وعليكم السلام ورحمة الله وبركاته - أولا ألف مبروك على العروسة الجديدة وربنا يديك خيرها ويكفيك شرها
ثانيا بقى أعتقد أنك أول مشارك فى قسم النيسان يعترف ويقر (بدون أى تضييق خناق أو ضغط عالى أو واطى) أنك بمحض وبكامل ارادتك أشتريت وامتلكت القاشقاى - وبالتالى هيئة رابطة المنتدى تطلب منك التوضيح والتفسير الممل جدا لكل نقطة من النقاط الآتية مع التوضيح بالمستندات والصور ان أمكن ذلك:
1- مطلوب من حضرتك تعطينا تقييمك الشخصى لأداء الموتور (قوى - متوسط - ضعيف) - بالنسبة لحجم السيارة وأنها 1600 سى سى - يعنى انطباعك لقوة سحب السيارة واذا أمكن معرفة الوقت اللازم للوصول من الصفر لمائة كيلو فى كام ثانية؟
2- أخبار الفتيس المنيوال بتاعها ايه؟ طبعا معظم الأخوة اللى جربوها فى التيست درايف قالولنا أنها سلسة جدا فى النقلات بتعتها لدرجة انها تحببك فى المنيوال - مطلوب تعليقك
3- أخبار العفشة بتاعتها ايه؟ بتحس بالمطبات وانت راكبها ولا عفشتها ناعمة؟
4- الفرامل عاملة ايه معاك؟ المفروض أنها ABS - بس بالنسبة لحجم العربية - هل استجابة الفرامل قوية ولا بتاخد مسافة كبيرة لحد ما تقف؟
5- طبعا أنا بس عايز أتأكد منك انها عالية عن الأرض وأنك بتنسى مشاكل العربيات التانية وأنك بتجيب ورقة وقلم وتحسبها ازاى هتعدى من فوق المطب وانت داخل عليه
6- أخبار الفينيش (التشطيب) الداخلى بتاعها ايه؟ خامات (جيده - متوسطة - رديئة)؟
7- الكنبة الخلفيه تاخد 3 أفراد بالحجم العائلى المتوسط ولا تبقى ضيقة؟
8- أهم نقطة - أخبار قطع غيارها ايه؟ هل هية موجودة ولا لسة منزلتش؟ ولو موجودة سألت على أسعارها؟
9- درجة نقاء صوت السماعات الداخلية بالسيارة - جوده (عالية - متوسطة - رديئة)؟
10 - ما انطباعك عن تكييف السيارة وقوتة بالنسبة لحجمها الداخلى (ممتاز - جيد - متوسط)؟
11- هل تشغيل التكييف بيؤثر على سحب السيارة؟ ولا لأ؟
12- انطباعك عن السيارة ككل وهل أنت راض تماما عن أدائها ولا فى حاجة مزعلاك منها؟
13 - هل لديك أقوال أخري؟ :mmm:
طبعا زى ما حضرتك شايف كدة - دى شوية أسئلة مسح زور ومقبلات عالماشى - وطبعا دول اللى خطروا على بالى كده فى السريع عشان مستعجل ونازل أصلى العشا - بس واضح أن سيادتك مش هتعمل حاجة اليومين الجايين دول غير انك تبقى معانا أون لاين - وأخيرا ألف مبروك على العربية وكل سنة وانت طيب