الحلقة الثانية
طب الزجاج .. بين الحقيقة والخيال
قبل ما نبدأ الحلقة عايز أقولكم على حته صغيرة كانت سقطت في المونتاج بتاع الحلقة اللي فاتت
وهي إني وأنا راجع من مصر الجديدة وبعد ما طلعت عالدائري كان في تريلا ماشية قدامي وفجأة وقع منها زلط صغير في حجم الحمص
جا على الإزاز منهم 3 زلطات وأنا على سرعة 120
تتوقعوا إيه اللي حصل؟!!!
.
.
.
.
.
.
عملوا 3 شروخ
.
.
.
.
.
في قلبي
أما الإزاز .. سبحان الله .. ولا الهوا
يعني شوية ميه عملت شرخ كبير .. وزلط زي الزلط ماعملش أي تأثير
سبحانك يا رب .. فعلا قدير
المهم
أول مارجعت من مصر وقبل ما أروّح عديت على بتاع الإزاز قبل ما يلم تراب زي ما أخونا علاء بيقول
وبعد ما ركنت العربية عند بتاع الإزاز
نزلت وقلت: سلام عليكم يا دكترة
وعليكم السلام ورحمة الله
ما تيجي تبص عالمريض ده .. هينفع ولا لأ؟
لحظة واحدة وجاي على طول
خلص اللي في إيده وجا عالعربية بتاعتي .. وقرب عينيه من الإزاز وقعد يبص من تحت لفوق .. ومن فوق لتحت
وبعدين بص ليا وقال: ماشي
ماشي إيه يعني؟
ماشي هاعملهولك
يعني هايعيش يا دكتور؟!!!!!!
خلي أملك في ربنا كبير يا إبني
طب هيتصلح بنسبة قد إيه كده؟
هاخليه زي بقيت الإزاز من برة وهيبقى في شعرة رفيعة قوي من جوه
وده مضمون؟ يعني مش ممكن يتكسر أو يرجع تاني زي الأول؟
قالي بكل ثقة: الضامن هو الله .. بس أنا هاديلك فاتورة بعد ما اخلص ولو حصل أي حاجة أنا المسؤول
فرحت وحسيت إني بكلم واحد ساحر .. مش دكتور
قلتله: هتاخد وقت قد إيه؟
نص ساعة
هيتكلف كام
80 جنيه
"وأنا متأكد إني لو كنت جيت بنفس الشرخ في العربية الشاهين القديمة كان قالي 20 جنيه"
قلت مش مشكلة بس يرجع زي الأول
دخلت نص العربية جوه المحل
قالي لازم نكمل الشرخ الحته اللي باقية فوق المراية
قلتله ليه؟
قالي دي حته صغيرة وعشان ميتشرخش بعد كده
قلتله اللي تشوفه يا دكتور
قعد يدق عالإزاز ببطن إيده لحد ما كمل الشرخ
وجاب مادة سايلة شفافة وحطها على الشرخ بتاع الإزاز من جوه .. وسحب مادة تانية في سرنجة وقعد يحط منها عالشرخ فوق المادة الأولانية .. وبعدين حط فوقهم ورق بلاستيك رفيع شفاف وسابهم بتاع ربع ساعة .. وكل الشغل كان من جوه
وجاب الجهاز اللي بيقول عليه ليزر .. وهو عبار عن لمبة أشعة فوق البنفسجية .. كنا بنستخدمها في المزارع عشان نعقم الأدوات .. وقعد يمررها فوق الشرخ عدة مرات
بعد شوية المادتين السايلين جمدوا واتحولوا لمادة صلبة
شال الورق البلاستيك وجاب سن مشرط أو قطر وقعد يكحت ويشيل المواد الزايدة من على الإزاز
وهو بيكحت كأنه كان بيكحت في قلبي .. كنت خايف من سن القطر لحسن يعمل خدوش في الإزاز
بس بصراحة .. ماعملش ولا خدش واحد
بعد ما أخلص كل حاجة .. قربت من الإزاز عشان أشوف النتيجة
تتوقعوا لقيت إيه؟؟؟
.
.
.
.
