الموضوع: انا خلاص زهق من مصر والعيشه فيها حاجه تخنق

مع كامل احترامي لرأيكم اللي هو في الاساس مختلف, و وجهة نظركم إلا ان في جزء
من كلامكم غير دقيق, و البعض منه مبالغ فيه شوية...و اسمحولي اعقب على بعض النقاط

أولا: مرتبك في اي دولة بره مش بيتضرب في 10 ولا حتى 5 اضعاف خاااالص !!!

مرتبك بيكون بردو مكفيك و على القد بالظبط, و احتمال ضعيف تحوش منه جزء و هيكون بسيط

ماتحسبش انت بتاخد كام بالمصري, احسب انت هتاخد كام هناك مقارنة بمستوى المعيشة و الاسعار هناك..

ثانياً: مش صعب انك تاخد الجنسية بتاعة دولة زي كندا او استراليا او نيوزيلاندا مثلاً,
لكن مش سهل بردو, بس الموضوع مش بيوصل لملايين و الكلام ده خالص...

ثالثاً: فعلاً في ناس بتسافر بره و بتلاقي ان الموضوع مش زي ما كانوا متصورينه و متخيليين
و بيحسوا انهم مش عارفيين يتأقلموا على الوضع الجديد, و بيرجعوا تاني فعلاً بردو,
بس عمر ما حد خد جنسية تانيه مع المصرية و ندم اطلاااااااااقاً !!!!!! عمرها ما حصلت

اللي بيروح هناك و بيرجع لانه مش قادر يكمل بيكون لاسباب كتير منها مثلاً...
- مش قادر يتأقلم هو او اسرته مع المجتمع الجديد و الوضع الجديد, و في ناس كتير كده
- ممكن يكون مش مستحمل يتعب شوية علشان يوصل لهدفه و مش قادر يصبر و زهق بسرعة
- ممكن يكون وهم نفسه قبل ما يسافر انه رايح مكان هيديله كل اول شهر شوال فلوس
من اول يوم يروح فيه هناك, و هو بيشتغل بأقل مجهود, و كل احلامه هتتحقق في لحظه !!

كل دي اسباب و غيرها كتييييير ممكن تخلي اي شخص يسافر بلد اوروبي و يرجع تاني...

رابعاً: مافيش فعلاً تمييز بين الجنسيات في الشغل في بعض دول اوروبا او كندا,
لكن في تمييز شوية في استراليا, بس امكانياتك و مؤهلاتك هي اللي تخليك أفضل من اي شخص.

موضوع انك مصري و الناس عارفة ان المصريين مش بتوع شغل, الكلام ده مع احترامي
غير حقيقي بالمره, و بالعكس, معروف ان المصري بيتطحن علشان لقمة عيشه و شغله,
و بره مصر النوع ده من التمييز او الثقافة مش موجود ابدااا إلا نادراً في بعض الدول
زي استراليا مثلاً, لكن التمييز مش في مصري و الماني و ياباني... التمييز بيكون
بلون البشرة, يعني لو حضرتك مش ابيض و تكاد تكون شفاف زيهم, يبقى انت مش منهم و مش هتكون...

خامساً: كل دول العااااااالم فيها نسبة بطالة, و فيها متسولين و شحاتين طبعاً... بس بنسبة كام % ؟؟

لما تسافر دولة نسبة البطالة فيها 5% مثلاً, هل تتساوى مع دولة نسبة البطالة فيها 30% !!؟؟؟؟

فرصة انك تلاقي شغل في بلد نسبة البطالة فيها 5%, زي اللي نسبة البطالة فيها 30% ؟؟؟؟؟؟

يبقى نسبة البطالة مقياس مهم, و كده كده في كل دول العالم في اللي مش لقيين ياكلوا
و اللي بيشحتوا و اللي عاطلين عن العمل كمان, بس كام واحد !!؟؟ هو ده اللي يفرق

سادساً: السفر لدولة زي كندا مثلاً, حضرتك بتاخد حمميزات كتير بعيداً عن الجنسية,
و على سبيل المثال... مجتمع متحضر, متعدد الثقافات, مستوى التعليم فيه عالي جداا,
مستوى المعيشة فيه من اعلى دول العالم, الجالية المصرية هناك ما شاء الله ضخمة جدااا,
الاسلام فيه منتشر و بشكل واضح جدااا و قوي, مجتمع بيحترم حرية العقيدة و بيحترم بعضه,
هتربي اولادك في مناخ نظيف و انت كمان هتعيش في مناخ نظيف و مستوى راقي,
ليك اعانة بطالة, ليك تأمين صحي, ليك معاش, تعليم مدعم و ببلاش حتى مرحلة الجامعة...

