أرجو من الإخوة والأخوات اللى عندهم غسالة أطباق يوضحولنا
*أهميتها وهل تستاهل فلوسها
*والحجم الوسط أخباره ايه من حيث الكميات اللى بيشيلها بمعنى بيغسل الأوانى الكبيرة ولا لأ
*وإيه أفضل الأنواع طبعا
وشكرا لكم جميعا
عرض للطباعة
أرجو من الإخوة والأخوات اللى عندهم غسالة أطباق يوضحولنا
*أهميتها وهل تستاهل فلوسها
*والحجم الوسط أخباره ايه من حيث الكميات اللى بيشيلها بمعنى بيغسل الأوانى الكبيرة ولا لأ
*وإيه أفضل الأنواع طبعا
وشكرا لكم جميعا
غسالة الاطباق اختراع رائع وتستاهل كل قرش في تمنها
غسالة الاطباق هي لغسيل الاطباق و الكوبايات فقط و الفرق في الحجم يفرق في عدد الاطباق التي ستملأها حتي تدور الغسلة فاللي بيحدد الحجم هو عدد افراد الاسرة ومعدل توسيخ الاطباق ..نصيحتي تجيب غسالة حجمها معقول مش كبير بحيث انك تشغلها اول بأول و لا تتراكم الاطباق قبل الغسيل
انا عندي غسالة صغيره اسباني مش فاكر نوغها (اصلي مسافر معلش) بس حماتي عندها اوليمبك و مبسوطه منها جدا
شكرا لرد سيادتك السريع
ومنتظر باقى الأخوة الأفاضل
بتنضف كويس ولا لا ياجماعه؟
من الاخر لو قليت بيضتين فى طاسه هتنضف الطاسه؟ وهتشيل اللى كان لازق؟
نصيحتي لك تجيب الغساله الصغيره اللي بتتحط علي الرخامه لو انتم عيله صغيرة
عمليه جدا جدا و سريعه و سهلة الاستخدام
بس كل اللى اشترى الصغيرة بيقول ياريتنى كنت جبت الوسط او الكبيرة
بمنتهى الصراحة و الأمانة ....
أحنا كان عندنا زماااااااان غسالة أطباق ألمانى كبيرة ماركة بوش ....
وطبعآ الغسالة دى بتريح المرأة العاملة اللى مبتقاش ملاحقة على الشغل برة وجوة ....
بس بصراحة أنا عمرى ما أخدت كوباية مثلآ من الغسالة و شربت فيها علطوووووووول ....
لازم كنت أغسلها تانى لأن الغسيل العادى بيخلى الكوبيات و الأطباق بتبرق أكتر من الغسالة ....
عشان كدة أول ما باظت مغيرنهاش و والدتى كمان طلعت على المعاش و بقت تغسل الأطباق و الكوبيات أول بأول ....
من الأخر غسالة الأطباق سواء صغيرة أو كبيرة مريحة لكن مش ممكن تديك مستوى نظافة الغسيل اليدوى العادى ....
