لو لااااااااااااااازم أوي جدا من دول يبقي سيات ليون لمجرد اني باشوف ناس راكباها علي عكس المازدا اللي ماحدش بيركبها (أو أندر بكتير حتي من الليون اللي أساسا بعتبرها نادرة). بوجه عام مازدا تسارع بطيئ والمقاعد الخلفية + الشنطة ضيقة. وماعرفش لييه باحس ان باستثناء الشكل ماتجيبش السعر اللي محطوطة بيه. الليون جزء كبير من سعرها موجه عشان امكانيات ماتعتبرش عائلية زي التربو و(حسب ما سمعت) سهولة تعديلها والعفشة الخ الخ.
لو عاوز تقارن:
اعتمادية: الاتنين مش منتشرين بالدرجة اللي الواحد يحكم بيها عليهم بأي شكل. بس لمجرد العلم الاتنين ماحدش حايتعامل فيهم برا التوكيل سواء كا صيانة او تصليح أو قطع غيار ودي ف حد ذاتها عييب خطير لأن التوكيل حايبقي دايما لاوي دراعك (خصوصا توكيل دك العرب).
الوسع: الي حد ما الليون تكسب. مازدا رغم شكلها ضيقة من ورا.
الأمان: المازدا أعلي في اختبار Euroncap حققت ال5 نجوم في حين السيات أخدت 4 (مش وحش برضه)
نرجع تاني نقول.. العربيتين ركوبة حلوة جدا وماحدش ينكر نضافتهم (برا مصر) أما في مصرنا المحروسة مع توكيلاتها وانتشارها واسعار الصيانة والتصليح وقطع الغيار وخلافه ماتنفعش. كمان حط قدام عينيك ان العربيتين (علي عكس مثلا الكورولا أو الفانتازيا أو التيدا وغيرهم) مش موجهة لأسرة وبالتالي مش حاتستفيد من كمالياتهم وحاتحس ان الحاجات دي مزودة سعر العربية رغم انك مش محتاجها أساسا. حاجة كمان مهمة جدا وهي سعر اعادة البيع واللي ممكن تفرق من 40 ل 50 ألف كمان مثلا 8 ل 10 سنين بين عربية منتشرة وسمعتها كويسة قدام عربية ماحدش يعرف عنها حاجة.
كلمة أخيرة عشان انا عمال أكتب كلام من غير ترتيب أو تنسيق:
لو انت عاوز حاجة لأسرة خليك دايما في المضمون والمتجرب حاتريح نفسك واسرتك وحاتوفر في حاجات تفيدك في مصاريف البيت بداية من المصاريف الدورية لسعر اعادة البيع.
ربنا يوفقك في الاختيار ان شاء الله
المفضلات