طب دول الامريكان ........حنعمل احنا إيه ؟!!!!

**Chicco** · 06-05-2008 06:29 PM

الأمريكان يتحولون للسيارات الصغيرة بسبب ارتفاع أسعار الوقود !!

نقلا عن النيو يورك تايمز مبيعات السيارات الصغيرة زادت بصورة كبيرة في الولايات المتحدة في ابريل ٢٠٠٨ لتصبح ٢٠٪ من حجم المبيعات لاول مرة .
كما تخطت مبيعات السيارات ذات ال ٤ سلندر السيارات كبيرة الحجم ذات ال-٦ أو ٨ سلندر لاول مرة أيضا .
إعتبرت الصحيفة الاتجاه الجديد ضربة موجعة لدترويت (معقل صناعة السيارات الامريكية) في منافستها مع العملاقين تويوتا و هوندا.
نوهت الصحيفة إلى إزدياد مبيعات ياريس من تويوتا و فيت من هوندا مؤخرا بالاضافه إلي فورد فوكاس و كلهم سيارات ذات إستهلاك منخفض (بالمقاييس الأمريكية ) مقابل إنخفاض مبيعات البيك أب و ال SUV .
أجمع المحللون أن الأتجاه الجديد سيستمر لمدة ٥ سنين على الأقل ليواكب الزيادات المتوقعة في أسعار الوقود عالميا
من ناحية أخرى اشارت الصحيفة إلى إنخفاض مبيعات الوقود في بعض الولايات كنتيجة مباشرة لزيادة الأسعار
تنبأت الصحيفة باتجاه مصنعي السيارات نحو إنتاج سيارات أصغر موفرة للوقود و تتمتع في نفس الوقت بجميع الكماليات المتوفرة في السيارات الأكبر لمواكبة التغيرات العالمية
(منقول و مترجم بتصرف)
المقال كامل : http://www.nytimes.com/2008/05/02/bu...ef=todayspaper

حدش يقولنا إيه أكتر العربيات الموفرة للوقود في مصر في كل فئة لمساعدة من ينوي على شراء سياره جديدة أو تغيير سيارته لاصغر

**vet mitcho** · 06-05-2008 07:28 PM

تمام بس احنا هنا في مصر الناس مش بتغير العربيات باستمرار
الناس هتودي عربياتها فين
انا عن نفسي لو بشتري عربية جديدة هافكر بالطريقة دي حاليا

**Chicco** · 06-05-2008 08:16 PM

طب ليه الناس ما تغيرش عربياتها باصغر ؟ يعني اللي معاه ١٦٠٠ مش حيفكر ينزل ال-١٣٠٠ مثلا ؟

**vooooo** · 06-05-2008 09:36 PM

فى امريكا اعتقد ان العربيات الصغيره عندهم هى ال 2000 Cc

هنا بالنسبالنا هى دى العربيات كبيره الحجم

و كمان هتلاقى العربيات فى امريكا 90% منهم حديثه مهما كانت كبيره برضه هتبقى بتوفر شويه فى البنزين

لكن فى مصر 80% عربيات قديمه فبالتالى استهلاك عالى للبنزين

و كمان فرق الأسعار و فرق الدخل للفرد و الأقتصاد و حاجات كتير

**Chicco** · 06-05-2008 09:50 PM

كلام حضرتك مظبوط طبعا بس هي نسبة و تناسب يعني الأمريكان غيروا عربياتهم لأصغر ...(ياريس و فيت ١٥٠٠ cc )
سؤالي ليه احنا ما نغيرش عربياتنا لاصغر خصوصا مع توقع زيادة أسعار الوقود كمان و كمان
بصورة أوضح اللي راكب ١٦٠٠ يجيب ١٣٠٠ و اللي معاه ١١٠٠ يجيب ١٠٠٠ و هكذا

**hazem_khidr** · 06-05-2008 09:52 PM

احنا بقي المفروض ما نركبش غير الفئه من 1000 الي 1300
و لو رجع بيا الزمن مكنتش جيبت الياريس و جبت مكانها سويفت او بونتو مستعمله او اي حاجه صغيره تمشي ببنزين 80
لان كده حرام فعلا

**Chicco** · 06-05-2008 09:59 PM

معلهش يا حازم باشا هي حاجة تنقط فعلا :(
أنا لما اشتريت الكليو كنت عايز أجيب اوبل كورسا ١٦٠٠ و ما لقيتش فجبت الرينو ....الحمد لله
و متهيألي لو غيرت حاغير لاصغر .....هي فيه عربيات جديدة بتشتغل ببنزين ٨٠ ؟

**hazem_khidr** · 06-05-2008 10:05 PM

المشاركة الأصلية كتبت بواسطة Chicco

معلهش يا حازم باشا هي حاجة تنقط فعلا :(
أنا لما اشتريت الكليو كنت عايز أجيب اوبل كورسا ١٦٠٠ و ما لقيتش فجبت الرينو ....الحمد لله
و متهيألي لو غيرت حاغير لاصغر .....هي فيه عربيات جديدة بتشتغل ببنزين ٨٠ ؟

للاسف مافيش:(
اخر عربيات كنت ممكن تحط فيها بنزين 80
الاكسيل و السويفت و الشاهين قبل 2004

كل الجديد اقل حاجه بنزين 90
و انا اللي عملت ناصح و قولت اجيب السويفت علشان لو البنزين 92 اعتبروه للسيارات الفارهه حيزودوه
و يفضل ال 90 زي ما هو ما يتغيرش سعره ههههههه
اتاريهم اذكي مني و من تخيلاتي
الحمد لله اني ما جبتش صاني او اوبترا او نيو اكسنت :o

**Chicco** · 06-05-2008 10:09 PM

أنا حاسس إن العربيات ال-١٣٠٠ اسعارها حتزيد كمان و كمان ....ربنا يستر على الجميع

**hazem_khidr** · 06-05-2008 10:18 PM

المشاركة الأصلية كتبت بواسطة Chicco

أنا حاسس إن العربيات ال-١٣٠٠ اسعارها حتزيد كمان و كمان ....ربنا يستر على الجميع

اكيــــــــــــــــــــــ ـد
انا متوقع ان اسعار ال 128 و كل العربيات الصغيره تزيد بعد اللي حصل.
الزيرو و المستعمل
ماهي عربيات موفره و ضريبتها قليله
و اتوقع ان الاعلانات عن الياريس و كده اول كلمه حيقولك اقل استهلاك بنزين في مصر
و عندهم حق فعلا .
عربيات الواحد هنا بيشتريها بدم قلبه
و في دبي كان الواحد مش بيبص عليها حتي :(