بس خلى بالك انت اللى حتكع فى الاقراص بتاعتها بتاعه الغسيل
نادرا ما بتستخدم في وجود خدامة
كمان الصابون بتاعها غالي جدا
انا بأحط عندي صابون كل غسلة و زيت تلميع في مكان مخصص له و نزوده كل ما مستواه يقل
لو حافظت علي مستوي الزيت و كمية الصابون صح الاطباق بتكون حالة نظافتها جيده و الضابون الكومفرت الالماني احسن من المصري في التنظيف بس الزيت المصري كويس و ارخص من المستورد
برضه انا بأحط فيها الاطباق بعد ازالة رواسب الطعام من عليها و دي حاجه بسيطة و سريعة و بتضمن نظافة هايلة للأطباق..بمعني ان بعد الغدا انقع الاطباق و الكوبايات في الميه شوية و بعدين تبقي تحطهم في الغسالة و تغسلهم
مشكلة غسالة الاطباق ان لازم تحط نفس كمية الصابون والزيت بغض النظر عن كمية المواعين بمعني ان طبقين هيكلفوك نفس كلفة 20 طبق فحضرتك توفيرا للنفقات و الكهرباء و عمرها الافتراضي مش هتشغلها الا كل ما تتملا فلو كانت كبيره و انت عدد افراد الاسرة قليل مش هتعرف تشغلها الا كل فين و فين
ميزة الغسالة الصغيره انها بتخلص المواعين اول بأول بس مشكلتها لما يجيلك عزومه الاطباق بتبقي كتير و ساعتها بنعمل غسلتين و تلاته ورا بعض و اهو احنا بنعمل عزومه كل سنه مره
في بيت ابويا الله يرحمه كان عندنا غسالة كبيرة و كانت لا تكل و لا تمل من الشغل لأن البيت كان فيه اربع وحوش ادميه شغلتهم الاكل ليل نهار و بعد ما اتجوزت انا و اخواتي لاحظت ان امي ركنتها و بقت بتغسل الاطباق علي ايدها فلما سألتها ليه ما بتستعملهاش قالت ان كده احسن ..فين وفين علي الاطباق ما تملاها و بتكون ريحتها طلعت من الركنه يوم و اتنين في الغسالة
تعالى يا سيدى انا اقوللك نصائح من ست بيت اقصد راجل بيت
اولا فى احجام كبيرة ودى اد بتاعة الهدوم
وسط ودى فى منها على الارض و فى على الرخامه
صغيرة ودى على الرخامة
ثانيا المتطلبات
حنفية ميه متوصلة بيها على طول
وصلة كهرباء بفيشة حمل تقيل
مكان لصرف الماء
اثالثا لمنظف
زجاجة زيت خاصة تلميع ودى مش غالية خالص بتعد سنة تقريبا ودى لتلميه الاطباق والكوبايات ومبتسيبش اثر اقل من 10 جنيه
- كيلو ملح لازالة عسر الماء ودا بيعد كتييييييييييييييييييييير جدا زى الزيت 6 جنيه الكيلو
مسحوق الغسيل ودا احسن نوع اسمه Finish فى كارفور مثلا بـ27 جنيه وهيعد بردو كتيييييييييييييير جدا اكتر من 3 شهور
انا مراتى بتستخدم بريل ب 30 جنيه فى الشهر والغسالة ارخص بكتير :)
اخيرا الانواع بالترتيب من الاحسن
Zanussi
White wale ودى انا جايبها وسط علشان تغسل حلل 2 مثلا وتكفى ل8 افراد 37 طبق وشوك ومعالق وكبايات وعيش ب2400 بس انا جايبها تاتش ودلع وفى ارخص كتير وفى برامج غسيل خضار وفواكه وبرنامج اقتصادى والشديدة الاتساخ يعنى اختراع وممكن كمان لو تحط نص الكيه توفر فى الصابون والزيت والملح مش كل مرة
Ariston
Olempic
ونصيحة هاتها علشان موفرة مريحة جميلة وتستاهل
+111111
كنت هقول نفس الكلام. انا عندي White wale الوسط كنت ب 1850 جنيه و فيها 7 او 8 برامج و بستخدم FINISH حلو و رخيص و بينزل عليه عروض كتير في كارفور بجد مريحه جدا
بس انصح بالوسط لأن الكبيره مش هتشغلها كتير و الاطباق هتخلص بسرعه و الصغيره فاشله جداااااااااا
السلام عليكم
اوضح للزملاء بالمنتدى بعض المعلومات عن غسالات الاطباق المنزليه
الوظيفه :- طبعا معروفه
الكيفيه :- بالماء المندفع بقوه كبيره داخل فتحات محسوبه لخروج المياه.
القوه :- من مراوح توزيع المياه المضغوطه و كل ما تزيد المراوح النتيجه افضل و بالنسبه لمقاس 50 سم الال جى افضل لان بها 2 مروه ضخ غير الرشاشات الللى فى الاجناب.
الكفاءه:- ممتازه و لها اعتماديه كبيره للانواع العالميه.
العمر الاختراعى :- معروفه فى اوروبا و امريكا من الستينيات للقرن المنصرم.
فكره التشغيل واحده ( ضغط المياه ) عن طريق مراوح ضخ و لكن التكنولوجيا الجديده فى اقتصاديات التشغيل من مياه و صابون و كهرباء.
