مشكله فى فتيس لانسر بومه 1600

**elgabry1977** · 26-07-2011 10:25 AM

ارجو من الساده الخبراء ابداء الرأى فى مشكله فى فتيس لانسر بومه 1600 و تتلخص فى ظهور لمبة ال n مع لمبة ال d فى التابلوه مع السير على سرعة عاليه 140 فما فوق و اختفائها مع اطفاء محرك السياره او عند النزول بالسرعه الى سرعه اقل 100 على سبيل المثال, كلمت الميكانيكى بالتيلفون و قالى غالبا دى حساسات الفتيس فيها مشكله و يجب وضع الفتيس على جهاز للكشف عليه لمعرفة مصدر المشكله.
ارجو الرد فى توجيهى لمكان يتم الكشف فيه على الفتيس و ياريت يكون فى مناطق الهرم-فيصل- المهندسين-المعادى و سعر الحساسات دى ممكن يكون كام و بتتجاب منين و مشكورين مقدما على الرد

**mohamedway** · 26-07-2011 07:15 PM

روح التوكيل ولا أنصح بغيره فى هذه الحالات لأنهم حافظين عيوب العربيه و عندهم جهاز الكشف الأوريجينال بتاعها........وطبعا الحساسات اللى عندهم أصلية بس ممكن تبقه غاليه شويه بس لازم تركبهم أصلى بصراحة أو لو عرفت تتصرف فيهم استيراد.

المركز الرئيسى لشركة مصرية بقليوب - طريق القاهرة الإسكندرية الزراعى عند الكيلو 18

الرواس فى العجوزة قرب ميدان الكيت كات (شارع النيل) - متنزلش النفق اللى بيطلعك عند مسرح البالون و انت جاى من ناحية الكيت كات (مدخل المركز فوق المنزل بتاع النفق على اليمين)

الرواس له مركز أخر فى وسط البلد فى شارع عبد الخالق ثروت وانت داخله من شارع رمسيس هتلاقيه على الشمال

فيه مراكز تانيه بس دول اللى انا اعرفهم و بتعامل معاهم

**stay_away** · 30-07-2011 02:04 AM

فتيس ال 1600 بيكون cvt ويفضل صيانته في التوكيل لان الميكانيكيه بيحتارو في الفتيس الاوتوماتيك العادي اصلا فيارريت محدش يلعبلك فيه و وديها التوكيل احسن وحاول ما تقرصش عليها لغايه ما تتطمن عليها عشان ميزعلكش في حاجه هوا اصلا ممكن تكون فيشه من بتوع الفتيس متحركه او حاجه بس خليي التوكيل يبصلك عليه وياريت في اقرب فرصه عشان لما ناس اهملت في الفتيس دا عمل معاهم مشاكل بعد كده وان شاء الله تكون حاجه بسيطه

**montela** · 31-07-2011 02:24 AM

وديها التوكيل ممكن تكون المشكله في ال selector switch

**szaalouk** · 31-07-2011 10:36 AM

أولا كل سنه و انتم طيبين بمناسبه شهر رمضان الكريم اعاده الله علينا جميعا بالخير .
المشكله دي كانت بتحصل معايا و ده معناها ان درجه حراره الزيت عاليه جدا و ده بيحصل لما يكون الزيت درجه لزوجته خفت من طول مده الأستخدام .
و ده بدليل انك لما تنزل بالعربيه من السرعه العاليه لسرعه 100 كم مثلا تلاقي الأمور رجعت طبيعيه تاني لأن الجير بدأ يهدا شويه .
الكتالوج بيقول تغيره كل 40000 كم بعد التغييره الأولي ( الفابريكه ) لكن نصيحتي ما تستناش عليه و غيره كل 30000 لأن جونا و الوقوف الكتير في الأشارات في الحر يعادل استهلاك اكتر من ال 10000 كم الباقيه .
جرب نزل الزيت اللي عندك و حط زيت فتيس موبيل او فيسكو ( انا شخصيا جربت الموبيل و الشل و الفيسكو و أفضلهم بالنسبه لي الفيسكو ) و ده موجود في محطه الغاز الطبيعي اللي قدام فايزر في الماظة .
لما تروح المحطه خللي الصنايعي ينزل الزيت بالشفاط علشان تشتري علي قد اللي خرج هي عموما البومه بتاخد حوالي 5.5 كم
معلش هي طلعه غاليه لكن تستاهل .
اما لو كنت مغير زيت قريب يبقي يستحسن تروح علي التوكيل و ما تضيعش وقت لأن ظهور الحروف بالطريقه دي ما هو الا تحذير و ربنا يستر طريقكم جميعا .

