تجربتي في قيادة القشقاي اليوم و رأي جديد
طبعا زي كل الناس مكنتش عارف أستني عشان أجرب العربية القشقاي اللي كنت واخد قرار أني علي نهاية السنة أجيبها بدل الصني الأتوماتيك علي الرغم من كون القشقاي مانيوال لكن كنت أصلا مستنيها تنزل مصر و بنام بالليل أحلم بيها و منزل لها كل صورها و كليباتها من النت
و رحت اليوم الخميس بالليل داندي مول مع صديقي الأنتيم و أنا بعددله في مزايا العربية و شوقته لقيادتها هو كمان ( عربيته مازدا 3 ) و لقيت أن الموزع اللي ماسك اليوم هو ناشيونال يونيون و دول حبايبنا عشان واخدين منهم في خلال 3 سنوات حوالي 7 عربيات صني و هما ناس زي الفل و أستقبلونا بمنتهي الود و أدونا هدية كمان
طبعا أنا كنت بفرك و كتبنا الأبليكيشن بسرعة و رحنا علي العربية
أنطباعاتي الإيجابية عن العربية
- شكل تحفة قطعة فنية و حجم ممتاز مناسب جدا لبلدنا مش ضخم لكن ملموم و صالون واسع معقول و شنطة كبيرة كفاية و كماليات جميلة أكيد كلنا حفظناها خلاص
- و إن كان يعيب العربية أنها نزلت بدون قضبان التحميل اللي علي السقف و اللي تفرق في شكل العربية كتير
- كمبيوتر العربية اللي مع العدادات تحفة ( زي بتاع الجيتا بتاعة أخويا ) و بيديك معلومات كاملة عن العربية
- تكييف الهواء ممتاز ممتاز و فعال
- كراسي مريحة جدا و تقفيلها بخامات ذات جودة عالية
- وضعية القيادة ممتازة جدا و الجلوس في الكنبة الخلفية مريح
- ثبات العربية علي الطريق واضح و يعطي ثقة في النفس
صديقي أبتدي القيادة و جلست أنا بالخلف أخد بالي من التفاصيل و بداية الأحباط
- الموتور صوته عالي من بداية حركة العربية و مسموع بوضوح في الصالون مع غلق الزجاج و تشغيل التكييف طبعا
- سحب العربية محدود و بطئ بشكل واضح و لما تابعت دوران الموتور لقيته علي التالت و العداد علي 4500 و العربية مش جايبة 100 كم !
- أبتدينا نجرب كل النقلات و جدنا أن العربية صوت الموتور عالي دايما لأنك طول الوقت دايس بنزين عشان العربية تجيب سرعات عادية و النقلة الخامسة مش أوفر درايف دي نقلة أساسية عشان تجيب سرعة يعني مش حتريح الموتور علي الطريق الطوالي أحنا جبنا 100 كم علي الخامس علي دورات 3000 !! و كمان مش بنوصلها بسهولة
- طبعا الموضوع بتاع الأداء ده أحبطني جدا خاصة مع صوت ونة واضحة داخل العربية كل ما تبتدي تاخد سرعة مش عارف ده صوت الكاوتش مع الطريق ولا أيه
- المهم صديقي وصل بها 150 كم داخل أكتوبر ثباتها معقول جدا لكن دورات الموتور عليت برضه جدا يعني علي الخامس و الدورات قربت علي 6000
- بدلت مع صديقي و أبتديت أنا اسوق العربية و ما كان إلا زاد الأحباط
الفتيس بيعض بوضوح علي النقلات الأولي و العربية مافيهاش سحب تحت رجلي تماما و طول الوقت دايس بنزين عشان العربية تمشي و طبعا الموتور طول ماهو عالي العربية حتسف بنزين و دي مشكلتي أصلا في الصني
و هنا ملاحظة أني أصلا كنت فاكر الصني بطيئة ( مقارنة بالمازدا 3 مثلا ) لكن الصني الأتوماتيك تعدي القشقاي مستريح و كمان الدايو النوبيرا المانيوال 2001 بتاعة والدي أدائها أعلي بكتييييير من القشقاي و أعلي أصلا من الصني الأتوماتيك بتاعتي
- طبعا كل القصص دي و مندوب نيسان بيحاول يوضح لنا أن ده أسلوب قيادة و أن الناس جربت العربية و أعجبت بأدائها لكن لما جبت التالت و بالعافية جبت 90 كم أبتدي يقول أصل الطريق ده مطلع شوية و بعد كده أبتدي يوضح أن العربية معملش صيانة الألف و الموتور ماتفتحش لسة علي الرغم أن عداد العربية حوالي 1500 كم
- و كانت الطامة الكبري زي ما بيقولو أما جيت أخد يو تيرن علي الطريق الصحراوي و حبيت أسحب جامد بالعربية و ما أسعفتنيش و هاتك يا كلاكسات من اللي جايين من ورايا
- و كان فيه زميل في المنتدي بيقول أنه علي التاني جاب 100 كم !! يا ريت يقول علي دورات موتور كام و أخدت العربية وقت أد أيه عشان توصلها
- طبعا أنا أصلا تفكيري مش في الجري لكن أكيد فيه حد أدني من الأداء مطلوب في أي عربية عشان تسعفك و ده كان مضايقني أساسا في الصني عشان الأتوماتيك أحيانا مش بيسعفك لما تيجي تعدي عربية تانية
- و أسوأ شعور حسيت بيه لما ركبت عربيتي الصني عشان أروح و هو الشعور بالهدوء و الراحة و أداء عربيتي المتواضع فجأة أصبح مقبول جدا و ده عكس اللي المفروض أشعر به بعد قيادتي عربية المفروض أنها وحش ب160 ألف جنيه !!!!!!!