ساقية الصاوى (لو متعرفهش يبقى فاتك كتير)

**airbus320** · 02-05-2008 09:30 AM

اعتقد ان فى الى سمع عنها وراحها وفى الى سمع عنها ومرحش وفى الى مسمعش عنها اساسا الحقيقة انا معجب جداا بالفكرة وعشان كده حبيت اعطى معلومات عنها للمسمعش او سمع عنها ومرحش ساقية الصاوى ده مركز ثقافى بس بفكر جديد يعنى كل طلباتك الثقافية موجودة عايز تسمع شعر هتلاقى عايز تسمع موسقى شرقى غربى جديدة قديمة كل موجود محاضرات سمنار على حاجات مختلفة ورش كله موجود والاسعار رمزية تبدأ من خمسة جنيه وفى ببلاش وفى قاعدة على النيل جامدة يعنى لو حتى عايز تخرج وكان اخر الشهر ولا حاجة ممكن تروح حبيت تشرب شاى بنص جنيه :D نسكافيه بجنيه :D حبيت تاكل اجدع ساندوتش بخمسة جنيه طبعا كله بسعر التكلفة ويمكن اقل كمان عشان الهدف بتاع الساقية هو الثقافة

ده غير ان فى واى فاى يعنى تاخد الاب توب وتعيش ;) لو حبيت تعرف اكتر ده موقع الساقية

http://www.culturewheel.net/

**OlaOsman** · 02-05-2008 11:02 AM

فكرت أكتر من مرة إني أروح خصوصا ان كان فيه أكتر من ندوة كنت احب اني احضرها، انما منعني المكان الغتت في الزمالك و مش باروح هناك كتير و معرفش أروحه لوحدي و كمان مش عارفة هارجع ازاي، ده غير ان معظم الندوات و المحاضرات بتبدأ الساعة 8 و طبعا بتخلص مش قبل 9 و نص او 10 يعني هاتأخر على الرجوع للبيت، بس يمكن لما ابدأ أسوق العربية لوحد و اتعود على مواجهة المواقف المختلفة أبدأ أروح.

**Moh.Abdelbaset** · 02-05-2008 11:14 AM

سمعت عنها كتير ونفسى اروحها
احتمال كبير اروحها بعد الامتحانات
لو حد عنده فكرة عن كيفية الاشتراك فى الساقية واروحلها ازاى علشان معرفش حاجة فى الزمالك خالص غير انى روحت مستشفى مصطفى محمود اللى فى شارع ابو الفدا من حوالى 8سنين

**airbus320** · 02-05-2008 11:45 AM

المشاركة الأصلية كتبت بواسطة etrawy

سمعت عنها كتير ونفسى اروحها
احتمال كبير اروحها بعد الامتحانات
لو حد عنده فكرة عن كيفية الاشتراك فى الساقية واروحلها ازاى علشان معرفش حاجة فى الزمالك خالص غير انى روحت مستشفى مصطفى محمود اللى فى شارع ابو الفدا من حوالى 8سنين

بالنسبة للاشتراك انت مش محتاج اشتراك عشان تعمل اى نشاط بس لو حبيت تعمل اشتراك هو تقريبا ب 20 جنيه وهو تقريبا ملهوش لزمة المكان تحت كوبر 15 مايو على النيل فى الزمالك من ناحية المهندسين

**ASD peugeot** · 02-05-2008 11:49 AM

طبعا ساقيه الصاوي مكان جميل جدا و كمان علي النيل بجد من كتر ما سمعت عنها نفسي اروح المكان و اسمع كل شئ كان بيتقالي علي الطبيعه

**Moh.Fahmy** · 02-05-2008 12:01 PM

سمعت طبعا عنها و نفسي اروحها من زمان لكن المشكلة اني كل ما اسافر القاهرة في مشوار ما الاقيش وقت و بيكون المحور هد حيلي و عايز ارجع اسكندرية ببعض الباور اللي فاضل

دول كانوا عاملين حفلة عرايس مارينت اليومين اللي فاتوا و تابعتها في التليفزيون و كانوا بمناسبة عيد الربيع عاملينها لفريد الاطرش و كانت تحفة
علي فكرة انا غاوي حفلات اوبرا و عندي اعتقاد ان النوعيات دي من الحفلات احنا في احتياج ليها اوي اليومين دول لانها بترفع من الذوق العام و بتعمل رقي ايضا في السلوك العام
بالمناسبة انا لميت عيال العيلة الاسبوع اللي فات و عزمتهم علي مسرحية عرايس تبع مسرح القاهرة للعرائس اسمها فركش لما يكش علي مسرح الليسيه في اسكندرية و استمتعت بيها قوي اكتر من الاطفال و الله و كان يوم جميل جدا و العيال فرحوا جدا لان النوعية دي من الاعمال بتقدم افكار و قيم جميلة قوي للاطفال

محمد فهمي

**TaoTao** · 02-05-2008 03:16 PM

المشاركة الأصلية كتبت بواسطة etrawy

سمعت عنها كتير ونفسى اروحها
احتمال كبير اروحها بعد الامتحانات
لو حد عنده فكرة عن كيفية الاشتراك فى الساقية واروحلها ازاى علشان معرفش حاجة فى الزمالك خالص غير انى روحت مستشفى مصطفى محمود اللى فى شارع ابو الفدا من حوالى 8سنين

الساقية تحت كوبري 15 مايو على طول، بالمناسبة المرواح هناك مشي أو مواصلات اسهل كتير لأن الركنة هناك صعبة جدا (من أحلام اليقظة)
بالنسبالي باخد أي حاجة للكيت كات واطلع كوبري 15 مايو وانزل نزلة أبو الفدا ابقى في الساقية، وفيه ميني باصات من موقف احمد حلمي بتمشي في شارع 26 يوليو (الجزء اللي في الزمالك تحت كوبري 15 مايو) ودي اقرب كتير بدل المشي (بس انا من هواة التمشية) وأي حاجة مكتوب عليها أبو الفدا هاتكون بتروح هناك

الاشتراك: ممكن تاخد استمارة اشتراك من الباب والاشتراك 20 جنيه سنوياً، والنشاطات جوة "خلية نحل" موسيقى وتمثيل وتعليم (غير الحفلات باشتراكات رمزية) ومكتبة (لما رحت ماكانتش ثرية ومغرية، بس ممكن يكون الحال اتغير دلوقتي)

واللي بيشترك بيبقى آخر دلع، يبعتولك SMS بالحفلات، عاملين بروشورز شهرية بالنشاطات اللي هاتتعمل في الشهر

بجد مشروع مشرف خصوصا لما عرفت إنه مشروع خاص !! ماكنتش متخيل إن ممكن حد يستثمر فلوسه في مشروع ثقافي، يعني بدل مايفتح محل فول ويلعب في المضمون، أخد مخاطرة واستثمر في العقول، حاجة تفرح

**aliabutaleb** · 02-05-2008 03:56 PM

واللي يفرح بجد ان المكان ده بيقولوا كان مقلب قمامة زمان :)

**hosiny** · 15-05-2008 10:17 AM

Thanks alot for the link

**Akram** · 15-05-2008 11:10 AM

انا بعدّي عليها كل يوم و من غير ما أعرف دي أيه إستنتجت ان ليها علاقة بالثقافة و الموسيقى ,
و كويس ان اتفتح موضوع عنها و عرفت المعلومات دي ,
ان ليها اشتراك و مصاريفها كويسة و بالتأكيد جوها هيبقى جميل ,
ان شاء الله هبقى اروح ليها في اقرب فرصة .