يا مقطوراتك يا مصر

**Karim_Monir** · 04-05-2008 03:10 PM

امبارح بعد اجازة طويلة تخللها نزول يومين شغل والعودة للاسكندرية لاصطحاب اسرتي والنزول بهم خدنا طريق الرجوع للقاهرة
ركبت الطريق الساعة 4 العصر تقريبا وفضلت ماشي 100 عشان الطريق ملغم رادار وعند واحة عمر تقريبا كان فيه تريلا دخلت اليوترن على الشمال واخر جزء فيها هو اللي علي الطريق
انا مشيت بالراحة في طريق واول ما قربت منها وعديتها بنص عربيتي
بوووووووووووووووووووووووو وووووم
وعفرة والعربية عامت وبقيت مش عارف ايه الي حصل والعيال صحيوا من النوم مسروعين وهات يا عياط
لميت العربية بسرعة وجيت على اليمين ووقفت ونزلت اشوف ايه اللي حصل
اتاري عجلة الدوبل الخلفي للتريلا انفجرت جنب عربيتي بحوالي متر ونص فقط مما انتج الموجة التضاغطية دي واثار كمية التراب والعفرة الرهيبة وعوم العربية دي
قعدت اسكت العيال وحمدت ربنا وكملت طريقي وبعد ما وصلنا افوجيئ ان المحور واقف تماما والعربيت بتنزل بضهرها
نزلت بضهري وقولت ادخل رماية هرم واطلع الدائري من المريوطية
الرماية واقف بطريقة بشعة وما بيتحركش نهائي وكان معايا اخويا جاي ورايا بعربيتة ماخلتوش يطلع المحور هو كمان المهم لقيت كام سواق عربية بيتكلموا في الموبايل ويلفوا من الجزيرة ويطلعو هو لفيت زيهم وطلعت تاني على المحور وكان ماشي ببطء يجيب شلل بس ماشي
واخويا اتزنق في الرماية اتاري كان في حادثة كبيرة اكتر من 8 عربيات راشقين في بعض
خلصت المحور وطلعت الدائري وانا مش طايق نفسي بقاللي اكتر من 4 ساعات وشوية سايق الاقي سواق مقطورة مرسيدس فاضية مش محملة ماشي على الشمال على 130 وعامل رعب على الطريق
جريت جنبة وجيت قدامة وفشيت غللي فيه ومشيتة على 70 او اقل وما سبتوش الا لما مشي في تالت حارة
بعدها ب 6 كم لقيت مقطورة شايلة سيراميك وماشي على 40 وموقف الطريق كلة وراة على الشامال برضه عديتة ومشيتة شوية على 20 وقرفتة هووووب صاحبنا بتاع ال 130 حصلنا وعايز يعملني ساندوتش بينه وبين زميلي وبقي يقرب قوي من عربيتى طبعا سقطت وحرقت وطلعت واديتة تحية الطريق بحركة قليلة الادب زيه ودخلت على اول كمين حكيت للامين
هووووووووب لقيت نقطة ايجابية في مصر والامين وقف الطريق فعلا وهاتك يا فحص رخص كل الترلات اللي جاية وفضلت واقف اكتر من نص ساعة مستنيهم بس للاسف شكلهم هربوا من منزل فرعي
بس بجد تحية جامدة قوي للامين محمد في كمين السلام الامني اللي على الدائري وتحية جامدة لمصر اللي السفر من الاسكندرية للقاهرة بياخد 6 ساعات تقريبا
عمار يا مصر
محدش عندة سواق بسعر حنين

**hatem_badawe** · 04-05-2008 03:49 PM

تحية للامين محمد

بس انت يا كريم بتهرج

معاك عيالك ومراتك وعمال تزنق علي النقل
دا كلام افرض لا قدر الله طلع سواق النقل شارب حاجة وحطك في دماغه

في مثل كان مكتوب علي عربية نقل بيقول

(احترام الكبير واجب)

**fahd_628** · 04-05-2008 03:55 PM

بس يا كريم ابقى خد بالك من بتوع المقطورات دول لو انت حبيت تغلس عليهم هما كمان ممكن يغلسو و ممكن واحد يخبطلك العربية من ورا و هوة طبعا مش حتفرق معاة و لكن انت الى حتضرر و كمان لأن معاك المدام و الأولاد

و لكن تحية للأمين محمد

**Ahmed Samy** · 04-05-2008 04:11 PM

و الله و أنا كمان أول امبارح كنت على الزراعى و لاقيت العربيات فجأة بتهدي و الطريق مليان رمل بشكل مفزع .

ضربت بعيني قدام كده لاقيت تريللا بمقطورة و هاتك يا رمل على خلق الله لأنها مش متغطية و محملة هرم عالى كده

عديت الناس و عديته و جيت قدامه و شغلت الفلاشر و بدأت اهدي بحذر لأنه كان بيجري
قعد يديني في كلاكسات من المرعبة بتاعتهم دي بس فضلت اهدي بشويش لحد ما هو ادا اشارة يمين و ركن

نزلتله (وكان ذوق جدا بصراحة) و قولتله حرام عليك الطريق متبهدل غطي الرمل ده
و رد بأدب و قاللي معهلش يا باشا بس التباع نايم و هايصحى يركبه

قولتله انا هاسبقك لكمين ميت غمر و هابلغ فا غطي نفسك قبل الكمين

و سلام سلام
و لا بلغت و لا حاجة
بس حسيت اني ايجابي
و ممكن تعمل حاجة كويسة في البلد دي برضه

**Karim_Monir** · 04-05-2008 05:02 PM

البلد فعلا ماشية من سيئ لاسواء
حاتم وفهد انا بجي قدامهم واضرب انتظار واهدي ومهما يدين يفي كلاكسات ببقي عامل مسافة امان كافية وحارق غيار عشان لو قرص عليا اعرف اخلع بسهو ما فارق الوزن واحجم لصالحي طبعا وعمر ما عهعملها من غير موتور حنين
بس بعد الساندوتش اللي كانو هايعملوة فيا مش هاعملها واسرتي معايا
مراتي شافت وشوة وبتقولي مش طبيعي يا كريم دي بيبصل بصة جنونية وده اللي خلاني اسبقة على الكمين
اهو انا نفسي اقدم استجواب لصاحب ال 100 مقطورة دوول واسالة لو ابنك اتصاب بس من مقطورة هاتعارض القانون برضه
والله حوادث بشعة شايفها وانا رايح جاي ومعظمها مشترك في مقطورات
خاصة شيفرولية سبارك سوداء واحنا رايحين ومقطورة باستها بس من ورا

**MMamdouh** · 04-05-2008 05:05 PM

المشاركة الأصلية كتبت بواسطة karim_monir

بعدها ب 6 كم لقيت مقطورة شايلة سيراميك وماشي على 40 وموقف الطريق كلة وراة على الشامال برضه عديتة ومشيتة شوية على 20 وقرفتة هووووب صاحبنا بتاع ال 130 حصلنا وعايز يعملني ساندوتش بينه وبين زميلي وبقي يقرب قوي من عربيتى طبعا سقطت وحرقت وطلعت واديتة تحية الطريق بحركة قليلة الادب زيه ودخلت على اول كمين حكيت للامين

not a good idea at all... wouldn't do that unless i have a shotgun or so

MMamdouh