أنا كانت معايا الشيفرولية اللانوس موديل 2011. جبتها زيرو، والحمد لله ربنا يسر لي الحال وبعتها قبل ما تكمل سنة معايا... العربية دي أسوأ عربية أنا ركبتها... أنا ركبت قبل كدة كيا برايد وهيونداي أكسنت ولانسر بومة، والتلاتة برقبتها. العربية الوحيدة اللي ركبتها وكانت أوحش من اللانوس هي دوجان موديل 95.
أنا مش عارف إيه نظام اللوجان، بس ماعتقدش حتبقى أوحش من اللانوس.... على فكرة اللانوس مش كوري تجميع مصري زي ما الناس فاكرة. دي بولندي تجميع مصري. باختصار، العربية تفتقد للجودة... عادي جدا إنك تضطر تغير بوبينة قبل ما تكمل سنة، وعادي جدا إن كاوتش البرابريز يفك منك قبل ما تكمل سنة، وعادي جدا إن لمبة الصالون تتحرق قبل ما تكمل سنة.... جايز الميزة الوحيدة في العربية دي إنها عربية شعبية، يعني مش حتغلب في إصلاح أي حاجة إن شاء الله، بس المشكلة إن فيه حاجات كتير حتبوظ فيها بسرعة. وزي ما قلتلك، الجودة في العربية دي تعبانة جدا جدا جدا.