الموضوع: من فضلكم ممكن تشاركونى كلكم

كلامى لكل اعضاء المنتدى ودى أول مشركه ليا لأنى عضو جديد وعاوز اقولكم كلكم ليه مش بتدعموا المواضيع الجاده المفيده ؟؟؟؟ أنا استفدت من القسم دا جدا لحد ما اشترينا عربيتنا اللوجان وعشان كده قلبى عليه ونفسى كل اعضاؤه يهتموا أكتر بالمواضيع الجيده المفيده لأنى أول حاجه لاحظت إن لاهتمام الأكتر بيكون لموضوعات فايدتها أقل أو موضوعات الدردشه حتى لو مالهاش هدف ، تصوروا إن موضوع عبقرى زى موضوع " أفكار ذكيه تخلى صيانة اللوجان اقتصاديه " الاعضاء اهتمامهم بالمشاركه فيه أقل كتير من موضوع ممكن يتكلم عن حاجه فرعيه خالص فى اكسسوار أو زينة العربيه مثلا ، طب ازاى هنتقدم ونبقى شعب محترم وكلمته مسمووعه فى كل الدنيا ومتقدم لو ماكناش نقوى ونشجع إللى بيبتكر ويجدد علشانا كلنا - ياجماعه لازم نقول شكرا للناس إللى بتتعب وتقدم لنا جديد والا نبقى احنا بنضيع حقنا قبل ما نضيع حق الاعضاء المجتهدين رغم اننا أول ناس ممكن نستفيد من اجتهادهم بالذمه دا يبقى كويس؟؟

ليه فيه أعضاء مجرد يدخلوا يقروا الموضوعات ويستفيدوا منها من غير ولا شكر ولا نقد ولا حتى انطباع مفيد ، دى أنانيه وسلبيه مش كفايه انهم مش بيضيفوا ولا بيكتبوا موضوعات تفيد زملائهم كمان بيبخلوا حتى بكلمة شكر أو نصيحه

عشان كدا أنا أتمنى نتبنى دعوه للايجابيه على الموقع بتاعنا كلنا يكون شعارها " كن ايجابى " وكل واحد لازم يشارك حتى لو ينتقد بس نقد بناء ، لو عاوزين تتأكدوا من كلامى شوفوا خانة المشاركات أمام المواضيع الجاده المحترمه تلاقوا أقل عدد مشاركات دايما عند الموضوعات المفيده اللى كلها جديه ، مش دى حاجه تكسف !!!!

شكرا لكل واحد مر وقرأ ملاحظتى .

شكرا على رأيك السديد وعلى الاشاده بموضوعى " الأفكار الذكيه " ، مفيش شك إن حسن ترتيب الأولويات والوعى بتدرج الأهميات دى معايير راقيه جدا لتحضر الشعوب ، وكويس إن حضرتك كمان مش بتنكر أهمية الفرفشه والترويح والتعارف بين الأعضاء ، أنا شايف إن رأى حضرتك متوازن جدا وموافق عليه 100% لكن دايما إهتمامات الناس مسأله نسبيه ولو حضرتك دارس أو متابع للظواهر الاجتماعيه هتلاقى إن الناس دايما بتميل للأمور الأقل جديه ، مش واخد بالك إن ماتش كوره ممكن يوقف حال البلد كلها ، على كل الاحوال أنا متشكر على رأيك وعلى إهتمامك بموضوعاتى .