كل دي مميزات... في المقابل انت مش في بلدك الاصلية, مش وسط اهلك و عائلتك,
مطلوب منك تتأقلم مع حياة جديدة كلياً في كل شئ و ده بيكون صعب على ناس كتير,
مطلوب منك تتأقلم على جو مختلف عن الجو المصري (مش في كل الدول طبعاً),
هتتعب شوية علشان تلاقي شغل في مجالك, و هتتعب اكتر علشان تعادل شهادتك لان شهادتنا
ماتسواش 3 قروش بره مصر, و لا جوه مصر والله, هتحتاج 3-4 سنين علشان تاخد الجنسية,
و هتدفع ضرائب على كل شئ (مش في كل الدول بردو و النسبة مش واحدة) بس طبعاً
بتاخد مرتب آدمي محترم مش هتفرق معاك انك تدفع مقابله ضرائب عليه او على اي شئ.


في الآخر... الهجرة لاي دولة اجنبية مش بمثابة السفر للجنة, لكن افضل من الوضع الحالي هنا...

لازم اللي بيفكر يسافر او يهاجر, يفكر في انه هياخد مميزات و معاهم عيوب بردو,
و مافيش دولة في العالم كله تديلك مميزات فقط, و طبيعة الشخص نفسه و عقليته تفرق كتير...

ده رأي بشكل عام, و اتمنى اني اكون وضحت وجهة نظري بشكل بسيط...

تحيــاتي...

انا اتفق مع حضرتك تماما و شايف انك جبت من الاخر و برضو انا مش ضد وجه نظر العضو المحترم اكسل لان ف الاخر كل واحد بيقول وجهه نظره من خلال الخبرات اللي مر بيها ف حياته و اللي حصل سواء معاه او مع صديق او قريب سافر او هاجر....انا بس حابب ااعلق علي نقطتين..
اولا: انا متفهم اني اما اسافر ادرس و بعدين اشتغل بره و ليكن ف دوله زي المانيا مثلا..انا عارف اني مش هاخد شوال فلوس و الموضوع هيكون يدوب عالقد خصوصا ف البدايه بس برضو هكسب مستوي تعليم كويس و بيئه نضيف وغيره و اكيد طبعا في عيوب زي اني ممكن اكون مضطهد بسبب ديني او لون او اي شيء اخر بس الموضوع ف الاخر مقارنه .انت كشخص بتحسب ايه المميزات و العيوب اللي انت حاصل عليها ف مصر..و ايه المميزات و العيوب اللي هتحصل عليها لما تسافر..و تقارن بين الوضعين بحيث ف الاخر انك ااما تيجي مسافر تكون عارف انك كسبان كذا و كذا و كذا و ف نفس الوقت انت مستعد انك تتحمل اللي هيحصلك سواء اذا كان اضطهاد او شعور بالغربه او ..او..
ثانيا: موضوع ال 10 اضعاف دا قد يبدو مبالغ فيه فعلا...بس انا مثلا جوز اختي شغال مصمم جرافك ف الكويت بمرتب 500 دينار و قديم ف الشغلانه دي..ف حين ان في واحد زميل له ف المكتب لبناني امريكي بياخد 4000 دينار و تقريبا نفس الشغل هو هو دا غير انه بيعاملوه معامله لا تقارن باللي المصري بيتعامل بيه...دا مثال..مثال تاني ابو واحد صاحبي شغال ف شركه ف السعوديه من مده طويله و مرتبه 9 الاف ريال...و جالهم من سنتين مدير جديد لفرع الشركه ف الممكله مصري كندي..بيقبض 90 الف ريال شهريا..يمكن تقولي عشان مديير...و اللي حكالك متغاظ او بيحقد عليه...طيب شوف انت بقي في كام مصري ف السعوديه بياخدو 90 الف ريال شهريا مرتب..او ف الكويت في كام مصري بياخد 4000 دينار؟
و ف النهايه زي ما قلت كل واحد بيتكلم من خلال الخبره اللي مر بيها و ف الاخر كلنا عاوزين نسفيد من اراء بعض و منطلعش نتخانق زي ما بيعملو ف برامج التوك شو