صباح الفل علي اجمد منتدى في الدنيا.
انا معايا جين 2 موديل 2007 ماشيه 111000 كيلو.
اول مشكلة هي ان في صوت بيحصل لما اخد نقرة او حفرة صغيرة و هو صوت "طك" جامد بيحصل ورا بس قفلت الشباك و الصوت لسه موجود كانه من جوا مش عارف. الصوت بيحصل في الحفر بس لكن لو لبست مطب علي سرعة مفيش حاجه تحصل يعني لما العجله تقع لتحت و تطلع.
في ناس قالولي ده من المساعدين الخلفية. في ناس قالولي ده من السوست يا مان. في ناس قالولي لأ يا معلم الصوت ده بيطلع من الكنبه الخلفيه و دي مشكله بتحصل ساعات في الجين 2. انا مش فاهم حاجة.
و انا عندي سؤال تاني, ازاي اعرف العفشة انتهت ولا لأ.
تاني مشكله و هي صوت تكتكه في العجلة اللي ادام علي اليمين. الصوت بيحصل علي سرعة هاديه و مش بسمعه غير لما اقرب من الرصيف عشان الصوت يرد في الرصيف و اسمعه (تك تك تك تك تك تك تك تك تك).
ثالث مشكله و هي الفرامل. انا معرفش اذا كانت الفرامل حلوة ولا لأ بس بأحس انها ضعيفة و ساعات بحالات, ساعات ضعيفة و ساعات قوية فايه الحل؟
رابع مشكله و هي الزراير اللي في الدركسيون, بيعلقوا علي بعض يعني تيجي تدوس mute يقوم يعلي الصوت, تيجي تغير المود يغير الاغنية, تيجي توطي يعمل mute و كل زراير الدركسيون علي الحال ده.
خامس مشكلة. السينسور الورا علي اليمين معلق, يعني انا علطول سامع صفارة و انا جايب مرشدير بس صفارة متقطعة درجة ثانيا بس لما اوصل الدرجه الثالثة فيصفر درجه ثالثة. هل ممكن يتصلح؟ هل ممكن اشتري واحد تاني ولا لازم الطقم مع بعضه؟ و بكام؟
شكرا جدا و ارجو المساعدة.
المفضلات