الموضوع: عايز اهاجر لاستراليا او كندا وعايز الماشوره من اصحاب الخبره

المشاركة الأصلية كتبت بواسطة abou_ruqi

ما هي دي المشكلة
المشكلة ان اللي في مصر وعاوز يعيش في بلد تانية ما يعرفش غير حاجة من تلاتة

1- ياخد فيزا سياحة ويروح البلد يحاول يظبط اوضاعه سواء جواز او دراسة او شغل
1- يجيله عقد عمل زي نظام الخليج
3- يعمل هجرة

وهنا في مصر منعرفش الطريق الرابع وهو الاسهل والارخص وانجح والجامع لكل المزايا
وهي فيزا المستثمر
دي بتديك اقامة دايمة في الدولة اللي انت عاوزها معزز مكرم من غير ولا مليم وفي اسرع وقت
والاقامة بتجيلك لحد عندك في البيت في مصر زي دول امريكا اللاتينية او بتاخدها في المطار زي الولايات المتحدة واعتقد وكندا

وكل دولة بتطلب رقم معين يكون في حسابك علشان تاخد فيزا المستثمر من اول اربعين الف زي كوستاريكا لحد مليون يورو زي الاتحاد الوروبي وخمسة مليون دولار زي سنغافورة و800 الف كندا مليون ونص استراليا ونيوزيلاندا

كلام سليم وانا سمعت عنها قريب برده مش من زمان لكن في حاجة يمكن حضرتك مش شايفها
معظم اللي بيطلع يدور على هجرة معهوش المبالغ دي
فيزا المستثمر محتاجة مستثمر معاه قدر من الفلوس مش شخص لسة بيبدأ حياته وبيدور على عيشة كويسة


العيشة النضيفة اللي بتقول عليها في كندا واستراليا واوروبا بس موجوده في كتير من دول العالم بس احنا مش شايفين غير دول
الفكرة في إن زي ما قلت قبل كده اللغة حاجز كبير
يعني في كام واحد في مصر بيحاول يهاجر فرنسا
أو كام واحد بيحاول يروح اليابان
أرقام ضئيلة طبعا
ماليزيا بتتكلم ماليزي
اندونيسيا اندونيسي
تركيا تركي

مش مجرد العيشة النظيفة كفاية
ما أنت لازم حتتعامل مع الناس

الاوروبيين نفسهم بيفتحوا بقهم من النضافة والنظأم والحضارة عندي هنا في ماليزيا وسنغافورة وهونج كونك ودبي وسول

المهم بقه انت لو حترح كندا حتعرف تعيش الحياة اللي في دماغك وبعد قد ايه وحتدفع كام ؟
مش رخيصة بس لو وفقت اوضاعك ممكنة
لو الحلم الامريكي اللي هو هاوس وعربيتين ومكتب واستثمار انت عاوز ملايين
لو في اسيا عاوز بتاع مليون
لو في امريكا الاتينية عاوز اقل من مليون لو في افريقيا عاوز اقل من ميت الف
مش لازم أول مايطلع يعمل كل ده كفاية سكن وشغل نظيف بما فيه الكفاية
وفي دول من كتر ماالمواصلات العامة نظيفة تستحرم تشتري عربية
زي النمسا وألمانيا مثلا

مش مهم النضافة فين المهم حياتي انا في الدولة اللي رايحها والا حسيب مصر ليه لو حعيش نفس اللايف ستايل؟

يعني لو قلتلك ان بميت الف دولا في امريكا مش حتعرف تجيب استوديو في منطقة زنوج فبنفس المبلغ تقدر في البرازيل تجيب مزرعة فاكهة مثمر وليها جانب على المحيط وفيها هاوس وعندك جيش من العمال
بالله عليك تهاجر امريكا والا البرازيل لو راس مالك 100 دولار يعني 600الف مصري يعني تمن شقتك وعربيتك في مصر
كلام مظبوط فعلا بالنسبة ل امريكا بس طبعا مفيش هناك ملك الا قليل
لكن هل فعلا 100 ألف دولار تجيبلك الكلام ده في البرازيل مثلا.. أنا لا أعلم
وبنفس المبلغ ده ممكن تفتح شركة في تايلند واقامة مدى الحياة وتعيش سلطان زمانك وتجيب العربية اللي نفسك فيها واحسن من امريكا بالرغم من ان امريكا ارخص عربيات مستعملة في العالم انما حتدفع الفرق بنزين غالي نار ومخالفات غالية بينما هنا في اسيا مفيش الكلام ده

لو حد بيفكر يهاجر اسيا او جنوب افريقيا او البرازيل يقولي وحثبتله انها اسهل وحتعيش حياة ميحلمش بيها المواطن الكندي نفسه مش المهاجر ، والدليل كمية الانجليز المهاجرين لماليزيا بينما مفيش ماليزي بيهاجر ابدا

