المشاركة الأصلية كتبت بواسطة ghazy12
مش ملاحظ ان المشاركة دي مبالغ فيها شوية !!!!!!
حضرتك بتشكك في وطنية كل اللي شاركوا في الموضوع ده بدون ادنى سبب منطقي, و ده شئ غير مقبول...
ايه علاقة الناس اللي بتفكر في الهجرة, بانهم يتابعوا اخبار البلد و اللي بيحصل فيها !!؟؟؟
انا لو مهاجر بقالي 50 سنة برة مصر هفضل بردو متابع كل شئ بيحصل في البلد لحظة بلحظة !!!
حضرتك مش وطني و مصري اكتر مننا, و مش هنزايد على وطنية بعض لانه مايصحش..
اقسملك بالله ان في ناس مهاجرين برة مصر, و بيحبوا البلد دي اكتر من اي حد عايش فيها,
اصل عمر المبدأ ما كان لو بحب البلد دي, لاااااازم افضل فيها مهما كانت الاوضاع و الظروف !!
في مصريين يعتبروا مثال مشرف لاي مصري في العالم كله, و عايشيين بره مصر...
رب هنا رب هناك... و المسلم هنا مسلم هناك... و المحترم هنا محترم هناك...
و اللي بيحب البلد دي بجد, هيفضل بردو بيحبها هناك و اكتر من الأول مليوون مره
انا مش همنع نفسي اني اخلف مثلاً لحد ما استنى البلد تتبني من الأول زي ما بتقول,
و اخيراً نلاقي تعليم محترم و راقي في مصر, و بعدين اخلف علشان اعلم ولادي تعليم محترم !!!!
انا مش هفضل مستني البلد تنظف من الفساد و السواد اللي كان فيها, و انا المفروض عندي
التزامات و بنبني بيت و اسرة و محتاج اوفر دخل محترم لاسرتي و لبيتي و لاولادي...
اللي مرتاح و مستقر و مظبط اموره في البلد هنا, ربنا يكرمه و يوفقه و هو احسن من ملااايين غيره,
بس اللي مش قادر و مش عارف يستقر و يتعايش في ظل الغوغائيه اللي احنا فيها هنا في مصر,
يبقى ماتتصدمش فيه لان حضرتك ماتعرفش عنه او عن ظروفه حاجه علشان تتصدم فيه !!!!
لو كل الناس اللي في الموضوع ده سافروا... البلد مش هتخرب زي ما حضرتك بتقول,
انت بس مكبر الموضوع شوية, لان ببساطه في زي اللي سافروا ملااااايين موجودين في مصر,
البعض مش قادر يسافر, و البعض الآخر قادر يتعايش و مظبط اموره و مش محتاج للسفر...
اللي بيفكر يسافر بيتمنى لاسرته و اولاده حياة محترمة و تعليم راقي و جو نظيف,
مافتكرش ان ده انسان سئ او يستاهل من سعادتك انك تتحامل عليه بالشكل ده ابدااا...
في النهاية دي وجهة نظرك لوحدك و اكيد تحترم, بس جملة اتصدمت فيكوا دي كانت صعبة شوية,
لاننا مش بنمثل اننا مصريين و بنحب البلد, و لا احنا منافقيين لا سمح الله, و ربك اللي يعلم مش حد تاني...