الموضوع: هو الواحد يلاقيها من سواقين التاكسي ولا الميكروباصات ولا المكن الصيني ولا التوك توك؟؟

انا مش عارف ايه اللي بيحصلي ده
طبعا اغلب الاعضاء خدو بالهم اني عملت حوالي 3 مواضيع عن سواقين الميكروباصات اللي هما بلطجية يعني وقد ايه مخنوق من الفئة دي ومش انا بس اكيد
النهاردة جايب موقف من عدة مواقف حصلتلي مع احد سائقي التاكسي والمرة دي ربنا سترها بجد
انا عارف ان مش كل سواقين التاكسي كدة وفي ناس منهم اكيد محترمين وخايفين على اكل عيشهم بجد

الساعة 12 ونص بليل كنت ماشي في رمسيس وداخل على غمرة وسرعتي لا تتعدى ال 70 كيلو والطريق فاضي لان الوقت الى حد ما متاخر
ماشي على اقصى اليمين وعلى شمالي ميني باص الاخضر وعلى شماله تاكسي لانوس الابيض
فجاة بدون اي مقدمات سواق التاكسي جيه من اقصى الشمال لاقصي اليمين ووقف من غير مايبص في اي مرايا طبعا وقف علشان يركب زبون
الباشا وقف قدامي وانا جاي بسرعتي وفي حارتي والمفروض اني اخد بالي علشان البيه يركب الزبون مع انه جمبه فاضي والشارع واسع بس مزاج اهله يقف في نص الشارع وانا جاي بسرعتي


طبعا وقفت على الفرامل والعربية من السرعة دي عملت صوت الفرامل المعروف لدرجة خوفت الراجل اللي كان هيركب التاكسي خلته يجري على الرصيف
وانا اساسا كنت هلبس هلبس لان المسافة كان صغيرة متتعداش 20 متر من اول مادوست الفرامل روحت جاي على يمين التاكسي في المكان اللي مفروض يقف فيه والحمد لله العربية وقفت


طبعا وانا جمب التاكسي فضلت باصصله وساكت وقرفان من خلقته
يقولي انت غلطان وحد يجري وانت جي من اليمين ليه وشايفني وقفت
طبعا كل اللي قولتهوله (مانت سواق تاكسي) طبعا مقصدش اي اهانة ولكن اللي اقصده ان ده طبع اغلب سواقين التاكسي انه يقف فجاة في الشارع علشان يركب زبون
روحت مشيت وسيبته لاني مهما افهم فيه مش هيفهم ولا هيقتنع انه غلطان



وادي حكايتي مع سائق تاكسي ولنا لقاء اخر مع سواق توك توك قريبا وربنا يسترها علينا وعليكم ويحرق كل سواقين الميكروباصات وسواقين التاكسي اللي مش ملتزمين