الموضوع: اقتراحات اضافية لتمويل حقيقى للعلاوة الأجتماعية

طبعا لازم يكون فيه ضريبة (صحة)
يعنى طول ماانت بصحتك إدفع ، مش عاجبك؟ أقرب بلكونة واحدف نفسك علشان تاخد إعفاء..

كمان لازم يكون فيه ضريبة على (النجاح) سواء فى المدرسة أو العمل أو أى حتة ، ولو مش عاجبك ما تبقى فاشل أسهل

طبعا ضريبة (الكلام) واجبة ، الناس بتتكلم وبترغى وبتهبل ، الضريبة هتعرفهم إن السكوت من ذهب

ضريبة (السير على الطرقات) للمشاة .. تأخرت كثيرا ولابد من عرضها على مجلس الصراصير

(الجزية السنوية) لابد أن ندفعها لقوات الإحتلال

وسيبونى فى حالى أنا من إمبارح ونفسى أعيط
الله يسامحك يا حسام يا حسن

كل حاجه بقت رفاهيه فى الحياه

ده والواحد كان عايش فى رفاهيه طول الفتره اللى فاتت دى ولا كان حاسس

الواحد بيقترح يجبوا ناس يلفوا فى الشوارع يشوفوا الشقق اللى مركبه تكيف وتفرد عليها ضريبه علشان دى كده شقق مترفهه

وبكده يقللوا البطاله ويزودا المليارات واهو كل من خير الشعب المصرى

فكرت فى شوية اقتراحات تانية:

- فرض ضريبة على مقاس الجزمة، لأن اللى بيلبس 45 بيستهلك اسفلت و بلاط الشارع اكتر من اللى بيلبس 40

- فرض رسوم اضافية على استخراج شهادات الميلاد، و اللى يتولد اول الشهر يدفع اكتر علشان ابوه لسه قابض

- فرض ضريبة على كمية الملابس اللى الواحد بيلبسها، علشان المرفهين اللى بيلبسوا حجاب و هدوم طويلة بيستهلكوا قماش أكتر، أما المساكين بتوع مارينا و شرم، فدول ناس عندهم دم و بيوفرا على الدولة دعم و بيلبسوا بيكينى

- فرض رسوم اضافية على المشاهد اللى بيشوف الماتش و بعدين يشوف اعادة الأهداف

- تغيير نظام اشتراكات الأنترنت و متبقاش حسب السرعة، تبقى حسب المواضيع اللى بتقرائها أو بتشارك فيها، فلو كانت تسهم فى تقدم الفكر الجديد فى الدولة، يبقى تاخد سعر مدعم، اما غير كده، تاخد باسعار غير مدعمة و يمكن تاخد فوق دماغك

- بعد نجاح فصل انتاج الخبز عن التوزيع، يتم الأنتقال للمرحلة الثانية فى المشروع و هى فصل التوزيع عن المستهلك

المشاركة الأصلية كتبت بواسطة Hossam_Hassan

- تغيير نظام اشتراكات الأنترنت و متبقاش حسب السرعة، تبقى حسب المواضيع اللى بتقرائها أو بتشارك فيها، فلو كانت تسهم فى تقدم الفكر الجديد فى الدولة، يبقى تاخد سعر مدعم، اما غير كده، تاخد باسعار غير مدعمة و يمكن تاخد فوق دماغك

و أمسك مواطن .بيتكلم كتير على الأنترنت ........... و شكلك كدا يا حُسام هانقطع عنك الأنترنت خالص :D :D :D :D :D

خد عندك مجموعة الأفكار دى

1- فرض ضريبة مطبات1 جنيه لعبور اى مطب يقوم بتحصيلها موظف كارتة يقف على كل مطب ويسلم قائد السيارة ايصال مكتوب عليه( رسم تنمية طرق)

2- فرض ضريبة كورنيش على كل الحبيبة القاعدين على كورنيش النيل فى القاهرة والمحافظات او كورنيش البحر فى اسكندرية، خمسة جنيه رسم قعدة للفرد الواحد، ويتم تحصيل 10 جنيه اضافية "رسم مسك ايدين" فى حالة رغبة الواد فى مسك ايد صاحبته

3- يسم فرض رسم باراشوت على كل المناديين والمتسولين ومندوبين المبيعات السريحة وكل الناس اللى بتتحدف على مخاليق ربنا، يتم تحصيله يوميا، ومن يضبط متلبسا بالبرشطة بدون دفع الكارتة يتم اعتقاله باعتباره مسجل قفز بالباراشوت

4- يتم تحصيل رسم تغطية سيارة عن كل سيارة يريد صاحبها تغطيتها 2 جنيه فى المرة الواحدة، والسيارة التى تظبط مغطاه بدون ايصال كارتة متدبس فى الغطائ يتم كلبشة الغطاء فى السيارة ويتعين على صاحب السيارة دفع الغرامة قبل ان يتم فك كلابش الغطاء

5- يتم تحصيل رسم تنمية مرافق على ركوب الأسانسيرات، بواقع 50 قرش لكل خمسة ادوار ويتم تركيب ماكينات جمع الكروت على باب الأسانسير وتباع الكروت فى محلات البقالة ومحلات بيع كروت الشحن

6- يتم فرض ضريبة "ترفيهية" يتم تحميلها على سعر كل وسائل منع الحمل وادوية الخصوبة وكل انواع الفيتامينات والمقويات "الخاصة"