الوكيل الجديد ياباشا نازل بنفس الاسعارالسلام عليكم ايها الاخوة الكرام
أولا أنا أعتذر عن مشاركاتى القليله فى هذا المنتدى العظيم .
بعد اذنكم انا عايز احكيلكم حكايتى مع العربية الشارك
بصراحة شديدة بعد ما قرأتة فى هذا المنتدى العظيم من الاخوة الاعضاء ومقدار المدح الذى يمدحون بة السيارة الشارك (وأنا معجب بيها من فتره والله ) فقد استقر رأيي عليها بعد طول بحث وسط الكورى واليابانى الاخر .
من مايو 2010 وانا نفسي اجيب شارك مانيوال , سألت عند الرواس قالولى موجود 2009 ب 122 ألف (وقتها) , قلتله طيب 2010 مش موجودة ؟, قاللى لأ , بينى وبينكم بالنسبالى دى أول عربية زيرو هجيبها فقلت انا مش عايز اجيب واحده مركونة سنتين فى الشمس , أنا هصبر شويه , وبالفعل فى 31 يوليو اللى فات كان نهاية تعاقد ميتسوبيشى مع الرواس , قلت كويس هييجى بقى وكيل جديد يحط أسعار معقولة , استنيت لغاية 13-9 لما أعلنوا أن الملا والخرافى هما اللى بقوا الوكيل الجديد لميتسوبيشى فى مصر , قلت خيييير , فضلت مستنى انى اسمع حاجه عنهم او اشوف اعلان او اى حاجه , أبدا . بعدين حصلت الثورة والدنيا اتقلبت , وبعدها بشهرين حصل زلزال اليابان وتسونامى والدنيا اتبهدلت فى اليابان , وبعدين مفيش شهر والخرافى توفاة الله , وأنا لسة صابر. لغاية لما لقيت من شهر ونص كدة هنا فى المنتدى أن التوكيل عامل مشكله مع الجمارك ومحصلش افراج جمركى وحاجات كده , بعدها بأسبوعين الموضوع اتحل وتم الافراج الجمركى , طلعت العربيات الموجودة بومة مش شارك , قلت ماشي شوية وهيجيبوا شارك .
ولما يجيبوا الشارك يجيبوها بنفس ال160 الف بتاعة الرواس ؟!؟!؟!؟!؟!؟!؟ , طب الرواس كان منزلها ب 158!!!
بعد اذن الاعضاء الكرام لو حد عندة معلومة عن الشارك المانيوال هتنزل بكام عشان اعرف استناها ولا اجيب حاجه تانيه , ياريت يفيدنا أفادنا وأفادكم الله
بينى وبينكم أنا معايا بيجو 505 بسم الله ماشاء الله لا قوة الا بالله ما بتشتكيش ودة برضه اللى خلانى مش مستعجل اوى على العربية الجديدة.
أظن أن ممكن يكون فى برضه أعضاء عندهم نفس المشكله.
اتمنى أن يكون حد عندة اجابة لهذة التساؤلات
ولو الشارك غالية او مش باين انها هتنزل يا ريت حد من الاخوة ينصحنى اجيب ايه
أعتذر للاطاله وتقبلوا تحياتى
يعني الشارك 2009 شوف كانت بكام هتلاقى نفس السعر فى الوكيل الجديد بس 2011
الهاي لاين كانت ب 158 2009 و ال 2011 ب 160
المفضلات