الموضوع: انا خلاص زهق من مصر والعيشه فيها حاجه تخنق

ربنا يرحمنا برحمته
انا مش متضايق من الأوضاع السياسية و لا الإقتصادية
سواء دلوقتى او ايام المخلوع رغم إهتمامى بحال البلد بصفة مستمرة

بس اللى بيجبلى إكتئاب و أقعد فى البيت مش عايز أتكلم مع حد
إنى أنزل الشارع الاقى زبالة و برك مياه و أشكال عايزة ضرب النار
أو تنزل تتمشى شوية تسمع كلام يحرق دمك من شتيمة بصوب عالى او شاب ظريف بيعاكس واحدة

طيب لحد إمتى ... ما هو انا مش هعيش حياتى كلها قرفان و زهقان و مش طايق أتكلم مع حد

المشاركة الأصلية كتبت بواسطة x512

موضوع الفلوس دا بيتوقف علي البلد اللي رايح تتعلم فيها و المجال اللي حضرتك هتدرسو دي حاجه و حتي لو هصرف مئات الالاف عشان اتعلم تعليم صح و ابقي بني ادم ليا قيمه علي الاقل ف مجال عملي ف دا عندي احسن من اني احط نص مليون ولا مليون ف عربيه او ف شاليه في الساحل...دي حاجه الحاجه الثانيه حضرتك بتقول انهم هيفضل ابن البلد عالغريب..دا صحيح ف اغلب الاحيان ..بس مين اللي قال انك هتفضل عايش غريب...من الطبييعي لو تخطيطك ان تعيش ف بلد ما كمهاجر ف انت اكيد ف يوم من الايام هتاخد الجنسيه وساعتها زيك زي المواطن سواء كان امريكي و او بريطاني او كندي دا غير ان مرتبك هينضرب ف 10 اضعاف خصوصا بقي لو ساعتها فكرت ترجع بلدك..او تروح الخليج حتي ك امريكي و ا ككندي او اي ان كان..هيشلوك فوق راسهم عن اما تكون مصري...و اسأل اللي عايش في الخليج بقالو سنين..و ف النهايه كلها وجهات نظر و الاختلاف لا يفسد للود قضيه

المشاركة الأصلية كتبت بواسطة axel

اكيد يا ريس الاختلاف في الرأي لا يفسد للود قضية

انا مش معترض انك تسافر ديه حاجة ترجعلك انا مش هجبرك تقعد
اللي اقصده طالما معاك كل الفلوس ديه و عايز تسافر اتفضل سافر براحتك
انما لو مش معاك يبقي حضرتك تقعد و تحمد ربنا ع اي حال و تحاول انك تطور نفسك
هي ديه وجهة نظري

و بالنسبة المجالات بتاعت الدراسة المكلفة اللي هي زي ما تقول كده الشهادة المحترمة برة
حقوق او هندسة او طب

بالنسبة التفضيل صدقني مهما حصل هتفضل برده غير اصلي الجنسية و اعطاء الجنسية مش بالسهولة ديه و في ناس بتدفع ملايين عشان ياخدوا الجنسية برة و بعد ما بياخدوها في منهم بيندم
ع العكس ان كتيير بيتمنوا ياخدوا الجنسية المصرية و مش قادرين

و بالنسبة حكاية المرتب اللي بتضرب ديه لا انسي مش زي ما انت متخيل لو كان كده مكنش في ناس كتيير مش لاقيين ياكلوا هناك او بيشتغلوا بالشغلتين و التلاتة و بعدد الساعات عشان يقدروا يعيشوا
و ع فكرة عشان تبقي عارف حاجة بالنسبة الشغل برة لأن واضح انك مشتغلش برة قبل كده
برة مش بيهمهم في الشغل جنسيتك ايه ؟؟ المهم عندهم الكفائة و الامانة و الشغل بضمير
ليه بتقول بيشيلوا الاجنبي اكتر من المصري لأنهم عارفين المصريين اكل و مرعة و قلة صنعة مش عايزين يشتغلوا و بيتنكوا و و عايزين من الاخر كل حاجة تجيلهم لحد عندهم
ع عكس واحد اجنبي عارفين انهم بيشتغلوا صح وقت الشغل شغل مفيش تفاهم

يعني العيب مش في جنسيتك
العيب في الناس

مع كامل احترامي لرأيكم اللي هو في الاساس مختلف, و وجهة نظركم إلا ان في جزء
من كلامكم غير دقيق, و البعض منه مبالغ فيه شوية...و اسمحولي اعقب على بعض النقاط

أولا: مرتبك في اي دولة بره مش بيتضرب في 10 ولا حتى 5 اضعاف خاااالص !!!

مرتبك بيكون بردو مكفيك و على القد بالظبط, و احتمال ضعيف تحوش منه جزء و هيكون بسيط

ماتحسبش انت بتاخد كام بالمصري, احسب انت هتاخد كام هناك مقارنة بمستوى المعيشة و الاسعار هناك..

ثانياً: مش صعب انك تاخد الجنسية بتاعة دولة زي كندا او استراليا او نيوزيلاندا مثلاً,
لكن مش سهل بردو, بس الموضوع مش بيوصل لملايين و الكلام ده خالص...

