الموضوع: هوندا سيتى 2008 ام ياريس 2008

المشاركة الأصلية كتبت بواسطة EslaM_NagY

الفيرنا ثباتها اعلى من الياريس
كفاية فرق ارتفاع العربيتين مع العفشة الناعمة جدا للياريس (الى بتخليها لما 2 يركبوا ورا تسلم على كل المطبات).

مش عارف اذا كان حضرتك سوقت الياريس وجربتها وبالتالي قارنت ثابتها بثبات الفيرنا ولا كلام حضرتك مبني على فكرة ان الياريس عفشتها ناعمة ومرتفعة عن الارض بالتالي منطقي ان الفيرنا عشان اوطى منها هتكون اكثر ثباتا

لو كلام حضرتك مبني على مجرد نقطة الارتفاع فانا هرد رد بسيط جدا

صحيح ان ارتفاع العربية عن الارض بيأثر على ثبات العربية بشكل ملحوظ بس لو للدرجة دي افتكر كان زمان كل العربيات الدفع الرباعي مع كل ارتفاعها ده عن الارض بقت بلونة بتمشي ترقص مع الهوا ! ! لكن فيه عوامل تانية كتير بتأثر على الثبات مش الارتفاع عن الارض وبس

انا مش معايا فيرنا وماسوقتهاش قبل كدة عشان كدة مش هقدر اقارن او اقيم

بس اللى حصل اني كنت من حوالي اسبوع رايح على طريق المطار وكان معايا ابن خالي هو عربيته فيرنا فيفا

بعد مارجعنا بقوله ايه رايك في الياريس قالي ماشاء الله تسارعها حلو اوي وكمان ثابتة اثبت من الفيرنا بكتير احنا كنا ماشيين 140 ومحستش بالسرعة الا لما بصيت على العداد

...انا قلتله بصراحة انا بسمع ان الفيرنا ثابتها في الضياع لدرجة ان كتير مطلعين عليها اسم النعش الطائر !

بالنسبة لموضوع المطبات انا معاك ان العربية لما بتحمل بتحك في المطبات بس مش لدرجة 2 يركبو ورا هسلم على كل المطبات

العربية مش بتبدا تحك في المطبات الا لما يكون فيه اوزان محترمة راكبين مش اقل من 5 افراد وخمسة مليانين غير كدة انسى موضوع الحك ده تماما !

يعني لو خمس افراد واوزانهم متوسطة انسى انك تحك في اي حاجة

المشاركة الأصلية كتبت بواسطة FrozenFire

والله أنا داخل أكتب الرد ده عشان أقول لك إنت راجل زوق زوق زوق

المناقشة الموضوعية الهادئة بتكون هادفة جدا

بالنسبة ليا، أنا سقت عربيتين ياريس، الأولى كانت لسه عاملة 3500 كيلوا فقط وسقتها على طريق إسكندرية الصحراوي. أنا كان قصدي إنها بتطلع وتنزل قوي وهي ماشية على حتة مش مظبوطة في الطريق. لدرجة إني كنت حفقد التحكم فيها مرة وأنا على 130 ودخلت على حتة فيها مطالع ومنازل خفيفة مش جامدة.

التانية كانت بتاعة صاحبي وقعدت معايا حوالي شهر، وكانت عاملة حوالي 7000 كيلوا، وكان فيها نفس المشكلة. ومع دي ذهلت فعلا لما لقيتها بتحك في المطبات رغم إنها عالية.

أنا بعتذر وبشدة عن كلمة (بترقص) ، أنا كان قصدي إن الياريس لا تقارن بالسيتي من ناحية الثبات.

وبشكرك مرة تانية على زوقك الشديد.

ربنا يخليك يا دكتور والله ده من ذوق حضرتك

انا لو تلاحظ كلامي اني ماجبتش سيرة الستي خالص لاني لا سوقتها ولا حتى ركبتها مع اي حد قبل كدة

ولو كان كلام حضرتك في نقطة مقارنة بين ثبات الياريس وثبات الستي بحكم ان حضرتك سوقت الاتنين فاكيد هتكون عارف عني وماكنش هيبقى ليا اي تعيلق على كلام حضرتك

لكن كلام حضرتك كان في نقطة ان الياريس ثباتها سئ مش سئ بالنسبة للستي

ده اللى انا كنت اقصده مش اكتر ! فانا حسيت ان العربية اللى حضرتك سوقتها اكيد كان فيها مشكلة لان الياريس معايا بقالها داخل في خمس سنين وثابتها كويس اوي على الاقل لحد 140

ومسألة انها تكون بتطلع وتنزل في حالة الطريق لو مش مظبوط او مش متسفلت كويس فاعتقد انه ده شئ طبيعي جدا نظرة لنعومة العفشة ! اكيد لو الطريق فيه متسفلت كويس لازم تحس برجة في العربية وعدم اتزان

مرة كنت راكب مع واحد زميلي عربيته BMW 530i موديل 2007 طبعا عربية مافيش كلام على الثبات بتاعها

كنا راجعين من اكتوبر وفي اخر طريق اكتوبر لما بيكون طريق الفيوم عمودي على طريق الوحات

الحتة دي الطريق فيها بيكون مش مظبوط وكله طالع ونازل ومش متسفلت كويس حسيت العربية برضوا بتطلع وتنزل وفيه رجة

استغربت لان ساعتها كنا ماشين تقريبا 120 -- قلتله انت عربيتك عفشتها فيها حاجة ؟ مش من المفروض ان ده يحصل انا حسيت اكن العربية مش ثابتة على الطريق

قالي لاء عادي ده بسبب ان الطريق مش كويس والثبات تحسه من الدركسيون وفي الملفات طالما الدركسيون ثابت معاك ومش بيتهز وحاسس انك قادر تنتقل من حارة للتانية بدون مشاكل وتوجه عربيتك بدون مشكلة ده معناه ان العربية ثابتة ومافيش خوف

اما مسألة الطريق لما بيكون مش كويس دي حاجة من الطريق مش من العربية

فانا اعتقد ان اللى حصل مع حضرتك ده شئ عادي وطبيعي لما تكون ماشي على طريق طالع ونازل وفيه حفر اكيد هتحس بعدم ثبات في العربية لكن الاحساس بالطلوع والنزول حاجة واحساس ان الدركسيون بيتهز منك وتكون حاسس ان اقل حاجة هتقلبك دي حاجة تانية خالص ! !

ومسألة المطبات اتكلمت فيها من حبة

وموضوع المقارنة بين ثبات الستي والياريس مش هقدر اتكلم فيه الا لما اسوق الستي او اركبها سعتها هقدر احكم واتكلم غير كدة مش هقدر اقول غير الله واعلم !

اللي بتكلم فيه ان ثبات الياريس مش وحش زي مالناس متخلية وللاسف اغلبية الناس لمجرد انها تبص على العربية وارتفاعها عن الارض يقولك بس دي اكيد اقل حاجة تقلبها بدون مايجرب ولا يسوق ولا يكون عمره شافها على الطريق اساسا ! !