تفتكر يبقى اللايف استايل في ماليزيا احسن واللا انجلترا؟
بصلها من نقطة تانية
الإنجليزي معاه فلوس - وفرق العملة في صالحه - إنه يروح مطرح ما هو عايز ويعيش ملك
زي مثلا أجاثا كريستي لما جت قعدِت في مصر
أكيد مش عشان احنا أنضف من انجلترا كبلد
ولكن عشان بتحب مصر و مزاجها تيجي مصر حتيجي تقعد في أنضف هوتل وتعيش عيشة ملوكي يمكن ماتعرفش تعيشها في بلدها بالتمن ده
يمكن الماليزي لا يقدر على السفر لنجترا مثلا بينما الإنجليزي بيهرب من تمن المعيشة في بلده خصوصا مع غزو الاجانب لفرص الشغل في بريطانيا .. هنود وغيره

كمان كل دولة ليها مشاكل
في دول رائعة - زي اليابان - لكن حتقبلك مشكلة اللغة زي ماقلنا
دول زي الخليج يمكن كويسة لكن فيها جو لا يطاق ومعاملة المصري يمكن مش رائعة وموضوع الكفيل في بعد الدول طبعا سيء
امريكا وجنوب افريقيا الجريمة في كل مكان ووجود عدد كبير جدا من المهاجرين في امريكا بحثا عن لقمة العيش تخلي من الصعب إن الواحد يلاقي شغلانة كويسة بسبب التنافس
انجلترا وفرنسا مثلا تسمع عن معاداة الاجانب خاصا العرب كمان انجلترا غالية نار
ألمانيا/نمسا/دنمارك/هولندا/سويسرا/اسكندافيا عامة رائعة لكن محتاجة فلوس كتير عشان عشان تدخل أساسا كمان اللغة مش سهلة
ماليزيا وتركيا واندونيسيا دول اسلامية فـدي ميزة لكن اللغة ممكن تبقى عائق
اميركا الجنوبية وافريقىا لا استطيع ان أعلق عليهم عشان ما قريتش عنهم حاجة لكن أظن الحالة هناك زي مصر أو احسن قليلا

المشاركة الأصلية كتبت بواسطة maserati

السلام عليكم و رحمة الله و بركاته

يا أستاذ عمرو ابراهيم, أنا كان ليا سؤال و أنا آسف جدا لو كان تدخل فى خصوصياتك, سيادتك كاتب (no car ), هو سيادتك ما اشتريتش عربية فى كندا, أصل كندا من ضمن مزاياها هى و دول العالم المتقدم, أن الواحد يركب فيها عربيات عمره ماهيقدر يركبها فى مصر, يا سلام كده عالporsche cayenne ب20000 دولار ولا cadillac sts ب 12000 دولار و لا bmw 750 ب22000 دولار, حاجات تشرح القلب الحزين, ده أنا من ضمن أسبابى أنى أهاجر, أنى أركب عربيات لما أقول يابس و من ضمن أسباب أنى مافكرتش أهاجر استراليا -غير أنهم عنصريين للملونين- أن الدركسيون عندهم عاليمين, يعنى تبقى العربية بتراب الفلوس و ماقدرش أسوقها عشان الدركسيون عاليمين, حاجة تنرفز الصراحة.

هي الناس بتهاجر عشان تركب عربيات بس؟ طيب ماتروح اي دوله علي الأقل البنزين هيبقي ارخص من هناك بكتيير
وعلي فكره الأسعار اللي حضرتك قلتلها اقل بكتيير من الحقيقه
سعر الكايين بيتدي من 56 الف دولار لحد 120 الف دولار للتيربو
سعر ال bmw 750 بيبتدي من 110 الف دولار

الأرقام دي جايز تبقي اسعار المستعمل كام سنه كده ولا حاجه

العربيات رخيصه بره بس مش زي مااحنا متخيلين

لا يا رزق انت مش بس ماقريتش عن امريكا اللاتينية انت كمان مقريتش عن اسيا لان للاسف فكرتك عنها مش صحيحة
بص في مصطلح اسمه مدن كوزموبوليتان
ودول اللي هما زي دبي وسنغافوره وكوالالمبور وهونجكونج ونيونيورك وبانجوك
دول مراكز التجارة في العالم المدن دي فيها حاجات مشتركة اللي اسمها كوزموبوليتان
دي بلاد تعدد اجناس بشر اتجمعوا من كل بلاد العالم في مكان واحد يجمعهم البيزنس
فعلشان كده لتا في دبي حتسمع عربي ولا في كوالا حتسمع ماليزي ولا في هونج كونج حتسمع صيني
هو الانجليزي
هنا حتى الماليزيين لما بيتكلموا مع بعض بيتكلموا انجليزي
الغة مش عائق في اسيا خالص ، ممكن في اوروبا تقابل ناس ما بتتكلمش انجليزي ، بس في اسيا صعب

كنت بفكر في كندا والنهارده كنت بشات مع واحد اتعرفت عليه هناك لما كنت في زيارة عمل وبيقولي تعالي وبتاع وفي شغل كتيير ولما سالته علي رينج المرتبات بتاعت شغلنا قالي من 60 الي 100 الف دولار سنويا قولت حلو قوي طيب ينفع اخد اكتر من كده قالي اه وفي ناس باخد 130 الف في السنه قلت يامانت كريم يارب

