اللى عنده معلومات عن مصيف مرسى مطروح يفيدنا لو سمحتم

**alrabeh** · 07-07-2011 02:28 PM

رجاء من الإخوة اللى يعرفوا مطروح كويس اللى سافروا كتير هناك أو الأساتذة اللى عايشين هناك يقولوا كل التفاصيل الخاصة بالمدينة
1- إيه الأفضل هل لازم أسافر بالسيارة ولا ممكن من غيرها.
2- أفضل الأماكن للإقامة وأفضل الشواطئ خصوصا اننى مابحبش أسكن فى أماكن داخلية ، لازم تكون علىالبحر مباشرة
3- الفترة دى هى زحمة ولا فاضية (والحالة الأمنية)
4- قرية أندلسية هى مستواها ايه بالظبط وهل الأفضل فيها الشقق ولا الفيلات ولا الشاليهات
5- لو عاوز أحجز أكلم حد من اللى بيعلنوا على النت ولا أسافر أنا الأول أحجز وأرجع آخد باقى العيلة مع صعوبة وطول الطريق طبعا ولا فيه طريقة تانية أحسن

عارف ان أسئلتى كتيرة بس فعلا محتاج أجازة الواحد يريح أعصابه فيها ولكم جزيل الشكر والعرفان وجزاكم الله خيرا

**alrabeh** · 07-07-2011 07:39 PM

متابع

**elfashn** · 07-07-2011 07:59 PM

السفر بالسياره هيستغرق 4 ساعات ونص الطريق كويس مش وحش.من الاماكن الى على البحر وفيها شقق كتير الفيروز. الفتره دى من كل سنه بتبقى مطروح زحمه معرفش السنه دى هيبقى ايه النظام.مش محتاج تسافر علشان تحجز ولا حاجه انت اول ما توصل هتلاقى سماسره بالعبيط بيدللو على شقق وممكن تنزل عند الفيروز ونسال بنفسك اذا كان فى شقق والموضوع سهل جدا وتوفر على نفسك فلوس هتدفعها للسمسار.اندلسيه حلوه بس القعده فى البلد احلى

**alrabeh** · 08-07-2011 12:45 AM

اشكرك أخى الفاضل على اهتمامك
أرجو من باقى الأخوة يشاركونا

**Ayman mohamed** · 08-07-2011 02:01 AM

- اولا السفر بالسيارة مافيهوش مشكلة بل ممكن يبقى افضل عشان تناقلاتاك هناك , و الزيارات
-اماكن الاقامة كتير فى فى البلد ومنطقة البوسيت و العوام وفى الفبروز و دى اكتر.
-بالنسبة للشواطىء فافضل حاجة فيها هى الأبيض و اقلهم زحمة بس هى بعيد عن البلد .
- الفترة دى عموما بتبقى زحمة بس انا لسة جاى و حاسس انها اروق من كل سنة.
- اندلسية للاسف ماروحتهاش قبل كدة.
- و مش لازم تحجز قبل مانروح. انت اصلا هاتلاقى السماسرة مقابلينكم من اول ماتوصل و كتير. و لو عايز نمرة حد هناك اجيبلك,
و هاتتبسط جدا هناك انت و العيلة أنشاء اللة.

**Ghosts** · 08-07-2011 05:16 AM

أنا بقالى كذا سنة بصيف فى مطروح ....
ومارحتش أى حتة فيها غير أندلسية ....
ممكن حضرتك تسمع أراء مشجعة ....
وممكن تسمع أراء منيلة بنيلة ....
أنا هحاول أقول كل حاجة أعرفها ويارب أقدر أنفعك ....

فى مميزات كتير فى قرية أندلسية :
1 فى بحيرة صناعية كبيرة أوى مفيهاش موج نهائى بس مالحة شوية لكن أمان ....
يعنى لا هتلاقى فيها سحب ولا قناديل ....

2 فى ألعاب مائية ممتعة جدآ للكبار و الصغار وحمامات سباحة للأطفال وبحيرات صناعية صغيرة ....
ومادمت حاجز شالية أو فيلا هناك يبقى هتستخدمها مجانآ ....
البحيرة والألعاب موجودين فى حتة واحدة أسمها مش فاكرة بصراحة ....
تقريبآ جنة الألعاب حاجة زى كدة ....
دى حاجة عاملة بالظبط زى كريزى ووتر بس يزيد عنها البحيرة الصناعية ....
فى طبعآ بحر فى القرية بس بحر صخرى مايتنزلش ....
لو حجزت شالية على البحر ودة أفضل وأغلى هتستمتع بالمنظر جدآ ....

3 أندلسية قرية مقفولة ممنوع حد يدخلها غير اللى حاجزين فى شالية أو فى الفندق ....
يعنى مش أى حد بيدخلها لازم يكون معاة كارنية القرية....

