الف شكر على الرابط
الله يبارك يا زعيم
و موضوع الكاسيت كان موضوع بسيط بس محدش في البيت ليه في العربيات و لا التكنولوجيا غيري بس كنت متوقع ان كود مهم زي ده يبقي مكتوب في حته مع العربيه بس ما علينا
و العربيه اصلا عربيه اختي بس اخدتها مشوار لا باس بيه و تقريري هيبقي مبداي لان العربيه يا دوب عامله 300 كيلو فمعرفتش اخد راحتي قوي
و ان شاء الله التقرير يبقي موجود بعد الفطار و اهو اكون لقلطلها كام صوره سريعه ان امكن
تقرير و تجربه قياده رينو فلونس 2011
اولا بعتذر الصور كلها طلعت مش كويسه فمش هحطها و ابقي اصورها تاني و ارفع الصور
العربيه هي الفئه e3 واللون نبيتي
انطباعي الاولي ان العربيه كبيره او بمعني اصح تبان اكبر من منافستها و ده شيئ كويس
جوده التقفيل و الخامات جيده جدا لكن مع سماع اصوات تزييق و احتكاك علي الطرق الغير ممهده
المساحات الداخلبه ممتازه و الكراسي كبيره و مريحه و في نفس الوقت supportive لكن مع المسافات الطويله هتحس بتعب و الحاجه اللي معجبتنيش ان مسند الراس ناشف قوي و بيتحرك بسهوله زياده عن اللزوم لاني كذا مره احركه و انا مش قاصد ده غير انه مبيلحمش في الكرسي و هو مقفول
الطبلوه شيك و الحليه السلفر اللي فيه انيقه جدا لكن يعيبه صغر زراير الكاسيت و المكيف شويه و ده بيؤدي ان بليل تحس ان الطبلون مظلم كده و لازم تبص علي الزرار اللي انت تستخدمه خصوصا بليل
العدادات بقي ضايقتني جدا مش شايف اي لازمه انها تكون مايله كده لان ده بيحسسني اني بعيد و ده مش حقيقي
تاني حاجه بقي هي مكان زرار تشغيل الكروز كنترول ورا فرامل اليد و اكتر من مره يتم تشغيله بدون قصد
و المخدع اللي في النص كان محتاح يعلي 4-5 سم كان هيبقي هااااايل
نيجي بقي للقياده
اول ملاحظه هو ان الدريكسون خفييييييف جدا و ده ظريف جدا في الركن و المناوره
العربيه طلعتها بقي عكس الدريكسيون تماما تقيييييله جدا و مش عارف ده العادي و لا عشان لسه في التليين و بصراحه كوني متعود علي عربيه قويه فحسيت اني مخنوق
ثبات العربيه اكتر من جيد و التعليق نااااعم في كومبينايشن غريبه و مش عارف اتحققت ازاي
علو العربيه برضه هايل و مبتحكش في المطبات خااالص. و ده شيئ رائع بصراحه و للاسف لبست مطب ابن تيييت في شارع الجزيره و العربيه و لله الحمد استحملت الصدمه بكفائه و لو اني شاكك انها محتاجه ميزان و ترصيص بعد اللبسه
راي العربيه بصراحه و بامانه تعتبر من الاحسن في فئتها و سعرها
و العربيه ينقصها الباركنج سينسور فعلا لان ظهرها عالي و مع رفع الستاير الخلفيه الموضوع بيبقي صعب قوي
و برضه مفتقد الزنون جدا فيها لاني للاسف اتعودت عليه
انا عارف ان الحاجات دي بسيطه و ممكن تتركب بسهوله بس مبحبش العب في العربيه و هي لسه زيرو
حرقه الدم بقي
تاني يوم العربيه جت فيه شخصيه بنت ستين تييييت خد الجنب اليمين بمسمار
و الاسبوع اللي فات واحد تاني حك الرفرف بالاكصدام الشمال و طبعا منظرهم مستفذ لابعد الحدووود
بصراحه العربيه فاقت توقعاتي و هتستغربوا لو قلت ان اقرب عربيه سقتها ليها هي الفولفو s60
الاتنين ليهم نفس الشخصيه علي الطريق مع فرق القوه و الفخامه لصالح الفولفو طبعا
في النهايه اتمني التقرير يعجبكم و انا في اتم الاستعداد للرد علي اي استفسار.
