الموضوع: مناقشة حول التأثير المباشر و غير المباشر لزيادة أسعار البنزين

- لازم الواحد يقلل من استهلاك اللحوم و الفراخ، و ياريت الدكاترة اللى معانا يقولولنا الأنسان الطبيعى محتاج قد ايه و انا متأكد ان كتير مننا بنستهلك على الأقل 5 أضعاف احتياجنا
- مش هخلى ايدى تتمد على حاجات مش محتاجها عند كارفور، مش منطقى ان يكون عندى 2 مفك بالكهرباء مستخدمتش اى واحد منهم اكتر من مرة
- المشاوير اللى ملهاش لازمة لازم تتلغى و نوفر بنزينها
- مادمت مروح من الشغل و هاخد دش اول ما اروح، يبقى فيها ايه لما ما اشغلش التكييف فى العربية و انا مروح و اعرق شوية، على الأقل اشارك الناس اللى متكربسة فى الأتوبيس اللى جنبى المعاناة و محدش فيهم يبقى مش طايقنى و يحقد عليا


انا ممكن اقعد اقول كام يوم فى الحاجات اللى كتيييير مننا ممكن يوفرها - وانا اولكم - بس انا بادعوكم اننا نغيير شوية من نظرتنا للأمور و فى نفس الوقت نغير من نفسنا شوية علشان ربنا يغير حالنا للأفضل

أبوليليا
اسمحلي أبدي اعجابي الشديد بالموضوع
انا حاسس إن أفكاره إيجابية جداً
حتى لو مقدرناش نطبق كل المقترحات كفاية اننا نحاول حتى نعمل جزء منهم أكيد هايكون فيه عائد

ردا على الموضوع الاصلى
اكيد اللى بيعمل الحاجات اللى حضرتك قاتها دى لازم يراجع نفسه بغض النظر عن ولعة الاسعار
بس ها اقول لك حاجة و ها اخد نفسى مثال
انا مهندس وبشتغل فى شركة متعددة الجنسيات و الحمد لله مرتبى كويس جدا (انا كنت فاكر كده)
كمان زوجتى بتشتغل فى نفس المجال و مرتبها قريب لى
من الاخر دخل الاسره ابويا لحد ما طلع على المعاش (كان موظف حكومة) لم يحلم بربعه
عندى ولد و بنت و مع الدخل اللى كنت شايفه المفروض يخلينى اتعد فى طايفة الاغنياء ما بعرفش افسح العيال عشان اى فسحة ها تضرب الميزانية و لو عملتها بتبقى بالكتير كل شهرين
اكل بره مفيش لنفس السبب
متجوز بقالى 7 سنين و الحمد لله قدرنا نروح المصيف مرتين و كان ارخص حاجة متوفرة
انا با اروح كارفور مع المدام نجيب حاجة الشهر و بنراجع الفاتورة كل مرة عشان نحاول نطلع حاجة جايبنها افترا
الفاتورة بتعدى 600 جنيه كل شهر و كلها صابون ورز و حفاضات و زيت الخ من لوازم البيت
اقصاها ندلع العيال و نجيب ليهم لعبة ب30 أو 35 جنية
اتهبلت مرة و فكرت اشترك فى نادى عشان العيال تتفك و تلعب رياضة عرفت ان ده مش للى زيي
صدمة تانية لما حمزة ابنى جه داخل المدرسة و لفينا على المدارس
اكتشفنا ان مبلغ 10000 ايوه عشر تلاف فى السنة ده مبلغ عادى للعيل فى مدرسة لغات متوسطة
خدوا بالكوا انا بتكلم عن اللغات مش انترناشونال
يعنى 20000 للواد و البنت ---- 1666 فى الشهر مصاريف مدارس من غير الاضافات
يوم ما قلنا نحج اتعقدنا من الاسعار و رسيت على عمرة حوشنا تمنها و الحمد لله و ربنا يتمها على خير
مصاريف البيت الاساسية بقت رقم رهيب ويخض من غير اى رفاهية
و بقى الواحد بدل ما يخطط لرفع المستوى بمسكن احسن أو استثمار او غيره
اخرى انى اتمنى المرتب يكفى الاساسيات
.
.
.
طب ده العبد لله اللى و بفضل الله دخله كويس جدا
طب اللى دخله 1000 جنيه و ده مش قليل و سط الاجور فى بلدنا
مش ها اقول ابو 600 و لا 300 عشان كونه لسه عايش معجزة تدعو للتامل
يموت؟؟؟؟؟؟

رأيي وخصوصاً في حكاية المدارس كتبته هنا
http://www.nilemotors.net/Nile/showt...464#post253464

علي كدة الجيل بتاعنا اللي عنده 20 و 21 سنة ده دلوقت يروح يولع في نفسه لأن لا هيعرف يجيب شقة واللي مجابش عربية مش هيعرف و مفيش شغل و مفيش اي حاجة ! يقدم هجرة لاوزباكستان !

و كريم .. المدام مبتشتغلش و مستحمل كل ده علي اعصابك .. ده انت بطل يا راجل :)