الموضوع: تقرير كامل عن الدايهاتسو سيريون 2007

بالنسبه للمطبات فهي تعتبر عاليه والحمد لله يعني من ممكن تقول مفيش مطب لمس العربيه الا كان في مطب ناس متخلفه عاملينه والله بدون مجازفه العربيات النقل المحمله كانت بتحك فيه ( نصف النقل )

انا أخذته بجانب العربيه كلها وبرضه حك العربيه ولكن الحمد لله

اما عن غالب المطبات فالعربيه الحمد لله حتى لو محمله مفيش مشكله ولكن تهدي قبل المطب علشان العربيه لو محمله ووقفت على المطب وانت جاي بسرعه وضغطت على الفرامل وانت على المطب هتلاقي العربيه نزلت شويه لتحت علشان السوست بتاعتها مع الفرمله فجأه هتلاقي العربيه تنزل شويه بحركه سريعه كده وتطلع تاني ............ انت فاهمني ولا لأ
وعلى فكره العربيه ارتفاعها عن الأرض 15 سم وده يعتبر ارتفاع كويس جدا وعلى فكره ايضا ان بطن العربيه ارتفاعه اعلى من كده عن الأرض ولكن هناك سوكتين في جانبي العربيه هما اللي اول حاجه بتحك في العربيه وبيبقى بطن العربيه بعيد وهما من عضم العربيه يعني جامدين قوي

بس كده اي استفسار أخر انا معاك

حد عنده فكرة عن البولو 2007 و الفرق بينها و بين السريون

انا بصراحه معنديش اي فكره ولكن أفضل السيريون حيث سعر قطع الغيار أقل وتوكيل محترم وضمان اعلى وسهوله في الصيانه

اما توكيل فولكس فاجن فأنا اسمع عن مشاكله كثيرا وغلو قطع الغيار وسعر اعادة البيع مش بيبقى قدكده

العربيه جميله جدا وبصراحه مش عارف أقول هي عامله معايا ايه لنها بصراحه مش ملاحظ اي حاجه تضايق او تحس انها المفروض كانت اتعملت بطريقه تانيه وعالعموم برضه انا هحاول أكتب بعض الحاجات اللي بصراحه مميزه في صناعة السيارة ومنها :

1- لاحظت مع التراب ان في بعض الاماكن في السياره عليها طبقه شمعيه غير قابله للازالة حتى لو ببنزين او جاز ومنها ( المفصلات كلها للسيارة , بعض الاجزاء في العفشة وبطن العربيه بالكامل , المناطق اللي بيكون فيها حروف للصاج بتاع العربيه )
2- الخامات المصنع منها السياره خامات شديدة الأستحمال مع الشكل والملمس و اللون الجمالي للخامات .
3- الخامات المصنع منها الاكصدامات خامات قابلة للثني بطريقه غريبه جدا مع قوتها وعدم التأثير بهذا الثني وخفتها أيضا .
4- أداء العشفه أداء اكثر من رائع ويتسم بالنعومه ( وقد لاحظته اكثر من مره حين تقف العربيه على أرض غير مستويه أجد ان العجله التي تقف عند المكان المنخفض تنزل لأسفل لتجعل العربيه واقفه أفقيا وتكون متساويه الجوانب وهذا لاحظته وكان الميل كبير جدا )
5- سلاسة الباور طبعا مش محتاجه كلام ........ باور ياباني .
6- اداء الماتور طبعا أداء أكثر من رائع لماتور 1300 سي سي ينتج عنه 87 حصان ما عليك في الاوتوماتيك إلا ان تضغط الكيك داون وترى اداء السياره الرائع ............
7- الدهان ............. بصراحه والله تحفه وجميل جدا لأني متأثر من قبل بدهان النوبيرا المقرف ...... اما هذا الدهان والله والحمد لله حصل كذا مره ان العربيه تتخدش وما عليك الا ان تمسح مكان هذا الخدش بالبولش فتجد انه لم يتاثر الدهان بشئ ولو جامد تلاقي مكان التأثير خفيف ........... خامة الدهان من الخامات القيمة جدا والتي صعب التأثير عليها وتستحمل غالب الخدوش .
8- ماشاء الله نظام الفرامل ABS مع نظام EBS التوزيع الألكتروني مجرب وفعال في المطر وعلى الرمال وعلى الأسفلت على الطرق السريعه تمت أستجابته بفاعليه دون أي أحساس بجود تقصير منه .
9- انارة الكشافات الاماميه أنارة واسعه تضئ لك الطريق كله من الجانب الأيمن الى الجانب الأيسر بطريقه توضح لك معالم الطريق وهذا بفضل الكشافات الكبيره الاماميه .
10- اداء التكييف أكثر من رائع وذلك لسسب واحد انه يتم تبريد السياره في وقت قصير مع عدم الاحساس نهائيا واكرر نهائيا أن هناك تأثير على اداء الماتور .... والتشغيل على الدرجه الثانيه كافي لتبريد السياره
11- أسعار قطع الغيار أكتشفت انها بمقارنتها بباقي السيارات التي في نفس الثمن مع اختلاف انواعها انها بالنسبة لهم أقل أسعار او تعتبر من أقل الاسعار في السوق فيهذه الفئه السعريه مع العلم بان انواع قطع غيار دايهاتسو هيا Denso , NGK وهما من افضل الشركات عالميا في انتاج قطع الغيار المعمره المشهورة .
12- ثبات العربيه أكثر من رائع ومن اوئل الأشياء التي انتبهت اليها عند قيادتي الاولى للسياره ان السياره على السرعات العاليه تحس مع الملفات والمنحنيات انك تستطيع ان تميل بالسياره أكثر او تاخد ملف أقوي من ذلك او على سرعه أعلى او على سبيل المثال لو انت على سرعه عاليه وحبيت تناور بالعربيه هتلاقي العربيه مساعداك ومتحسش ان العربيه هتحدف منك بل بالعكس بتحس ان العربيه ثابته جامد في الأرض .......... وده شئ ملاحظ بأداء عالي جدا بصراحه اعلى من أن تتصوره من الخارج .
13- ضمان ثلاث سنوات مع توكيل محترم مثل عبداللطيف أكيد دي لوحدها ميزه كويسه جدا .
14- توفير البنزين وده فعلا حصل معايا انا عملت بالسياره 350 كيلو بصفيحه بالظبط مع العلم ان سيارتي اوتوماتيك .
15- تحتوي السياره على أربع عجلات ماركة دنلوب ياباني ودي من افضل الماركات .

