الموضوع: ويستمر مسلسل الهبل الجماعي من تجار وملاك السيارات

انا بصراحه دمي محروووووووق جدا من تجار السيارات وسوق السيارات وحتى الناس الي بتبيع عربياتهها

مش كده يعني ااول موقف وانا نازل ابيع عربيتي النترا موديل 2005 فبريكه بالكامل بس بويه متهانه واوتوماتك اعلى فئه كنت عايز فيها 68 خلصت مع التاجر على 66 الف يخلصها لتاجر صاحبه والراجل لما شاف العربيه ونزل يخلص فيها هاتك ياحوارات مهو يااستاذ محمد انا العربيه موصوفالي ومش هينفع 66 خليهم 65 وعدت ساعه يحور وانا رافض لحد لحد ما قعد يهلل والمصحف هيغرلها فوانيس واعمل واسوي وانت مش شايف العربيه عامله ازاي لحد ما اخد 250 جنيه وخلصت 65 و 750 جنيه وعلى وعد انه يخلصلي عربيه تانيه بسعر معقول وطبعا وعد الحر دين عليه بس لو شوفته تاني

وقعلي لانوس فبريكه برا وجوا عايز فيها 47 موديل 2001 وماشيه 150 طبعا في الاحلام

وابتدى مسلسل البحث عن عربيه

نزلت السوق الجمعه اللي فاتت فعلا يسد النفس كلمه قليله كل العربيات اللي هناك تعبانه مله وهاتك يانصب

اتفرجت على فيات ماريا العربيه من برا معقوله بس رشه طبعا جيت اتكلم مع صاحبها هي ماشيه كام يااستاذ بصلي بصه كده معفنه قالي العربيه حاله مش كيلوهات قولتله انا عبيط على اد عقلي ماشيه كام قالي 300 الف كيلو عايز فيها كام 40 الف جنيه وراح مدور ومشغل التكييف شايف يابيه العربيه زي الفل وقفنا جنب العربه ربع ساعه ان التكييف يبرد مفيش والعربيه السلانسيه بايز والمتور بيجعر سلام ياحاج

التانيه فيات برافا 98 كوبيه هاتش باك برضو 250 الف كيلو عايز كام ياكابتن نهائي 55 الف جنيه اصل دي نادره يبني العربيه مفحوته البرافا اساسا سعرها في التلاتينات مفيش اخره 54 الف جنيه اقل منها بشلن مش بايع طب خلي العربيه جنبك ياحبيبي

في وسط الليله دي عجبني موقف حلو اوي كنت بتفرج على في السوق برضو ناحيه الشارع لقيت ميجان بتركن لعربيه اسبيرانزا الهاتش باك والهانم قاعده جنب جوزها الامور وراحت منزله الازاز وندهت للتاجر قالتله العربيه دي حلوه قالها اه يامدام دي زي الفل قالتله انا هشتريها طبعا انا شوفت الهبل ده قعدت اضحك ومشيت

ده غير بقى الهبل الي معاه بولو رشه كلها بره بس بنضافه فعلا عايز يبيعها فبريكه بره جوه واتهرشت

وشوفت كرولا 99 اوتوماتك نضيفه اوي اوي اوي عايز فيها كام ياباشا 67 الف جنيه ياعم انت مجنون دي اخرها 50 اصل دي فبريكه وماشيه 60 الف بس ياعم انت شايفني اهبل يعني هي في 12 سنه مشيت 60 الف بس

شوفت وحده تانيه وكنت هخلص فيها والراجل قال الرخصه باسمه وكانت هتخلص ب 44 الف لما جينا نخلص قالي طب اكلم صاحب العربه عشان هي مش بتاعتي قولتله والمصحف ماشاري

مرت الايام وكنت في مرور معين بخلص حاجه مع صديق ف راجل كبير راكب كرولا 2003 مش عارف يطلع العربيه طلعنهاله ف بقوله تبيع ياحاج(العربيه من برا مفيهاش حاجه سليمه بس الميزه انها فبريكه وماشيه 90 الف بس )

بعد ما بقوله تبيع ياحاج بصلي بصه (بصه الي هو انت مش هتشتغلني لا اشتغلك انا الاول) وراح قايلها بهبل تسعييييييييين الف كتير ياحاج قالي اصل دي الغاليه انا مشيت وقعدت اضحك وللنهارده مشترتش عربيه

والى الان واحد صحبي يقولي اديني سجاره اقوله لا يقولي ليه اقوله اصل دي الغاليه وعلى كده بقى افييه معايا

ومعلش بقى طولت عليهم اصل دي الغاليه