الموضوع: حسبي الله ونعم الوكيل في سونستا موتورز

اصدقائي و اخواني احب ان احكي لكم تجربتي في التعامل مع سونستا منذ أكثر من سنتين ونصف، حتى يستفيد منها من يفكر في التعامل معهم و يحتاط و ذلك لوجه الله تعالى.
اولا انا اشتريت مازدا 3 2009 هاي لاين بضمان سونستا وده كان في اول سنة 2009 يعني من سنتين ونص، الحمد لله العربية ليس لدي اي ملاحظات جوهرية عليها فهي سيارة أكثر من رائعة.
- لما اشتريت العربية طبعا لازم آخد معاها 2 مفتاح بصمة (2 كارت + 2 مفتاح شفرة)، أخدت منهم مفتاح شفرة واحد، و انا بشتري العربية قالولي المفتاح التاني اصله اتسرق في الجمارك، و احنا طلبنا مفتاح مخصوص لعربيتك و هيوصل بعد شهر. و للأسف محبتش أعمل مشاكل واخدت كلامهم ثقة، و حبيت اخلي علاقتي كويسة معاهم وتعاملت معاهم بكل احترام، و قعدت أتابع معاهم كل شوية، و للأسف مماطلة ليس لها اي داع، و الى الآن مفيش جديد. لدرجة اني طلبت منهم اي مفتاح شفرة من مخزن قطع الغيار عندهم على حسابي و هم يعرفوله الشفرة وبرضه مفيش فايدة. قالولي مفيش عندهم مفاتيح اصلا.
- المهم من حوالي شهر الكرت البصمة باظ و مش بيشتغل مع اني غيرتله البطارية و برضه مفيش فايدة. طبعا رجعت لهم و قالولي اه طبعا ده في الضمان و احنا هنصلحه، و اخدوا رقم الشاسيه بتاع العربية وقالولي روح لمركز الصيانة وهم هيصلحوه. خبطت مشوار لمركز "يس" و هناك قالولي احنا معندناش فكرة عن الموضوع ده ، و الكارت لازم يتصلح عند سونستا نفسهم. رحت راجع تاني لسونستا وقولتلهم كده، قالولي اصل لازم نكلم مازدا اليابان و نفتح خط اتصال معاهم على الانترنت عشان يدونا شفرة العربية ، و احنا بعتنالهم و استنا مننا تليفون. قعدت اتابع معاهم من اكتر من شهر و برضه مماطلة كالعادة، و "حاضر يا باشا هنتصل بيك خلال يومين و تجيب العربية عشان نصلح الكرت"، وطبعا ولا اي حاجة حصلت. وطبعا أنا متاكد ان مازدا اليابان مش بتتعامل الا مع التوكيل المعتمد في مصر وهو غبور. يعني كلام سونستا كلام فاضي و مضيعة للوقت.
- على طول بعمل صيانة للعربية في مركز الخدمة بتاع سونست " يس"، و لا عمري رحت لميكانيكي أو كهربائي، اكتشفت الآتي من تعاملي معاهم:
- رفضهم التام لتغيير اي حاجة على حسابهم في فترة الضمان، مثال الطنابير عملت ريجة وهي في الضمان (20000 كيلو) ورفضوا يغيروها ، دول قالولي انها كويسة، و في الصيانة اللي بعدها قالولي دي لازم تتغير عشان دي بايظة خالص، و ازاي انت ماشي بيها كل ده وهي كده!!!!!!!!.
- بالنسبة لجداول الصيانة بتاعتهم: بيغيروا كل حاجة في صيانة العربية قبل معادها بحوالي 20000 كيلو أو اكتر، يعني مثلا : مياه الردياتير بيغيروها على 40 الف مع انها المفروض تقعد 100000 كيلو. سير المجموعة بيغيروه على 50 الف مع انه المفروض يتغير على 70 الف. زيت الفتيس بيغيروه كل 40 الف مع انه المفروض يقعد 60 الف او اكثر.
- في حالة تغيير قطع غيار مثلا بوجيهات او فلاتر مش بيدوك القطع القديمة عشان على الأقل تطمن انهم عملوا الصيانة كما يجب.
- مرة وانا بحاسب على الصيانة، لقيت الفاتورة مكتوب فيها تغيير تيل فرامل، مع ان المهندس أثناء الصيانة قاللي ان التيل كويس و مش محتاج تغيير. رجعت للمهندس تاني: قاللي "استنى كده لما افتكر دي اي عربية؟ اصل عندنا عربيات كتير النهارده.... اه افتكرت اصلي لما كشفت على التيل مرة تانية لقيته محتاج تغيير" !!!!!!!.
طبعا ناهيك عن أسلوب التعامل الغير راقي بالمرة و الذي يتضح في اسلوب ردهم على العميل و طريقة الكلام من موظفي سونستا موتورز.
هذه فقط بعض الأمثلة التي أتذكرها لتجربتي معهم، وحسبي الله ونعم الوكيل.

المشاركة الأصلية كتبت بواسطة emadzoo

مش بعيدة على أى وكيل سيارات انه يعمل كدة فى مصرنا المسلوبة

غبور شخصيا أكيد ممكن يعمل كدة.... دا غير سواقة الميكروباصات اللي بيسوقها اللي شغالين في المعارض دي للعربيات الزيرو وكأنها عربيات .....هم

الأمانة أصبحت عملة نادرة. نسأل الله العافية.