الموضوع: سؤال من مستجد

المشاركة الأصلية كتبت بواسطة ashrafsaif

مشوار الشغل يوميا 60-70 كم رايح جاي ف عايز عربية اعتمادية، ماينفعش تعطل مني ع المحور
وتكون اقتصادية في البنزين للسبب نفسه، وركوبة مريحة
والتسارع والثبات مهمين لأنه تقريبا طريق سفر (طريق سريع نوعا ما)
بالنسبة لقطع الغيار مهم تكون متوفرة ومش غالية نار.. بس مش شرط تكون أرخص حاجة
الصيانة: عاوز الاقي حد بيفهم فيها مش أغلب بيها في أي مشكلة تظهر فيها
سنة الصنع: يفضل تكون موديل 10 سنين فاتو بالكتير.. الا لو حد رشح حاجة محترمة حتي وهي أقدم من كدة
اعادة البيع: مافتكرش هافكر ابيع قبل 3-4 سنين بس مش عايز أدوخ بيها ساعتها وملقيلهاش بيعة
أما العفشة بقي: مش عاوزها قريبة من الأرض بحيث تحك في كل مطب لما يكون حد راكب ورا
الوسع الداخلي ووسع الشنطة: مش عايزها بس تكون أضيق حاجة في الحياة
البودي: الصاج مايبقاش خفيف

حضرتك كلامك دة متفصل علي كام عربية بالظبط مش هيخرج ترشيحي عن واحدة منهم

1- الأبيزا موديل 99 ال 1000 سي سي الكاملة
2- البولو 99 ال 1000 سي سي الكاملة
3- الفيات تمبرا موديل 97 الكاملة

اولا السعر من 35 لحد 40 :: نصيحتي ليك ما تزنقش نفسك، اوعي تحط كل الي معاك في العربية ، سيب ولو 3000 جنيه في ايدك لعدة اسباب
1- اول يوم هتجيب فيه العربية هتغرم مالا يقل عن 1000 جنيه سيرفيس (فلاتر وزيوت وسيور وانذار)
2- التراخيص لأنك غالبا هتجيب عربية وفاضل فيها شهر ولا 2 وكمان البلد مش مضمونة اليومين دوول وبالتالي لازم ترخص وتنقل ملكية في ساعتها
3- الله اعلم هتحتاج شحن تكييف ولا فردة كاوتش ولا اي حاجة ولازم تبقي جاهز

وعلي هذا فانت محتاج عربية بحد اقصي ب 35 او 37 لا اكثر
وبالتالي ارشحلك البولو والأبيزا والتمبرا

ثانيا استهلاك البنزين
الأبيزا او البولو ال 1000 سي سي متوسط استهلاكها بين 300 الي 330 كم في الصفيحة (20 لتر بنزين) ودة طبعا استهلاك خيالي مفيش عربية عملته غير الهوندا سيفيك ودي عربية خارقة للعادة دائماً

ثالثا الأعتمادية
مفيش عربيات اعتمادية قد الألماني وبالزات الفولكس

رابعا قطع الغيار
اكتر من الهم علي القلب سواء جديد او استيراد وباسعار منافسة جدا للعربيات الي في نفس الموديل وبتعيش لفترات طويلة جدا وما سمعتش عن حد غير نفس قطعة الغيار مرتين في حياة عربيته

خامسا الفنيين والميكانيكية
منتشرين جدا بتوع الفولكس والحمد لله

سادسا تسارع وثبات
اولا انت مش محتاج تسارع طالما علي طريق سريع وفي وجود الرادارات الذكية وطبعا الثبات لا يعلي علي الأبيزا وخصوصا بالجنوط ال14

الشنطة والوسع الداخلي
الشنطة صغيرة نوعا ما بحكم انها هاتشباك لكن كوسع داخلي فالعربية جميلة جدا

العفشة
مايختلفش عليها اتنين عفشة الفولكس وارتفاعها عن الأرض مهما ركب معاك حد ورا

الصاج والبودي
معروف طبعا صاج الألماني وكمان الأبيزا ، صاج بجد مش فيبر ولا صاج خفيف

اكتر عربية محققة معادلة صعبة جدا هي الأبيزا والبولو
السعر والأعتمادية والاقتصادية والموديل والكماليات
سعر مناسب للموديل والكماليات

بالنسبة للخيارات الأخري
انا شخصيا لا ارشح اللانوس لأنك عشان تجيب لانوس ب 35 هتبقي يا اما فاضية يا اما موديل 98
النوبيرا 1 حاجتها قليلة وغالية
سيتروين c3 حاجتها غالية جدا واساسا مش هتلاقيها ب35
نيسان صني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟ موديل كام ؟؟؟ 90 ولا 88 ؟؟؟

عارف

انا ممكن أرشحلك السيفيك موديل 91 بس بشرط الحالة لأن الموديل بعيد اوي
بس عربية تحفة وبتحقق كل مطلباتك من اعتمادية وكماليات وسعر بيع وقطع غيار ووسع وصاج

ربنا يوفقك

والله المستعان
،
،