**shamoos** · 01-08-2011 05:17 AM

هو زيت فتيس الانسر البوما(2007-08-09-10) الاوتوماتيك زيت معين (لازم من التوكيل)...ام اي نوع زيت (موبيل مثل)؟؟

**nice_bird** · 01-08-2011 06:32 AM

متابع +111111111111111111

**szaalouk** · 01-08-2011 12:10 PM

السلام عليكم
انا غيرت مره في الرواس و كان بيستعمل موبيل للجير الأوتوماتيك و ده موجود عادي في محطات موبيل
و بعد كده زي ما قلت مسبقا استعملت شل و أخير استعملت فيسكو و ده اريح حاجه جربتها لحد دلوقتي
لو انت مش مرتاح نفسيا للاسم ( قلله انتشار ) فالموبيل كان كويس و اسوأهم بالنسبه لي كان الشل ( بيفرق من عربيه للتانيه ) علشان الناس ما تزعلش يعني ممكن يكون ممتاز مع عربيات تانيه لكن معايا كنت حاسس انه خفيف في الفتيس و مش مدي الضغط اللازم و العزم الكامل بتاع العربيه ( و ده هو نفسه اللي حصل معاه موضوع لمضه n مع لمبه d ) لكن لما استعملت الفيسكو و بقاله دلوقتي 10000 كم تقريبا فهو زيت ممتاز معي حني الآن و باجيب بيه سرعات 160 ، 180 كم/ساعه و الحمد لله ممتاز .
لو حابب تتصل بالوكيل الجديد اذا كان جايب حاجه مخصوص من بره و يعتبر قطعه غيار ميتسوبيشي اصليه فده حل اعتقد حايكون الأفضل و لو اني خايف من التكلفه لكن لو كويسه حاكون اول واحد يروح يغير للزيت اللي عندهم شرط انه يكون ميتسوبيشي اصلي .

**elgabry1977** · 02-08-2011 10:38 AM

المشاركة الأصلية كتبت بواسطة szaalouk

أولا كل سنه و انتم طيبين بمناسبه شهر رمضان الكريم اعاده الله علينا جميعا بالخير .
المشكله دي كانت بتحصل معايا و ده معناها ان درجه حراره الزيت عاليه جدا و ده بيحصل لما يكون الزيت درجه لزوجته خفت من طول مده الأستخدام .
و ده بدليل انك لما تنزل بالعربيه من السرعه العاليه لسرعه 100 كم مثلا تلاقي الأمور رجعت طبيعيه تاني لأن الجير بدأ يهدا شويه .
الكتالوج بيقول تغيره كل 40000 كم بعد التغييره الأولي ( الفابريكه ) لكن نصيحتي ما تستناش عليه و غيره كل 30000 لأن جونا و الوقوف الكتير في الأشارات في الحر يعادل استهلاك اكتر من ال 10000 كم الباقيه .
جرب نزل الزيت اللي عندك و حط زيت فتيس موبيل او فيسكو ( انا شخصيا جربت الموبيل و الشل و الفيسكو و أفضلهم بالنسبه لي الفيسكو ) و ده موجود في محطه الغاز الطبيعي اللي قدام فايزر في الماظة .
لما تروح المحطه خللي الصنايعي ينزل الزيت بالشفاط علشان تشتري علي قد اللي خرج هي عموما البومه بتاخد حوالي 5.5 كم
معلش هي طلعه غاليه

لكن تستاهل :e_braces[1]:.
اما لو كنت مغير زيت قريب يبقي يستحسن تروح علي التوكيل و ما تضيعش وقت لأن ظهور الحروف بالطريقه دي ما هو الا تحذير و ربنا يستر طريقكم جميعا .

فعلا انا لسه مغير زيت فى التوكيل و معداش عليه 2000 كيلو , كده هاروح اكشف عليه و ربنا يستر