اقتصاديات التشغيل :-استخدام المياه :- افضل بكثير جدا جدا من الغسيل اليدوى من ناحيه الاستهلاك الغسله كامله من شطف و تنظيف و جلى و تبخير ( تعقيم ) 10 الى 13 لتر فى المتوسط لللحموله كامله.
استهلاك الكهرباء :- اكيلو وات متوسط للغسله كامله .
السخان الداخلى يتراوح من 1000 الى 1400 وات حسب الحجم و النوع .
المقاسات و الاحجام المنزليه المتاحه حاليا
1/ 50*50*50 و توضع فوق رخامه المطبخ . او تحت الحوض .
2/ 45*85*50 سم و توضع تحت الرخامه او بلت ان داخل دولاب خشب بالمطبخ.
3/ 60*85*56 سم و توضع تحت الرخامه فقط نظرا للوزن .
التغذيه :- حنفيه غساله 3/4 بوصه بفلتر داخلى.
مدخل الكهرباء :- للانواع كلها مخرج بريزه قوى موش بريزه بيتشينو و مقلش قطر التوصيل و لا يزيد عن 2 ملم من سلك معتمد .
شده الصوت:- من 25 الى 30 ديسيبل و لو بلت ان للنوع الثانى موش هتسمع صوتها.
الصابون :-
بودر مصرى بيوكلينا الجردل 3 كيلو ب متوسط 28 جم الى 30 جم يكفى شهور باستخدام مرتين يوميا .و فيه انواع زى كولجيت او تركى ........الخ اغلى لكن عن تجربه البيو كلينا اقتصادى و عملى وايضا يوجد اقراص جاهزه - غاليه حبيتين - لكن انصح بالببو كلينا اوفر و عن تجربه.
الزيت :-
بنقول كده خطا لان الصح ان اسمه ملمع الكريستال او الفضيات وده وظيفته انه يلمع او يجلى الزجاجيات من كبايات و اطباق و فضيات بعد الغسيل علشان متبقعش و تقدر تزود الكميه اللى بتنزل حسب رغبتك عن طريق ضبط الكميه من 1 الى 6 و الافضل درجه 2و لتر الملمع بيوكلينا ب متوسط من 14 الى 16 جم .يعيش معاك 9 شهور.
مزيل عسر المياه :- عباره عن بلورات شفافه زى حبه الارز الكبيره فى الحجم و ده بيشيل عسر المياه علشان الصابون يقوم بدوره - و المياه بالقاهره موش بطاله - لكن ممكن نستخدمه فى المناطق الساحليه اكثر -
الجرعه :-الصابون :- 1 ملعقه متوسطه من 20 الى 25 جرام للمره الواحده.
الملمع :- يوضع بالخزان الخاص به و يستهلك 5 جرام للمره الواحده .
مزيل عسر المياه :- ليس له حاجه اذ كانت الميه معقوله و بدون املاح
البرامج :-1/ نقع :- لو اطباق الغدا قليله بدل ما تشغلها على حاجات قليله انتظارا لوجبه العشاء مثلا - نستخدم البرنامج ده بيشطف الصحون بدون صابون تلافيا للرائحه لحد ما تملى الغساله بعد كده و تغسل الغسله الرئيسيه.
2/ زجاج / كريستال :و البرنامج ده لغسيل الفاكهه و الكريستال بس و الكبايات على درجه 35 م .
3/ اقتصادى :- وده الافضل للغسيل عموما و درجه الحراره 45 م
4/ اساسى : للغسيل عموما و درجه الحراره 55 م دهون و اشد اتساخا.
5/ قوى لغسيل الحلل و اوانى الشديده الاتساخ على درجه 65 م.
و قد تزيد البرامج عن كده لبعض الانواع بس دول اللى شائعين و بنستخدم منهم رقم 3 و 4
الصيانه :- قلما تحتاج الى صيانه بشروط :-
1/ صابون جيد
2/ مصدر مياه مناسب بدون ضغط عالى .
3/ كهرباء ثابته و توصيلات سليمه
4/ صرف المياه لا يقل عن 1.5 انش الشريف و لا يزيد .
