استشاره فى صيانه 40 الف لانسر بومه 2008 ( عاجل جدا ارجوكم )

السلام عليكم ورحمه الله وبركاته

يا جماعه ارجوكم انا محتاج مساعده فى صيانه الاربعين الف لانى انا عملت فيها فالح وعملت صيانه بره التوكيل وقولت اوفر وكانت النتجه ان عملت صيانه الاربعين الف وكمان صيانة 80 الف :I_angr1[1]::I_angr1[1]:الموضوع ان العربيه عندى ماشيه 38الف كيلو موديل 2008 وذهبت مع احد زملائى فى الشغل عن ميكانيكى يعرفه كل الناس بتقول كويس...

اولا :- جدول الصيانه من التوكيل بيقول تغير فلاتر وزيوت وتيل فرامل - بوجيهات وشكرا توكيل ميتسوبيشى واللينك دى فيه جدول الصيانه .

http://www.nilemotors.net/Nile/46165-a.html

ولما انا قولت على الحاجات اللى المفروض تتغير قالى لا لازم السيور تتغير عشان العربيه موديل 2008 قولت بس التوكيل بيقول 80الف دى لسه كثير اوى على انى اغيرها قال السير ليه عمر افتراضى ثلاثه سنوات او 80 الف ايهما اقرب وبعدين غير السير تمشى مطمن على العربيه سير التقسيمه روح العربيه بدل ما يتقطع وساعتها راح الموتور وبعدين دى بكلام فاضى يعنى !!!! قولتله طيب على بركة الله غيره وبعد شوايه لاقيت السيور كلها بتغير 1- سير باور وتكيف - سير دينامو - سير تقسيمه - بلى شداد تقسيمه - مش كده وبس العفشه المفروض دى كمان كان عايز يغير مقاصات العربيه لولا انا بصراحه اتخنقت منه وقولته كفايه كده عربيه بتمشى يومين فى الاسبوع وماشيه 38الف عايز تغير مقاصات وجلب كثر اوى كده قالى يا باشا العربيه مش بالعداد العربيه حسب المشى بصراحه انا عارف ماشى كويس جدا ورفض انى اغير المقاصات وهو غير الجلب واخيرا ما تم تغيره فى العربيه بالاسعار .

1- سير باور وتكيف 55 جنيه
2- سير دينامو 45 جنيه
3- سير تقسيمه 230 جنيه
4- رولمان بلى شداد تقسيمه 225 جنيه
5- فلتر هواء 125 جنيه
6- فلتر تكيف 115 جنيه
7- فلتر بنزين 330 جنيه
8- مصفه بنزين 75 جنيه
9- طقم بوجيهات 70 جنيه
10- تيل فرامل اندونسى 125 جنيه
11- اسبراى معرفش دى بتاع ايه 35 جنيه
12- جلب مقص 120 جنيه
13- كبس جلب مقص 40 جنيه

الاجمالى 1600 جنيه والمصناعيه 300 جنيه دى عشان خاطرك يا باشا انا باخد 400 بس طبعا دى اول وبعمل معاك الواجب !!!!!

معلش انا طولت اوى بس بصراحه انا حاسس انى شايط منه لانى اتصلت بالمهندس طارق زويل قالى لا ماتغيرش السير وسألت اكثر من مهندس ميكانيكا قالى السير يتم تغير زى ما التوكيل قال او لو العربيه مرفوعه ولا تستخدم ساعتها يتم تغير السيور للحفاظ على السياره

واخيرا عاوز رئيكم فى الموضوع هل السيور فى الانسر بتتغير على 40الف هى والمقصات والجلب وله الراجل دى بيفتح شغل وخلاص ....