الف شكر على مجهودك و تقريرك المميز و تميزه نابع من تجاربك السابقة مع عربيات من الفئات العالية بجانب طريقة كتابتك المرتبة
انا ليا كام تعليق بسيط
الاول الخاص بزراير الراديو او ال CD player انا شايف ان التحكم فيهم من خلال الريموت اللى خلف الدركسيون ممتاز و مش محتاج انى امد ايدى ناحيته خالص الا لو علشان اغير ال CD او اغير فى ال setting الخاص بيه او بالبلوتوث و ده نادر لانى ظبطه على مزاجى مرة و مش محتاج اروح كل شوية اغير فيه اى حاجة اما التكييف ففى الغالب الزراير الرئيسية اللى باستعملها الاوتو و السوفت و دول اكبر زرارين فى اعلى الكاسيت و الزرار السفلى الخاص بقفل دورة الهواء لجعلها داخلية اما الاضائة فيمكن زيادتها من خلال زرار زيادة الاضائة انوار التابلوة و الشاشة اللى على شمال التابلوة
الثانى الخاص بمسند الراس بصراحة انا مبسوط بية قوى لانى لما بقعد على الكرسي فارد ظهرى و منزل دراع فرد الظهر الموجود فى جنب الكرسى من ناحية اليمين و شادد الجزء الامامى من مسند الراس للامام بيريحنى جدا و بيخلينى ساند راسى علية و شايف الطريق كويس من غير ما تكون راسى مايلة لورى
اما بخصوص الطلعة هيه فعلا مش ممتازة تقيلة حبتين لكن لو من خلال الحركة يعنى و انت على سرعة 50 او 60 و حبيت تقرص او تجرى حتلاقى حاجة تانية خالص كانة موتور تانى غير اللى بيحرك العربية من الثبات
اصوات التزييق و الاحتكاك اللى حضرتك بتقول عليها ما بسمعهاش قوى اللى يمكن لو دخلت فى طريق غير ممهد و على سرعة بسمع اصوات خفيفة اعتفد لو ظبط هواء الكاوتش على 32 امامى و 29 خلفى زى ما مكتوب على قايم العربية و دخلت الطرق المكسرة بسرعة اقل مش حتسمع حاجة خالص
الحكات بقى فده يعتبر من السمات الخاصة ببلدنا اللى للأسف سلوك البشر فيها غريب و مش مفهم هيا ليه الناس بتعمل فى بعض كدة دة تقريبا مافيش فى مصر عربية جديدة الا و لازم تلاقيها و اخدة حكة بشكل ما
ربنا يهدينا جميعا
اشكرك مرة ثانية و اتمنى انك توافينا بتقارير اخرى فى اوقات لاحقة عن اى جديد فى انطباعاتك من خلال قيادة العربية
و ياريت الاخوة الاعضاء حائزى الفلوينس يوافونا بتقارير عن انطباعتهم من خلال استعمال العربية فى جميع الظروف
بالتوفيق للجميع ان شاء الله و كل عام و انتم بخير و صحة و سعادة
شكرا يا باشا على التقرير ..
بالنسبة للطابلوة ..اعتقد انك بعد فترة حتتعود فعلا على استعمال كل الزراير ..هى معمولة صغيرة عشان متكونش مؤزية للعين اثناء القيادة و تزغلل عينك ..
و تقدر تستعمل زراع المالتيميدا الموجود على اليمين خلف العجلة القيادة
انا بكرة السيارات زات الالوان الزرقاء او الحمراء فى الطلبوة ..مؤزية جدا للعين و مشتتة ..لون اضاءة الرينو هادء و ظريف و حستريح معاة بعض فترة
الكروز كونترول ومحدد السرعة محطوت بعيد عشان متستعملوش بشكل عفوى اثناء القيادة ..وضعة معقول