوق الـ 1000 جنيه وخلو بالكم يا جماعه ميكانيكيه مشهورين جدا وزي النار على العلم وبيعملوا كده وحاولو يعملو معايا كده ولا داعي لذكر أسماء
يا جماعه أنا ياما شفت ولسه هاشوف

والنصيحه بجد إن الي عايز يشتري ياخد معاه بايكر يتفرجله وأعتقد إن هنا في المنتدى في ناس كتير وخبره لا يستهان بيها ممكن يروحوا يتفرجوا معاكوا وبدون مقابل وممكن تاخد مثلا إتنين من الأعضاء علشان لو حاجه فاتت عالأولاني مش هاتعدي عالتاني وهكذا

وأنا للأسف مش بقدر أطلع من المعرض كتير خصوصا بعد ما فتحنا ورشة الفايبر والدهان ودي حكايه تانيه هاحكيهالكم وكان السبب فيها عمرو الشيخ الي خلاني فتحت ورشة فايبر ودوكو وإيربراش
بعد ما وديتله فايبر يرشه شهر 11 الماضي وكل ما أروحله يقولي كلمني زي النهارده لغاية مارحت أخيرا الشهر الي فات يونيو وزعلنا مع بعض لأنه أول كلمه قالهالي مانت عارف الي حصل الثوره مخلتناش نعرف نشتغل
طيب ردوا إنتوا ثورة إيه وانا موديله الفايبر شهر 11 والثوره بعديها بشهرين لأ وعدت الثوره من شهر 1 لغاية شهر 6 بتعمل إيه يابن اللذينه لأ ودافع عربون 500 جنيه من 1100 جنيه أما لو ماكنتش دافع كان إيه الي حصلي كان راح عليا الفايبر مثلا ولا إيه النظام
حلفت لأفتح ورشة فايبر والحمد لله ربنا وفقني وكرمني وفتحت وجبت ناس الحمد لله أساتذه في الفايبر والتقطيعات والمرمات والرسومات والفايبر بيطلع من عندنا عشره على عشره

أنا يا جماعه بقيت رغاي أوي كده ليه
إيدي كالعاده وجعتني من الكيبورد بعد كده هحاول أسجلكم الحكايات دي بصوتي وأرفعها أسهل من الكتابه
شكرا على وقتكم الضايع
وشكرا على عينيكم الي قرأت كتاباتي
أخوكم
إبراهيم أسعد

المشاركة الأصلية كتبت بواسطة shady_mas2000

إبراهيم أسعد .. على حد علمى راجل محترم جدا
وانا متابعه من قبل نايل موتورز لما كان بيرد على الاستفسارات
على مصراوى وانا واحد من الناس استفدت منه جدا
لكن كتير منا اتحط فى مواقف اتفهم فيها غلط
وكون انه مهربش من الموقف ورجع عشان يرد ده
يدل على احساسه انه اتفهم غلط فياريت من الناس
تديله فرصه تانيه وبلاش نحكم على موقف جايز
ميكنش له ذنب فيه وانا باذن الله ناوى انتهز فرصة وجودى
فى القاهره واعدى عليه من ضمن المعارض اللى ناوى اعدى عليها
وباذن الله هبلغكم بأى تطورات والسلام عليكم..

شادي باشا
باشكر فيك موقف إبن البلد
وأنا واحد من الناس بعشق إسكندريه الأصل والجدعنه
وبشكر فيك حسن تفكيرك وفهمك للأمور
وبإذن الله تنورني المكان مكانك بس كان نفسي تشرفنا وإحنا عندنا مكن يشرف دلوقتي مفيش مكن ريس خالص الموجود كاستم وأعتقد إنه مش دماغك
بس تنورني نعمل معاك الواجب
أخوك
إبراهيم