معلهش يا باشا أنت سورى يعنى إتضحك عليك
لأن سير التقسيمة بيتغير على 100000 كم زى الكاتالوج و فى التوكيل بيغيروه على 80000 كم و بيتغير معاه السيور (التكييف و الباور + الدينامو) بالإضافة للشدادات
أما المقصات و الجلب فدى بقى ما بتتغيرش غير حسب حالتها مش بجدول زى ما قال لك
أنت كان المفروض طالما نويت تعمل الصيانة برة التوكيل كنت تعرف إيه اللى بيتعمل بالضبط فى صيانة الأربعين ألف و كنت تشترى بنفسك قطع الغيار المطلوبة و تروح بيها للميكانيكى و تقول له غير لى دول عشان ما يتفذلكش عليك و لما يقولك المفروض تغير كذا و كذا تقول له غير الحاجات اللى أنا جايبهالك و لو فيه حاجة أنا محتاج أغيرها هبقى أجيبهالك مرة تانية عشان ما يشتغلكش
معلهش ماحدش بيتعلم ببلاش

اقتباس:

---

المشاركة الأصلية كتبت بواسطة walidhassan

معلهش يا باشا أنت سورى يعنى إتضحك عليك
لأن سير التقسيمة بيتغير على 100000 كم زى الكاتالوج و فى التوكيل بيغيروه على 80000 كم و بيتغير معاه السيور (التكييف و الباور + الدينامو) بالإضافة للشدادات
أما المقصات و الجلب فدى بقى ما بتتغيرش غير حسب حالتها مش بجدول زى ما قال لك
أنت كان المفروض طالما نويت تعمل الصيانة برة التوكيل كنت تعرف إيه اللى بيتعمل بالضبط فى صيانة الأربعين ألف و كنت تشترى بنفسك قطع الغيار المطلوبة و تروح بيها للميكانيكى و تقول له غير لى دول عشان ما يتفذلكش عليك و لما يقولك المفروض تغير كذا و كذا تقول له غير الحاجات اللى أنا جايبهالك و لو فيه حاجة أنا محتاج أغيرها هبقى أجيبهالك مرة تانية عشان ما يشتغلكش
معلهش ماحدش بيتعلم ببلاش

---

اولا : شكرا لهتمام حضرتك

ثانيا : انا كنت عارف ايه اللى حغيره لان المهندس طارق زويل عامل موضوع اسمه اسعار الصيانات الدوريه داخل التوكيل وكان معايا ورقه فيها صيانة الاربعين ...

ولكن لما قال ان السير ليه عمر افتراضى بصراحه ما كنتش متأكد من المعلومه ولما رجعت البيت اتصلت بالتوكيل قالى السير يتغير عند 80 الف وساعتها عرفت انه بيفتح لنفسه شغل وخلاص وعشان كده كنت عاوز راى الاعضاء فى الموضوع وشكرا مره اخرى لحضرتك ...

قدر الله و ماشاء فعل
مش يمكن لو مغيرتش السير ممكن ع حظك كان يتقطع و انت ماشى؟؟؟؟ و ع العموم
و عسى ان تكرهو شيئا وهو خير لكم و عسى ان تحبو شيئا وهو شر لكم
المهم انك تستمتع بعربيتك و الصيانة و الحمد لله ع كدة

اقتباس:

---

المشاركة الأصلية كتبت بواسطة M.Alaa92

قدر الله و ماشاء فعل
مش يمكن لو مغيرتش السير ممكن ع حظك كان يتقطع و انت ماشى؟؟؟؟ و ع العموم
و عسى ان تكرهو شيئا وهو خير لكم و عسى ان تحبو شيئا وهو شر لكم
المهم انك تستمتع بعربيتك و الصيانة و الحمد لله ع كدة

---

الحمد لله على كل شىء طبعا وانا عامل الموضوع عشان اتأكد من موضع السيور وابقى عارف مواعيد تغيرها لان انا مش مقتنع ان التوكيل يقول يتم تغيرها على 80 الف وحضرت الميكانيكى يقول لا تتغير على 40 الف عشان عمرها الافتراضى انتهى دى كده اشتغاله واضحه جدا جدا :khd:

افتكر ان الكلام فى الموضوع ده مالهوش لازمه خصوصا ان الموضوع تم و الحاجه ركبت
بعد كده ياريت اللى عايز يعمل حاجه يسأل قبلها مش بعدها