5/ تنظيف الفلتر من المخلفات كل 5 ايام على الاقل و الغريبه ان اكثر الناس متعرفش ان النوع الثانى و الثالث مزود بمطحنه لطحن بقايا الطعام بفرض وجودها على الاطباق .و تصريفها ...:16:
6/ ان وضع الاطباق و رصها بطريقه سليمه يعطى نتائج مبهره جدا و علشان كده انا صورت من الكتالوج الرصه بتاعه الحلل و الاطباق و حطيتها جنب الغساله لحد ما حفظت الشكل الانسب ده.:grin54:
7 / مسافه مناسبه من كل جانب للتهويه 7 سم مثلا.
8/ لو فوق الرخامه الانواع الفيبر او الاستانلس افضل للحمايه من الصدا.
الانواع و الجوده
1/ المصرى :- للاحجام الثلاث تجميع معظمها مكونات صينى و تركى .ماعدا الماركات الاوربيه اللى بتتجمع فى مصر - بيبقى فيها بعد المكونات الاوروبيه مع التركى و الاسبانى و الصينى
المستورد :-ماركات عالميه معظمها بيتقفل فى الصين او تايلاند و مكوناتها صينى تحت اشراف الماركه الام او منتجات اوروبيه خالصه و معظمها ايطالى اريستون - انديست - ....الخ
الغساله المناسبه ليا اعرفها ازاى ؟؟
1/ حدد المكان اللى هتركب فيه و من هنا هتعرف الحجم المناسب اللى ممكن تشتريه
2/ زور هايبر 6 اكتوبر و معاه كارفور و سبينس و محلات عبد العزيز اللى خلف النادى الاهلى بشارع الطاقه ( النقل مجانا ) و قارن الاسعار و الصيانه.
3/ حدد الميزانيه المتاحه.
4/ اعتمد و توكل و اشترى بعد عمل التجهيزات من مياه و صرف و تغذيه.
قطع الغيار و الصيانه
1/ كل قطع الغيار متوافره بنوعيات جوده مختلفه بشارع محمد نجيب وسط البلد .
2/لو الماركه ليها وكيل صيانه كويس يبقى خير مكانش - متخافش فيه فنيين صيانه ممتازين و قطع غيار اشتريها لهم و يركبوها فى البيت و بلاش تسحب الغساله للمركز.
ملحوظه مهمه جدا
للنوع الثانى لو هتركب بلت ان - داخل دولاب - اعمل تحتها درج بارتفاع 50 سم علشان تحط فيه كل مستلزمات المطبخ من صابون و منظفات للغساله و الليف ........الخ و انت كده وفرت مكان و رفعت الغساله بشكل مهذب 50 سم علشان لما المدام ترص الغساله تكون فى مستوى ميتعبهاش- عاملها عندى و النتيجه ممتازه:grin54:
المحصله النهائيه من وجهه نظرى
الغساله عمليه و مطلوبه جدا للتوفير بشرط اختيار النوع المناسب و الجيد ...
اسف للاطاله ودمتم بود
عن تجربة بقى الحاجة و الحاج عندي في البيت ...
