الموضوع: مصطفى سعد نازل القاهره يامينز

السلام عليكم ورحمة الله وبركاته

مع الاعتذار للفنان سعيد صالح لاقتباس مقولتة الشهيره فى مسرحية مدرسة المشاغبين بدون اذنه

ان شاء الله نازل القاهره يوم الحد 24 - 7
اختى عندها تدريب فى الشركة بتاعتها فى المقر الرئيسى فى القاهره وبما انى من المؤيدين لنظرية ان ضل راجل ولا ضل حيطه قولت انزل معاها اوصلها بدل ماتروح لوحدها فى القطر وافضل قلقان عليها

التدريب لمدة يوم واحد من الساعه 10 صباحا لغاية تقريبا الساعه 5 مساء يعنى مدة انتظار 7 ساعات كاملين حيبقوا اطول 7 ساعات فى عمرى لانى مابحبش الانتظار ابدا بس اعمل ايه بقى

مكان الشركه فى مدينة نصر عند دار الدفاع الجوى
انا اشتغلت فى القاهره فتره وكنت ساكن فى شارع الطيران والمكتب امام سيتى ستارز فى عمارات ميلسا عند مسجد القوات المسلحه الجديد يعنى عارف المنطقه وفاكرها بس مش اوى لان الموضوع ده من 7 سنين

عاوز اعرف ازاى اوصل لدار الدفاع الجوى لانى لما كنت باسافر بالعربيه زمان كنت باخد الزراعى واطلع تانى طلعه للدائرى لغاية لما اوصل لنفق السلام وادخل يمين وامشى طوالى وتقريبا لغاية الكليه الحربيه بس بعد كده الميمورى خلصت ومش فاكر حاجه من السكه فهل لغاية الكليه الحربيه انا صح ولا كمان فى اخر الطريق مش حلاقى الكليه الحربيه والاقيها اتنقلت وبعد كده ازاى اوصل دار الدفاع الجوى لانى مش فاكر حاجه من السكه

وطلب تانى عاوز مكان اقضى فيه السبع ساعات المملين دول يكون قريب من شركتها فمش عارف اروح فين
انا مدخلتش سيتى ستارز قبل كده ايه ظروفه
ايه اخبار الكافتيريات وخلافه و موجود نت واير ليس علشان لو حبيت اخد اللاب توب
ايه اخبار محلات اللبس علشان لو بالمره حبيت اشترى تيشيرت بولو ولا بنطلون جينز ولا جزمه شمواه والاسعار عامله ايه

ولا فيه مكان تانى احسن منه اروحه

معلشى انا حاتعبكم معايا بس عاوز حد يحطلى خريطه اقضى بيها اليوم بدون زهق او تعب لانى ناعى هم المشوار جدا ونفسى يتلغى لان مشوار القاهره اساسا دمه تقيل على قلبى اوى خصوصا فى الحر ده فمش عاوز اتفرهد لانى لسه حارجع سايق 3 ساعات على الزراعى وقرفه كمان ده غير انها عاوزه تروح العباسيه تقابل واحده صاحبتها قبل ما نرجع ان شاء الله يعنى يوم مكمل لغاية 12 منتصف الليل

انا غالبا حاركن العربيه عند الشركه لان هناك تقريبا فيه باركنج وامن وحاخد تاكسى اروح بيه اى مكان اقضى فيه اليوم بدل ماخد العربيه معايا فى حته احتاس فى مكان اركنها فيه وتتسرق منها حاجه او تتسرق كلها وربنا يستر

اخيرا تحياتى ليكم وشكرا مقدما

ايه ياجماعه انام 4 ساعات وارجع ملقيش مشاركه واحده فى الموضوع تعرفنى السكه ايه حتى
مكنشى العشم يارجالة نايل موتورز