انا مش عارف ايه موضوع ال 80,000 كم لان كل المناول بتاعة اللانسر بتقول على 60,000 ميل الى هى تساوى تقريبا 97,000 كم
و المناول فى كندا بتقول 100,000 كم
برضه شاف المانوال و بيقول 100,000 كم walidhassanالاستاذ
و لو افترضنا ان ال 80 بدل ال 100 عشان الزحمه و الوقفه الكتير
فخصم 20% من عمر السير علشان الموتور شغال بدون احمال ده يعتبر كتير
عامة انا افضل الكشف على السيور و البلى و الشداد على فتره متقاربه لان ظروف التشغيل مش ثابته

معلش يا أستاذ أحمد مايقعش إلا الشاطر بس ياريت تقول للناس عليه علشان يبطل فهلوه و يعرف إن طريقة الشغل دي ممكن تخسره زباين على المدى الطويل و يبقى عبره لغيره لأن الطريقة دي للأسف أصبحت هي العادي في السوق اليومين دول

قدر الله وماشاء الله فعل
حسبنا الله ونعم الوكيل في كل غشاش
يدفعك قد كده بيفتح لنفسه شغل ويقولك مهو كله في عربيتك يا بيه هو انا خدت حاجة من قطع الغيار ده في جيبي !!!!!
معلش خد حذرك المرة الجاية
بس هو اسم الميكانيكي ده ايه ؟ عشان الناس تاخد حذرها والمفروض تعمل تحذير في الموضوع اللي على العام.

اقتباس:

---

المشاركة الأصلية كتبت بواسطة l0new0lf

افتكر ان الكلام فى الموضوع ده مالهوش لازمه خصوصا ان الموضوع تم و الحاجه ركبت
بعد كده ياريت اللى عايز يعمل حاجه يسأل قبلها مش بعدها

---

لا يا باشا تفرق كتير لان ببساطه لو هو غلطان انا مش حتعامل معاه تانى ولو انا غلطان وهو كلامه صح يبقى انا اللى غلطان ومش فاهم ...

وعشان كده انا عايز اعرف هل السير فعلا لازم يتغير بعد سنتين ونصف او 80 الف ايهما اقرب ؟

هو كلامه غلط
و حضرتك غلطان انك سمعت كلامه
الاهم من كل ده انك تكون ركبت قطع غيار مش مضروبه

اقتباس:

---

المشاركة الأصلية كتبت بواسطة l0new0lf

هو كلامه غلط
و حضرتك غلطان انك سمعت كلامه
الاهم من كل ده انك تكون ركبت قطع غيار مش مضروبه

---

انا واثق ان قطع الغيار اصلى ما عدا التيل كان تقريبا 125 جنيه وهو قالى دى احسن من اليابانى اللى موجود فى السوق لان ماعداش على اليابان وانه مضروب وانا افضل التايوانى والحمد لله من ساعتها وهو بيصفر والفرامل زى الزفت والصبح لما اشغل العربيه فى صور بيظهر لحد ما العربيه تسخن وبعدها يروح واعتقد انه صوت سير التقسيمة من الاخر انا غلطان انى روحت صيانة الاربعين مهمه وكان لازم تكون عند انا اعرفه كويس او فى التوكيل وان شاء الله غلطه ومش حتتكرر ....

موضوع الفرامل هتاخد شويه على ما التيل يطبع على الطنابير
بالنسبه للصفاره خليه يفك التيل و يموت كل الحواف اللى فيه و هتروح باذن الله
بالنسبه لصفاره السيور اتاكد الاول ان سيور الدينامو و الباور و التكييف مشدودين بالضبط
لا مشدودين جامد ولا راخيين جامد

أستاذ أحمد
متتعاملش مع الميكانيكي ده تاني
مفيش عربيه في الدنيا (ما عدا بعض الصيني ) بتغير سيور و لا سير كتينه علي 40000
أضف كمان إن سير الكاتينه لو أتقطع إن قدر الله له ذلك ملوش أي تأثير علي العربيه لأن الموتور بيفصل بناء علي توجيه من حساسات الكامات للكمبيوتر بقطع الميه و النور عن العربيه و بكده يبقي هو يا إما كذاب يا إما مش عارف شئ
و مفيش مقصات أو جلب بتتغير بكيلو متر محدد بتتغير بحالة المقص أو الجلبه
أخيرا مصنعيته عاليه جدا جدا و مبالغ فيها مين ده اللي في مصر نص يومه بـ400 جنيه دا لو جواهرجي مش هايبقي كده