عرق الغلاسة بينقح عليا
وبيقولي إقطع الحلقة
بس عشان خاطركم هاديله مسكن من الصيدلية بتاعة عاطف –ربنا يفك حبسه- واكملكم شوية
بس ابقوا افتكروا الجمايل دي
بصيت على الإزاز لقيت في شعرة خفيفة من بره .. اللي مايعرفش إن الإزاز مشروخ مايخدش باله منها بالساهل
وحسب زاوية الرؤيا .. يعني ممكن الشعرة تظهر من زاوية وتختفي من زاوية تانية
أما من جوه فالشعرة دي كانت أوضح
قلتله إيه يا دكتره .. انت قلتلي هيبقى زي بقيت الإزاز .. دلوقتي بقى عنده شعرة .. ساعة تروح .. وساعة تيجي
قالي سيبه بس 3 أيام وماتشغلش التكييف انهارده وكل ده هيختفي من بره ومن جوه
قلتله يعني من جوه هيختفي كمان .. انت لسه قايل هيسيب شعرة خفيفة جوه
قالي لأ هيختفي من جوه كمان
قلت ربنا يكرم
ودفعتله 60 جنيه بعد الفصال الخفيف
عدّّى أول يوم
وتاني يوم
وتالت يوم
وبصيت عالإزاز .. لقيت ..
.
.
.
.
.
.
إلحقني بالمسكن يا دكتور عاطف بسرعة أصله رجع ينقح تاني .. وياريت يكون حقنة المره دي
يا سلام .. إيده خفيفة قوي عاطف ده
المهم .. بصيت عالإزاز لقيت الشعرة زي ما هي
قلت ابقى أرجعله تاني لما أفضى
عدّى يوم ..واتنين ..وتلاتة ..واربعة ..
واسبوع .. واتنين .. وتلاتة .. واربعة
وبعدين كنت في مشوار قريب منه .. قلت أعدي عليه
لقيت عنده إلنترايه شغال في الإزاز بتاعها
نديت عليه وقلتله يعني مفيش حاجة اختفت يعني .. بالعكس دا بدأ يرجع لأصله كمان
قالي سيبها كمان اسبوع وتعالى أعملهالك تاني
قلتله ماتعملها دلوقتي وخلاص
قالي عشان تفتّح في الحر براحتها
طب ما انا بقالي أكتر من شهر .. جت عالأسبوع ده يعني
حسيت إني أنا اللي هيجيلي شعرة
طبعا أنا فهمت إنه كان بيطرقني عشان بتاع الإلنترا مايخدش باله وتبقى شكلها وحش في حقه
بس بيني وبينكم أنا كنت مستعجل وما صدقت ومشيت .. وكمان الحكومة بتاعتي كانت معايا وكنا عايزين نجيب الإمام أنس من الحضانة .. ومشت
وعدى يوم .. واتنين .. وتلاتة .. واربعة
وأسبوع .. واتنين .. وتلاتة .. واربعة
وبعدين كنت في مشوار قريب منه .. قلت أعدي عليه
بس سبحان الله .. المره دي مالقيتش النترايه واقفه عنده
دخلت عليه .. وبدون ولا كلمه بدأ الدكتور يشتغل في الإزاز
حسيت إنه بيضحي بالجنين والأم عشان الأب يعيش
وعمل شغل قريب من المره اللي فاتت .. بس ماشالش المادتين ولا الورق البلاستيك
وقالي سيبها يومين عالإزاز
عدى يوم .. واتنين .. وتلاتة .. واربعة
وقبل ما يعدي اسبوع .. واتنين .. وتلاتة .. واربعة
انشغلت بموضوع مهم جدا مع ناس حبايبي
وكانوا مستعجلين عليه جدا .. لدرجة إني لسه ماشلتش المادتين لحد دلوقتي والله
وبما إني مابقدرش أخبي عليكم أي سر
هاقولكم على الموضوع اللي انشغلت فيه
بس أوعوا تقولوا لحد
كنت بصور مسلسل اسمه
"التيدا .. ومسلسل المؤامرة"
وفي سر كمان
وبردو أوعوا تقولوا عليه لحد
الحلقة الجاية بإذن الله هتكون بعنوان
موقعة الطرمبة
.
.
.
.
.
.
.
.
.
.
http://img9.imageshack.us/img9/5599/unled1copyee.jpg