الموضوع: ازاى اروح ساقية عبد المنعم الصاوى ال فى الزمالك من مصر الجديدة

المشاركة الأصلية كتبت بواسطة fathyalazhary

ازاى اروح ساقية عبد المنعم الصاوى ال فى الزمالك من مصر الجديدة و بالذات بقة من مستشفى هليوبليس

من عند مستشفى هليوبلس خليها على يمينك وتحود بعدها يمين هيبقى صيدناوى على شمالك تمشى شويه على طول هتعدى على مستشفى ومن بعدها على نادى الغابه كل ده على يمينك وبعد كدا هتلاقى تحويده يمين(تطلعك على ميدان هارون) وتحويده شمال (تطلعك ميدان سفير) تحود شمال بقيت فى ميدان سفير,بعد كدا من الميدان ده هتحود يمين فى شارع على نصيته محل كبير بتاع اجهزه منزليه الشارع ده شارع النزهه....تفضل ماشى على طول هتلاقى ابو مازن على يمينك تفضل على طول برضو...هتلاقى فى وشك تحويده يمين وتحويده شمال وفوقك كوبرى....تحود يمين وتمشى شويه هتلاقى كوك دور على يمينك ومن بعده فيه U Turn على شمالك تلف منه كدا بقى كوك دور على شمالك...تمشى شويه الكوبرى قدامك بالعرض تحود من تحت الكوبرى يمين بقيت فى صلاح سالم موازى للكوبرى...وتمشى بقى على طول على طول....هتقابل نفق تمشى برضو زى مانت....تفضل على طول لحد لما هتلاقى كوبرى اكتوبر فى وشك....تطلع الكوبرى...تمشى برضو على طول متنزلش اى نزلات...زى مانت على طول هتمشى كتير اوى هيقابلك نزله شبرا....متنزلش....تفضل برضو على طول لحد ما تعدى على ميدان رمسيس هتلاقى على يمينك باين اوى محطه القطار تمشى زى ما انت من بعد محطه القطار تأخد بالك هيقابلك اوى يمين تعديه ومن بعده شويه هتلاقى تانى يمين تدخل منه(كل ده على الكوبرى) بعد لما حودت يمين تمشى شويه وهيقابلك نزله يمين متنزلش منها تكمل زى ما انت ده كوبرى 15 مايو هتلاقى نفسك وانت ماشى بقيت فوق النيل وهتلاقى نزله يمين تنزلها دى نزله الزمالك...نزلت الزمالك هتفضل ماشى على طول هيقابلك اشارتين هتعديهم وفى اخر الشارع ده هتلاقى ساقيه الصاوى وحمدلله على السلامه

المشاركة الأصلية كتبت بواسطة fathyalazhary

هو شكراً اوى للرد بس هو لو موصلات يبقى ازاى معلش متقل عليكو

لو مواصلات من عند مستشفى هليوبلس تأخد اى اوتوبيس يوصلك ميدان سفير او حتى تاكسى ب2 جنيه ومن سفير تأخد مينى باص رقم 76...سكته كويسه مش بيلف كتير بيمشى صلاح سالم وبعد كدا عباسيه ورمسيس وبعد كدا بولاق ابو العلا وبعد كدا الزمالك هينزلك عند الساقيه وهو بيطلع من شيراتون تقريبا فهتعتبر واخده من اوله هيبقى فاضى

تحياتى