ده ميكانيكي غير آمين لحين أن تأتيه الهدايه من الله عز وجل نتمني إن حضرتك مترحلوش تاني

و أخيرا أنا ما أعرفش توكيل متسوبيشي اخباره أيه أوي لكن مهما كان هايكون أفضل مليون مره من أي ميكانيكي و المصنعيه هاتكون قريبه منه كمان
و أدي العيش لخبازه و لو هاياكل نصه

اقتباس:

---

المشاركة الأصلية كتبت بواسطة HOSSAM99

أضف كمان إن سير الكاتينه لو أتقطع إن قدر الله له ذلك ملوش أي تأثير علي العربيه

---

اشرح لك تاثيره
interference motorمواتير المتسوبيشى حاجه اسمها
يعنى الفراغ الى بيتحرك فيه الصباب و البستم مشترك
يعنى اول ما سير الكاتينه يقطع البساتم هتخبط فى الصبابات

يعنى الضرر ممكن يتراوح بين (صباب معووج و تغيير دلايل و قواعد و صبابات و بساتم مكسوره) و ان الضرر يكون كبير انك تضطر تغير مكنه كامله لان تكلفتها هتكون ارخص من تكلفه و كفاءه اصلاح المكنه اللى اتقطع سير الكاتينه فيها

انا الحمد لله لقيت كتيب الخدمه و مكتوب فيه يتم تغير سير التقسيمه على 100 الف كيلو ومش محدد فيه عمر للسير وذهيت لصديقى وقولتله على الحكايه والرجل محترم جدا بصراحه قالى صور الصفحه وانا حتصل بيه وكده انا اتأكدة ان انا اللى صح وهو غلط .


بعد مرور حوالى ساعه اتصل زميلى فى الشغل وقالى ( نكته ) وهيه ان البيه الميكانيكى قاله ان كتيب الصيانه ده مش بتاع الموديل 2008 وان الناس البروفيشنال اللى فاهمه بتشترى قطع الغيار بالكودوانا كود عربيتى 4g18e طبعا انا زهقت من كتر الفتى بتاع الرجل ده وعشان كده قررت انى مش حروحله تانى نهائى ...

ايوه ال 1600 كودها
4g18
اختصار E و ال
economic

اسباب تلف السيور
1- ساعات و ظروف التشغيل
2- السوائل و الزيوت ( يعنى الزيت و الاحماض لما بتيجى على السيور بتبوظها) و الغسيل بالجاز
3- الاحتكاك اثناء التشغيل بسبب التركيب الغلط
4- بلى خشن او بايظ
5-عيب صناعه (و ده انا شفته بنفسى كان مقطوع و متخيط عند سنه من السنون و اكتشفته لانى بعد السنون كل مره بالرغم من انى عارف انهم 144 و ان السير بيكون مكتوب عليه عدد السنون)

و انت كان كل اللى عندك من الاسباب دى ساعات التشغيل و انت يادوب كنت عامل 40% منها

الميكانيكى غلط
هتوصل لايه بعد كده؟
الشغل تم
و الموضوع ده خلص
ركز فى المشاكل اللى عندك و تخليه او تخلى واحد غيره يعمل اللى انا كاتبه فى المشاركه رقم 13

اقتباس:

---

المشاركة الأصلية كتبت بواسطة l0new0lf

ايوه ال 1600 كودها
4g18
اختصار e و ال
economic

اسباب تلف السيور
1- ساعات و ظروف التشغيل
2- السوائل و الزيوت ( يعنى الزيت و الاحماض لما بتيجى على السيور بتبوظها) و الغسيل بالجاز
3- الاحتكاك اثناء التشغيل بسبب التركيب الغلط
4- بلى خشن او بايظ
5-عيب صناعه (و ده انا شفته بنفسى كان مقطوع و متخيط عند سنه من السنون و اكتشفته لانى بعد السنون كل مره بالرغم من انى عارف انهم 144 و ان السير بيكون مكتوب عليه عدد السنون)

و انت كان كل اللى عندك من الاسباب دى ساعات التشغيل و انت يادوب كنت عامل 40% منها

الميكانيكى غلط
هتوصل لايه بعد كده؟
الشغل تم
و الموضوع ده خلص
ركز فى المشاكل اللى عندك و تخليه او تخلى واحد غيره يعمل اللى انا كاتبه فى المشاركه رقم 13

---

انا قررت انى ارجع التوكيل تانى واكشف على العربيه واعمل الازم فيها وشكرا ليك ..

