الموضوع: عربيتي إتخبطت جوه التوكيل

أسف على التأخير يا جماعة بس كنت مسحول بقالي كام يوم .
التقرير : -
إتصلت يوم الأحد بقسم السمكرة و عرفت إن الإكصدام الجديد لونه أسود من غير رش بحوالي 600 جم و هو بتاع الهاف أوبشن و بعد لما بيرشوه ( بحوالي 400 جم ) بيركبه الفبر الأسود إللي حاولين فوانيس الشبورة و الفوانيس .
أتصلت بعديها بالمهندس محمد عمر مدير فرع العبور و قولتله على الموضوع وطبعا كان عارف و قولتله عايز إكصدام جديد و يترش علشان آجي أركبه على طول معطلش , فقال حاضر و سيبني كام ساعة أظبط الموضوع .
كلمته تاني الساعة 3 قالي أنا كنت لسه هكلمك , حضرتك تيجي بعد بكره التلات في أي وقت تركب الإكصدام الجديد عند المهندس سامر في ورشة السمكرة .
رحت يوم التلات الساعة 11 و نص دخلت للمهندس سامر وقولتله أنا عايز أشوف الإكصدام بعد لما يتفك أشوف إللى تحته قالي حاضر .
عشر دقايق و لقيته بيندهلي و بيوريني لقيت تحت سليم قولته إشتغل .
طلعت شربت واحد إسبيرسوا و صليت الضهر و لقيتهم بيطلبوني على الساعة واحدة .
كله تمام و كانوا ملمعين وش العربية كله و قالولي كان نفسنا نعمل أي حاجة تانية .
شكرتهم و رحت للمهندس محمد عمر مدير الفرع و قولتله أنا عايز يقيت جركن الزيت الشل الألترا بتاعي علشان ما كنتش خادته لأن اللوجان لم بتغير زيت و فلتر كل عشرة ألاف بتحط أربعة إلا ربع بس .
و قولتله أنا حاسس إن العفشة ما تربطتش كويس , خادها بنفسه و طالعها على الكوريك قدامي و عملها قدام عنية كل ده في ربع ساعة لما الناس إللى قاعدة إتخنقت مني , واحد غير إكصدام و ربط عفشة و خلص في يمكن ساعة و نص و في منهم نص ساعة بريك .
المهم الحمد لله و أنا مبسوط بس بحب أقول للناس كلها إن إللى حصل في الأول ده سلوك عام و منتشر جدا فينا يا مصريين .
أسلوب الفهلوة و تلبيس الطواقي و بتمنى بجد إننا نتغير و نتحلا بالمسئولية و نبقى صادقين مع بعض و مع أنفسنا .