الحاجة فضلت تقول عايزين غسالة اطباق و الحاج يقولها مش هتعملي بيها حاجة يا ست الحاجة المهم ويك ويك ويك جت الغسالة و جاءنا البيان التالي :
ميزتها الوحيد في العزومات الكبيرة بتريح غير كده استهلاك على الفاضي و مكان على الفاضي
بسم الله ما شاء الله لا قوة الا بالله
ر بنا يبارك فيكم بجد تعبتوا نفسكم جدا وما بخلتوش بمعلوماتكم على
شكر خاص للأستاذ احمد فهمى و الأستاذ gelgel2004 على المجهود والتعب لسرد المعلومات الوافية
جزاكم الله خيرا
سؤال : مدة برنامج الغسيل بياخد كام دقيقة فى المتوسط لأن كان فيه موضوع على النت ذكروا فيه انه بياخد ساعة ونص وساعتين هل هذا الكلام مظبوط
بص يا غالي انا هؤلك حاجة سمعتها من واحدة قريبتي (ست كبيرة هي) وكانت عايشة في الخليج زمان
في مرة سألتها انتي جبتي غسالة أطباق قالتلي
عمري ما أجبها عقبال ما اكحت الاطباق واشيل بقايا الاكل وارص الاطباق في الغسالة وارجع اشيلها أكون غسلتهم هو انا يا بني فاتحة مطعم
هههههههههههههه
معلوماتى ان كده كده بواقى الطعام بيتم القائها عقب الأكل مباشرة وقبل وضعها فى الحوض بغض النظر فيه غسالة ولا لأ
السلام عليكم
برنامج الكريستال و الفاكهة 20 دقيق متوسط شطف - غسيل - تجفيف
باقى البرامج من 40 الى 45 دقيقه
و متشغلش بالك حضرتك بتحط الحاجه كلها و تسيبها تشوف شغلها و انت تعمل حاجه تانيه
فكره
ممكن علشان توفير الكهرباء لو بتااسس الكهرباء و التغذيه اعمل ليها وصله تغذيه المياه من السخان الغاز
النتيجه
تسحب مياه سخنه بتكلفه اقل
لو السخان الغاز مضبوط على 39 درجه و البرنامج اللى حضرتك مختاره على 55 درجه - الهيتر الغساله بدل ما يشتغل 10 دقائق - هيشتغل 4 دقائق فى كل مره * مرتين فى اليوم * 7 ايام فى الاسبوع = توفير لاباس به
و طبعا حضرتك ممكن تعمل كده للغساله الملابس و تقفل الهيتر بتاعها 1400 - 1600 وات للغسله الوحده لمده 5 دقائق
و متخافش مصنعى الغسالات بينصحوا بكده و ده مبيضرش الغساله
دمت بود
السلام عليكم
صباح الخير
كلام حضرتك مضبوط
1/ ننظف بواقى الاكل من الاطباق علشان ده بيساعد الغساله لنظافه اكثر
2/ المقصود من مداخلتى انه احيانا بيبقى فيه حبات ارز او بواقى خضار بسيطه يعنى ممكن تلصق فى الاطباق او ست البيت متخدش بالها منها -و دى مافيهاش مشكله طلمبه الطرد بتاعه الغساله بتفتتها و تخرج مع الصرف
عندى كده فى الغساله .
اشكر توضيحك و دمت بود
تمام قوى
أنا فعلا بأدى الغسالة مية سخنة من السخان
بتساعد فعلا كتير قوى
أفكار ممتازة من ناس أفاضل
اللى خلانى أفكر فيها إننى وجدت ان غسل المواعين بياخد وقت طويل فعلا وعمرها ما بتخلص
فأعتقد ان الغسالة حتساعد الزوجة فى توفير وقت أفضل يستثمر فى العبادة والإهتمام بالأولاد وما الى ذلك
بس انا كنت سألت والراجل قال بتغسل التيفال والستانلس عادى بتشيل الرف وتحط الحلل ؟
السلام عليكم
مافيش جمايل بين اخوه المنتدى الواحد
بالنسبه لاستفسار حضراتك للانواع الصغيره
بتختلف الاراء فى المنتدى و خصوصا دى بختلف كوجهه نظر من عضو لاخر
لكن راى الشخصى بالنسبه للمقاس الصغير
ال جى للاسباب التاليه
2 مروحه غير الرشاشات اللى فى الشاسيه من جوه - يعنى نظافه اكثر و الاهم من كده صناعه كورى او تايلندى و اخيرا الباب بيتفتح جزئين لتحت و لفةق فمبتخدش مكان
و فيه نوع تانى وستنجهاوس - عندى - 2 مروحه تحت و فوق - مالهاش حل - اى حاجه عاوز انظفها بخلاف الصحون - بانظفها فيها و النتيجه ممتازه - بس موش عارف ان كانت موجوده دلوقتى و الا لا - لانها عندى من 9 سنوات
دمت بود
بص حضرتك انا هقول لحضرتك اللي بشوفه عندنا وشوف دا كويس ولا لأ مع العلم احنا عندنا الكبيرة اللي هي بتاخد حلل وبتبقى في حجم الغسالة الأوتوماتيك
1- بتاخد وقت في الغسيل .. يعني اعتقد اقل برنامج نصف ساعة ..
فهي كويسة في العزومات .. او لو حد بيجمع ويغسل مرة واحدة .. يعني تغسل اخر اليوم
لكن لو عايز تغسل حاجة على السريع مينفعش ..