اقتباس:

---

المشاركة الأصلية كتبت بواسطة hossam99

أستاذ أحمد
متتعاملش مع الميكانيكي ده تاني
مفيش عربيه في الدنيا (ما عدا بعض الصيني ) بتغير سيور و لا سير كتينه علي 40000
أضف كمان إن سير الكاتينه لو أتقطع إن قدر الله له ذلك ملوش أي تأثير علي العربيه لأن الموتور بيفصل بناء علي توجيه من حساسات الكامات للكمبيوتر بقطع الميه و النور عن العربيه و بكده يبقي هو يا إما كذاب يا إما مش عارف شئ
و مفيش مقصات أو جلب بتتغير بكيلو متر محدد بتتغير بحالة المقص أو الجلبه
أخيرا مصنعيته عاليه جدا جدا و مبالغ فيها مين ده اللي في مصر نص يومه بـ400 جنيه دا لو جواهرجي مش هايبقي كده

ده ميكانيكي غير آمين لحين أن تأتيه الهدايه من الله عز وجل نتمني إن حضرتك مترحلوش تاني

و أخيرا أنا ما أعرفش توكيل متسوبيشي اخباره أيه أوي لكن مهما كان هايكون أفضل مليون مره من أي ميكانيكي و المصنعيه هاتكون قريبه منه كمان
و أدي العيش لخبازه و لو هاياكل نصه

---

شكرا يا باشا على المشاركه وانا ان شاء الله مش حعمل صيانه تانى غير فى التوكيل

اقتباس:

---

المشاركة الأصلية كتبت بواسطة l0new0lf

اشرح لك تاثيره
interference motorمواتير المتسوبيشى حاجه اسمها
يعنى الفراغ الى بيتحرك فيه الصباب و البستم مشترك
يعنى اول ما سير الكاتينه يقطع البساتم هتخبط فى الصبابات

يعنى الضرر ممكن يتراوح بين (صباب معووج و تغيير دلايل و قواعد و صبابات و بساتم مكسوره) و ان الضرر يكون كبير انك تضطر تغير مكنه كامله لان تكلفتها هتكون ارخص من تكلفه و كفاءه اصلاح المكنه اللى اتقطع سير الكاتينه فيها

---

شكرا يا فندم علي الشرح
لكن اللي أنا باتكلم عليه حصل أمام عيني سير الكاتينه أتقطع و العربيه فصلت كل شئ (الكونترول فصل العربيه ) و كانت الخسائر منحصره في سير الكاتينه
بالتوفيق

اقتباس:

---

المشاركة الأصلية كتبت بواسطة احمدعبدالعزيز

شكرا يا باشا على المشاركه وانا ان شاء الله مش حعمل صيانه تانى غير فى التوكيل

---

العفو يا أستاذي
التوكيل فعلا أفضل
و أعتبر ما كان مقابل التعلم و إن شاء الله يكون التوكيل فيه الخير

اقتباس:

---

المشاركة الأصلية كتبت بواسطة hossam99

شكرا يا فندم علي الشرح
لكن اللي أنا باتكلم عليه حصل أمام عيني سير الكاتينه أتقطع و العربيه فصلت كل شئ (الكونترول فصل العربيه ) و كانت الخسائر منحصره في سير الكاتينه
بالتوفيق

---

العربيه مش هتشتغل لان ببساطه معادش فيه صبابات بتشتغل ولا تغذيه وقود ولا اخراج عادم
انما الكنترول معندوش المقدره انه يوقف كرنك بيلف و خصوصا لو كانت العربيه معشقه و ماشيه و السير قطع

اتفرج على الفيديو ده من مركز صيانه لانسر فى امريكا
و شوف الراجل بيقول ايه

http://www.lancerservice.com/blog/20...nt-in-st-paul/