4 قرية هاااادية وفى منتهى النظافة ....

السلبيااات بقى
مفيش غير حاجة واحدة بس
ساعات كتير تلاقى منطقة الألعاب زحمة ترس عشان بيبقى فيها رحلات اليوم الواحد ....
وأؤكد لك لو قاعدت مع الناس اللى طالعة الرحلة دى ....
هتكرة نفسك وتكرة مطروح و هتكرة اللى قال لك روح صيف فيها ....
أنا بقى بعمل أية ؟
بصحى بدرى و أروح هناك الساعة 8 الصبح ....
أعوم فى البحيرة شوية لغاية ما الألعاب المائية تشتغل ....
لحد الساعة 3 أول ما الأقى زحمة أو فوج رحلة أجرى على الشالية ....
أتغدى على البحر و أنام شوية وبعدين ننزل بليل نتفرج على السينما الصيفى ....
ودى بردو مجانآ لنزلاء القرية وبس ....

يارب أكون قدرت أفيدك ولو فى أى أستفسار أنا تحت أمرك ....

**alrabeh** · 08-07-2011 10:08 AM

المشاركة الأصلية كتبت بواسطة ayman mohamed

- اولا السفر بالسيارة مافيهوش مشكلة بل ممكن يبقى افضل عشان تناقلاتاك هناك , و الزيارات
-اماكن الاقامة كتير فى فى البلد ومنطقة البوسيت و العوام وفى الفبروز و دى اكتر.
-بالنسبة للشواطىء فافضل حاجة فيها هى الأبيض و اقلهم زحمة بس هى بعيد عن البلد .
- الفترة دى عموما بتبقى زحمة بس انا لسة جاى و حاسس انها اروق من كل سنة.
- اندلسية للاسف ماروحتهاش قبل كدة.
- و مش لازم تحجز قبل مانروح. انت اصلا هاتلاقى السماسرة مقابلينكم من اول ماتوصل و كتير. و لو عايز نمرة حد هناك اجيبلك,
و هاتتبسط جدا هناك انت و العيلة ان شاء الله.

حمدا لله على سلامتك
ممكن تقوللى متوسط الأسعار دلوقتى
لو نزلت وقابلت سماسرة هناك هل بأقوله عاوز أسكن فى آنى منطقة ولا بتبقى بظروفها
وهل لو ماسافرتش بالعربية لإن السواقة الكتير مرهقة لى جدا حأتنقل مع السمسار ازاى ، هل بتاكسى مثلا وأكون سايب الجماعة فى مكان يقعدوا فيه
أستأذنك تبعتلى رقم السمسار
شكرا لإهتمامك

**alrabeh** · 08-07-2011 10:14 AM

شكرا لك أستاذ ghosts على الرد المفصل
لو حضرتك تقوولى رأيك هل تؤجر شقة على البحر أفضل ولا أندلسية ما تزال اختيارك المفضل

وياريت الإخوة يوضحولى أعمل ايه لو سافرت من غير عربية حاتنقل إزاى مع السمسار
والشقق اللى على البحر أسعارها ايه دلوقتى
ومنتظر تجارب باقى الأعضاء فى مطروح

**Ghosts** · 08-07-2011 10:51 AM

المشاركة الأصلية كتبت بواسطة alrabeh

شكرا لك أستاذ ghosts على الرد المفصل
لو حضرتك تقوولى رأيك هل تؤجر شقة على البحر أفضل ولا أندلسية ما تزال اختيارك المفضل

وياريت الإخوة يوضحولى أعمل ايه لو سافرت من غير عربية حاتنقل إزاى مع السمسار
والشقق اللى على البحر أسعارها ايه دلوقتى
ومنتظر تجارب باقى الأعضاء فى مطروح

يا باشا أنت تأمر ....
الحقيقة أندلسية لا تزال أختيارى المفضل ....
وبصراحة أنا مابحبش أمشى فى شوارع مطروح خالص ....
قصدى يعنى وسط البلد لأنى واخد على أسكندرية أكتر ....
مطروح ليها طعم تانى بس مش ولابد ....
عايز هدوء و بحر نضيف يبقى مطروح ....
عايز خروج وسهر يبفى أسكندرية ....

أنا بحجز الشالية فى أندلسية من خلال أعلانات الأهرام أو الوسيط مش من خلال سماسرة ....
هتلاقى أسعار متفاوتة على حسب موقع الشالية و مستواة ....
أحسن حاجة الشالية اللى على البحر طبعآ ...
بتمضى العقد مع صاحب الشالية قبل ما تسافر ....
وبتستلم المفتاح والكارنيهات وممكن تلاقى الكارنيهات فى الشالية ....