كل ملاحظاتي ليس هناك فيها مبالغات لأني أعيي ما أقوله بالظبط ولا أبالغ في شئ من الذي تم ذكره ان شاء الله
وربنا يرحمنا ويعفوا عنا جميعا


اي ملاحظات اخرى سوف أقوم بسردها عند تذكري اليها ان شاء الله

أول مرة أعرف إن في عربية كاملة ومافيهاش غلطة كده :lol:
ياراجل وتقوللي مش مبالغ
دي الفولكس الباسات نفسها مأقدرش أقول انها كاملة بالدرجة دي
أرجو التزام الموضوعية، وعدم التحيز ولا انت من كُتر استضافتنا ليك في رووم الاسبيرانزا اتعديت مننا :lol:

يا استاذ وائل الشركات المحترمه بتبقى عربياتها كده

ولا انتم مش متخيلين كده علشان اللي بيحصل معاكم

وعالعموم لو حضرتك عندك اعتراض على اي بند من البنود المكتوب وتقدر تكذبها فمن حقك ونرجوا ذلك علشان ميبقاش كلام وخلاص وتتهم أحد ظلم بأنه مبالغ

اما موضوع الكمال فده شئ تاني مش شرط ان يكون علبة الدركسيون بايظه علشان يبقى الموضوع صح ولا يكون التكييف مش قادر يكيف برضه ولا ولا ولا ولا ....... كفايه كده

والله العربيه موجوده واي حد عاوز يعرف او يشوف هل انا مبالغ ولا لأ

وعموما عندك كريم وسبعاوي وحفناوي وبايو كلهم جربوا ممكن تسألهم لو مش هتقدر تجرب العربيه على انا قولته ده

وياريت يكون الكلام موضوعي وبأدله وانا ركبت العربيه وقلت رأيي ممكن حضرتك تشوفها وتقولي اي العيوب والله ثم والله عمرك ما هتلاقي العيوب اللي حضرتك جربتها ........... وتحدي

أنا لم أتهمك ظلماً بالمبالغة بل أؤكد على المبالغة وهذه ليست سُبة أو نقيصة وإنما فقط فرط تحيز لسيارتك التي أراها شكلاً وموضوعاً غير موازية لقيمتها بالجنيه المصري
ولا أجد فيها ميزة تُذكر (وفقاً لسعرها الذي أراه مبالغ فيه تماماً) إلا وفرها في استهلاك البنزين
فما الداعي أن أدفع هذا السعر المبالغ فيه في سيارة صغيرة الحجم جداً (لا أراها فارقة كثيراً عن الـ 127 في سعتها)، وأعلم أنك سوف تستشهد بالميني كوبر وغيرها ولكني أذكرك أنني أتحدث عن العربيات المتوسطة العادية وليست الفاخرة
يا سيدي هذه العربية لا تصلح إلا مع عربية أخرى لأ أجد أنها تستطيع تحمل مسئولية عائلة بمفردها

هى احد العيوب الكبيرة اللى بشوفها فى العربية هى صغر حجم الحوض بتاع الموتور, و قربه الشديد من مقدمة السيارة

حتى مسئول المبيعات فى دايهاتسو مقدرش يجادلنى فى النقطة دى حتى فى وجود الدعامات

ده عيب مش سهل