2- مسحوقها طبعا اغلى من التاني
3- بتنضف كويس بس مبتطلعش الحاجة بتلمع زي الغسيل العادي طبعا
4- بتحب كهرباء خصوصا (عشان بتشتغل بمية سخنة)
بس مجملا .. هي ليها فايدة طبعا .. يكفي انها بتريح .. وممكن تجمع كل غسيل اليوم وتحطه مرة واحدة وتنام وتسيبها مع نفسها
ومجملا بردوا .. اقدر اقولك عيبها الوحيد انها مش سريعة .. وطبعا لو قيسنا دا على انها بتغسل كميات كبيرة يبقى طبعا كويس اوي
بس تغسل طبقين فيها .. هتستنى نفس البرنامج .. :d
والحجم الكبير بيشيل حلل ودا كويس جدا بس تكون تيفال او مبتلزقش يعني اهم حاجة متكونش في حاجة لزقة-
دا ملاحظاتي
السلام عليكم
مضبوط للغساله الصغيره اما الوسط و الكبيره فيه انواع لما حضرتك تشيلى الرف العلوى كفاءه الغسيل بتقل لان الرف بيكون متوصل ليه مروحه علويه
فى انواع من المتوسطه و الكبيره المروحه العلويه مثبته فى سقف الغساله و بكده لو حضرتك حطيطى حلل كبيره مافيش مشكله
و هى بيتغسل كل الانواع التيفال و الاستانلس و الالومينيوم بكفاءه شرط ميكونش فيها خضار محروق و محتاج يطلع بسلك المواعين
دمتى بود
السلام عليكم
1/ ارجو افادتى بالنوع و الموديل.
2/اعتبر الغساله زى الحوض و المطبقيه - يعنى الحاجه اللى تتوسخ تتحط فيها على طول و بكده الحوض نظيف - المطبخ رايق - وقت الرص قليل.
3/المسحوق البيوكلينا هيديك نفس النتيجه لان الماده الفعاله واحده للكل كربونات الكالسيوم و الصوديوم - الجردل 3 كيلو ب 28 جم من رويال هاوس - الميرلاند.
4/ اللمعان و الجلى - تراجع الزيت اللى بتحطه و بيو كلينا كويس و الباقى زى كولجيت و فينش كويس مع فرق الزيت - و مشكله اللمعان حاجه من اتنين
1/ الكميه المضبوطه قليله - فيه موشر فى درج الزيت عليه درجه درجه و تابع النتيجه - الموشر من 1 الى 6 .
2/ رص الحاجه لازم يمون بالترتيب الموصى به فى الكتالوج علشان المياه و الصابون و الملمع يسرح حوالين كل الموجود و تطلع النتيجه مضبوطه
5/ الكهرباء :- جرب بعد اللى فات
1/ تعملها على البرنامج الاقتصادى اللى حرارته 45 درجه
2/ وصلها بالمياه الساخنه بتاعه السخان الغاز
موش هتحس انك مشغلها و استهلاك الكهرباء بينزل النص
متنساش ابعتلى الموديل او الكتالوج و احاول اضبطها لحضرتك
دمت بود
فروع بى تك اللى روحتها مفيهاش غير الغسالات الكبيرة والصغيرة فقط ، الحجم الوسط مش موجود
قالوا حينزل كمان أسبوع ان شاء الله
فية أعلان لبيع غسالة على المنتدى هنا بالصور
http://www.nilemotors.net/Nile/231115-a.html
السلام عليكم
الزملاء الاعزاء بالمنتدى
حبيت اعرض فكره الغساله الوسط اللى فى الدولاب اللى عندى و تحتها درج المنظفات لو حد حابب يستفيد من الفكره
و انا جاهز لتصميم اى مساحه مطبخ - نوم - .........الخ للزملاء بكل محبه
دمتم بود
http://www.nileup.com//uploads/thumb...b99de7aca4.jpg
http://www.nileup.com//uploads/image...b99de7aca4.jpg
http://www.nileup.com//view.php?file=f8bb61e2b6
http://www.nileup.com//uploads/thumb...f31aaa5602.jpg
http://www.nileup.com//uploads/thumb...38712d9af1.jpg