الموضوع: سؤال من مستجد

السلام عليكم جميعا..

أحكيلكم حكايتي.. أنا ربنا أكرمني والحمد لله وهاجيب عربية ودي أول عربية هاركبها ان شاء الله..

أنا ساكن في القاهرة حاليا وشغلي في 6 أكتوبر يعني مشوار حوالي 60-70 كم رايح جاي كل يوم..

بعد مشوار بحث طويل (بس مش قوي) بفضل الله وبفضل المنتدي والأعضاء الجامدين هنا قدرت أقلل الموديلات اللي هختار منها بإذن الله..

هاقلكم الأول أهم اهتماماتي في العربية:

زي ما قلت أنا عندي مشوار الشغل يوميا 60-70 كم رايح جاي ف عايز عربية اعتمادية، ماينفعش تعطل مني ع المحور
وتكون اقتصادية في البنزين للسبب نفسه، وركوبة مريحة
والتسارع والثبات مهمين لأنه تقريبا طريق سفر (طريق سريع نوعا ما)
بالنسبة لقطع الغيار مهم تكون متوفرة ومش غالية نار.. بس مش شرط تكون أرخص حاجة
الصيانة: عاوز الاقي حد بيفهم فيها مش أغلب بيها في أي مشكلة تظهر فيها
سنة الصنع: يفضل تكون موديل 10 سنين فاتو بالكتير.. الا لو حد رشح حاجة محترمة حتي وهي أقدم من كدة
اعادة البيع: مافتكرش هافكر ابيع قبل 3-4 سنين بس مش عايز أدوخ بيها ساعتها وملقيلهاش بيعة
أما العفشة بقي: مش عاوزها قريبة من الأرض بحيث تحك في كل مطب لما يكون حد راكب ورا
الوسع الداخلي ووسع الشنطة: مش عايزها بس تكون أضيق حاجة في الحياة
البودي: الصاج مايبقاش خفيف

ودلوقتي بقي هاقلكو شوية موديلات أفتكر الترشيحات مش هاتخرج منها:
شيفروليه سبارك
سيتروين c3
لانوس
فيات: بونتو / أونو / سيينا / تمبرا
هيونداي: جيتز / اكسنت / اكسيل / فيرنا
كيا: برايد / بيكانتو / ريو / سيفيا / شوما
نيسان: صني / تيدا
كورسا
بيجو: 106 / 206
ويرا
كليو
سيات: ابيزا / توليدو
سكودا: فابيا / فليشيا
التو
بولو

أنا عارف ان دول اختيارات كتير ومختلفة بس عشان كدة أنا شرحت كل احتياجاتي ..

حاجة مهمة أخيرة: أنا حاطط ميزانية 35 ألف.. ممكن يتزقوا ل 40 ألف

شكرا مقدما لردودكم