طيب ياعم تكاليف المعيشه ايه قالي 3000 دولار شهريا ضرايب و4000 دولار معيشه نظيفه يعني 7000 دولار شهريا ياحلاه ده غير بقي لو عايز تدلع نفسك شويه يعني قول 80 الف دولار سنويا وطبعا ده يعتبر في نص الرينج بتاع المرتبات او يعتبر ده اللي هقدر اخده اول مااروح

ولما سالته بس كده انا محتاج مش اقل من 10 الاف دولار قالي ده صعب قوي قولتله ياعم انا كده مش هحوش حاجه قالي اه بس هتعيش عيشه كويسه

يعني الناس دي رايحه تعيش وتموت هناك مش سكة ترجع تاني تعيش في بلدها

بصراحه الكلمتين دوول شالو من دماغي موضوع السفر هناك ده خالص
ده انا كنت فاكر اني ممكن احوشلي 5 الاف دولار ولا حاجه اتاري الموضوع بقي علي فاشوش يعني فلوس يبقي امارات او قطر وهتعيش عيشه نظيفه برده وفي بلد مسلم تسمع اذان ربنا في ميعاده ومحدش يضايقك عشان دينك او شكلك وهتعيش في بلد نظيفه وتركب عربيه نظيفه وهتشتغل بس مش هتاخد خبره بس في كام سنه هتعملك قرشين حلوين ترجع تجيبلك شقه حلوه وعربيه كويسه

المشاركة الأصلية كتبت بواسطة shaddadfalcon1

كنت بفكر في كندا والنهارده كنت بشات مع واحد اتعرفت عليه هناك لما كنت في زيارة عمل وبيقولي تعالي وبتاع وفي شغل كتيير ولما سالته علي رينج المرتبات بتاعت شغلنا قالي من 60 الي 100 الف دولار سنويا قولت حلو قوي طيب ينفع اخد اكتر من كده قالي اه وفي ناس باخد 130 الف في السنه قلت يامانت كريم يارب

طيب ياعم تكاليف المعيشه ايه قالي 3000 دولار شهريا ضرايب و4000 دولار معيشه نظيفه يعني 7000 دولار شهريا ياحلاه ده غير بقي لو عايز تدلع نفسك شويه يعني قول 80 الف دولار سنويا وطبعا ده يعتبر في نص الرينج بتاع المرتبات او يعتبر ده اللي هقدر اخده اول مااروح

ولما سالته بس كده انا محتاج مش اقل من 10 الاف دولار قالي ده صعب قوي قولتله ياعم انا كده مش هحوش حاجه قالي اه بس هتعيش عيشه كويسه

يعني الناس دي رايحه تعيش وتموت هناك مش سكة ترجع تاني تعيش في بلدها

بصراحه الكلمتين دوول شالو من دماغي موضوع السفر هناك ده خالص
ده انا كنت فاكر اني ممكن احوشلي 5 الاف دولار ولا حاجه اتاري الموضوع بقي علي فاشوش يعني فلوس يبقي امارات او قطر وهتعيش عيشه نظيفه برده وفي بلد مسلم تسمع اذان ربنا في ميعاده ومحدش يضايقك عشان دينك او شكلك وهتعيش في بلد نظيفه وتركب عربيه نظيفه وهتشتغل بس مش هتاخد خبره بس في كام سنه هتعملك قرشين حلوين ترجع تجيبلك شقه حلوه وعربيه كويسه

انت دلوقتي حطيت رجلك على اول سلمة في سلم الهجرة بتاعي، اهلا بيك كمان 12 شهر في اسيا

المشاركة الأصلية كتبت بواسطة ghazy12

اللي يسافر دول زي كندا او استراليا او نيوزيلاندا او انجلترا او امريكا... مايفكرش انه يحوش إلا الطبيعي !!!

يعني كانك في مصر عادي, و بتحوش مثلاً مبلغ بسيط من مرتبك, لان الباقي كله رايح مصاريف على بيتك و حياتك...

و ده اللي كنت بقوله في المشاركة اللي فاتت... تهاجر الدول دي, يبقى تتعامل معاها كما لو انها بلدك الأم,
و هو ده مفهوم الهجرة الحقيقي, لانك بتهاجر مش علشان ترجع تاني, و إلا ماكونش هاجرت من الاساس !!!

عايز تعيش حياة نظيفة و راقية و تعلم ولادك احسن تعليم و ليك حقوق و صلاحيات ابناء البلد كااااملة,
زي التأمين الصحي, و التعليم المجاني على اعلى مستوى, لكن تنسى تحوش مبالغ كبيره... كندا استراليا و هكذا

عايز بس تحوش فلوس كتير و تكون في بلد نظيفة بردو بس مالكش فيها اي حقوق غير الهواء اللي بتتنفسه... الخليــج

و بالمناسبة... في كندا تحديداً... مافيش حد هيضايقك لاي سبب سواء دينك او شكلك او اسمك او غيره اطلاقاً
و بردو فيها جوامع, و الجالية المصرية هناااك ما شاء الله كبيييييرة جداااااااا و المسلمين في كندا كتييير بردو...

ده رأي الشخصي المتواضع... تحيــاتي للجميـع

متفق