ثالثاً: فعلاً في ناس بتسافر بره و بتلاقي ان الموضوع مش زي ما كانوا متصورينه و متخيليين
و بيحسوا انهم مش عارفيين يتأقلموا على الوضع الجديد, و بيرجعوا تاني فعلاً بردو,
بس عمر ما حد خد جنسية تانيه مع المصرية و ندم اطلاااااااااقاً !!!!!! عمرها ما حصلت

اللي بيروح هناك و بيرجع لانه مش قادر يكمل بيكون لاسباب كتير منها مثلاً...
- مش قادر يتأقلم هو او اسرته مع المجتمع الجديد و الوضع الجديد, و في ناس كتير كده
- ممكن يكون مش مستحمل يتعب شوية علشان يوصل لهدفه و مش قادر يصبر و زهق بسرعة
- ممكن يكون وهم نفسه قبل ما يسافر انه رايح مكان هيديله كل اول شهر شوال فلوس
من اول يوم يروح فيه هناك, و هو بيشتغل بأقل مجهود, و كل احلامه هتتحقق في لحظه !!

كل دي اسباب و غيرها كتييييير ممكن تخلي اي شخص يسافر بلد اوروبي و يرجع تاني...

رابعاً: مافيش فعلاً تمييز بين الجنسيات في الشغل في بعض دول اوروبا او كندا,
لكن في تمييز شوية في استراليا, بس امكانياتك و مؤهلاتك هي اللي تخليك أفضل من اي شخص.

موضوع انك مصري و الناس عارفة ان المصريين مش بتوع شغل, الكلام ده مع احترامي
غير حقيقي بالمره, و بالعكس, معروف ان المصري بيتطحن علشان لقمة عيشه و شغله,
و بره مصر النوع ده من التمييز او الثقافة مش موجود ابدااا إلا نادراً في بعض الدول
زي استراليا مثلاً, لكن التمييز مش في مصري و الماني و ياباني... التمييز بيكون
بلون البشرة, يعني لو حضرتك مش ابيض و تكاد تكون شفاف زيهم, يبقى انت مش منهم و مش هتكون...

خامساً: كل دول العااااااالم فيها نسبة بطالة, و فيها متسولين و شحاتين طبعاً... بس بنسبة كام % ؟؟

لما تسافر دولة نسبة البطالة فيها 5% مثلاً, هل تتساوى مع دولة نسبة البطالة فيها 30% !!؟؟؟؟

فرصة انك تلاقي شغل في بلد نسبة البطالة فيها 5%, زي اللي نسبة البطالة فيها 30% ؟؟؟؟؟؟

يبقى نسبة البطالة مقياس مهم, و كده كده في كل دول العالم في اللي مش لقيين ياكلوا
و اللي بيشحتوا و اللي عاطلين عن العمل كمان, بس كام واحد !!؟؟ هو ده اللي يفرق

سادساً: السفر لدولة زي كندا مثلاً, حضرتك بتاخد حمميزات كتير بعيداً عن الجنسية,
و على سبيل المثال... مجتمع متحضر, متعدد الثقافات, مستوى التعليم فيه عالي جداا,
مستوى المعيشة فيه من اعلى دول العالم, الجالية المصرية هناك ما شاء الله ضخمة جدااا,
الاسلام فيه منتشر و بشكل واضح جدااا و قوي, مجتمع بيحترم حرية العقيدة و بيحترم بعضه,
هتربي اولادك في مناخ نظيف و انت كمان هتعيش في مناخ نظيف و مستوى راقي,
ليك اعانة بطالة, ليك تأمين صحي, ليك معاش, تعليم مدعم و ببلاش حتى مرحلة الجامعة...

كل دي مميزات... في المقابل انت مش في بلدك الاصلية, مش وسط اهلك و عائلتك,
مطلوب منك تتأقلم مع حياة جديدة كلياً في كل شئ و ده بيكون صعب على ناس كتير,
مطلوب منك تتأقلم على جو مختلف عن الجو المصري (مش في كل الدول طبعاً),
هتتعب شوية علشان تلاقي شغل في مجالك, و هتتعب اكتر علشان تعادل شهادتك لان شهادتنا
ماتسواش 3 قروش بره مصر, و لا جوه مصر والله, هتحتاج 3-4 سنين علشان تاخد الجنسية,
و هتدفع ضرائب على كل شئ (مش في كل الدول بردو و النسبة مش واحدة) بس طبعاً
بتاخد مرتب آدمي محترم مش هتفرق معاك انك تدفع مقابله ضرائب عليه او على اي شئ.


في الآخر... الهجرة لاي دولة اجنبية مش بمثابة السفر للجنة, لكن افضل من الوضع الحالي هنا...

لازم اللي بيفكر يسافر او يهاجر, يفكر في انه هياخد مميزات و معاهم عيوب بردو,
و مافيش دولة في العالم كله تديلك مميزات فقط, و طبيعة الشخص نفسه و عقليته تفرق كتير...

ده رأي بشكل عام, و اتمنى اني اكون وضحت وجهة نظري بشكل بسيط...

تحيــاتي...