الموضوع: حساسات اللانوس

المشاركة الأصلية كتبت بواسطة emadno1

ممكن شرح مبسط مش لازم تفصيلى و الى يعرف اى معلومه عن كل حساس يكتبها و بعد شويه حنلاقى عندنا معلومات كتيرة و ممكن نكتبها فى نقط مثلا
1- مكانه ...
2- وظيفته ....
3- طرق صيانته ....
4- مظاهر اعطاله
5- سعره ...

و شكرا ليكم كلكم

اسمحولى اشترك معاكم والصبر معايا شوية
معلوماتى عن الحساسات كلأتى ولو فيها أى شطحه نبهونى ومش كل الأتى موجود بالانوس:-
مبدئياَ ليه كل الحساسات دى والجواب هو انه فى نظام الحقن الألكترونى (وده الموجود فى 99% من العربيات اللى بتنتج الأن يعنى كله الا أللادا 2107 و 2105 و 128 المصنعيين محلياَ) وظيفتهم ينقلوا معلومات للكمبيوتر علشان يقدر يحسب نسبة الخلط اللازمة بين الهواء والبنزين فى كل لحظة وعند كل ظروف التشغيل الكتير والمتغيرة فى كل ثانية.
الكمبيوتر ببساطة بيتحكم فى زمن فتح الرشاش وتوقيت الشرارة من حساباته المعتمدة على قراءة الحساسات
تعالو نمشى مع الهواء الداخل للمحرك ونشوف إيه الحساسات إللى بيعدى عليها:
-بعد ما نعدى على فلتر هواء المحرك ومتجهين لوحدة الخانق(Throttle Body) نمر على حساس درجة حرارة الهواء إللى بيبعت قرائته للكمبيوتر علشان يحسب منها كثافة الهواء إللى هى عامل اساسى فى حساب قدرة المحرك .
-نمر على وحدة الخانق بنلاقى البوابة (زى اللى موجودة فى الكربراتير) عليها حساس البوابة(ال Throttle position sensor) إللى بيحسب زاوية فتح البوابة ويبعتها للكمبيوتر إللى يقدر يعرف منها الحمل المراد من المحرك (يعنى لودايس على دواسة البنزين خفيف وبانتظام يخلى زمن الحقن قليل ولو دايس جامد ومثلاَ عايز تأمرك هيخلى زمن الرش أطول).
-وبقينا جوه مانيفول الهواء وبه حساس ضغط الهواء (ال MAP Sensor) إللى بيقيس قيمة التخلخل داخل المانيفول وبرده ده بيساعد الكمبيوتر فى معرفة الحمل المطلوب أيضاَ.
-دخلنا جوة السلندر وفى نفس اللحظة كان الرشاش بيرش البنزين وتمت عملية الأحتراق (أنا كنت لابس عازل علشان متلسعش) وخرجنا مع العادم نلاقى أمامنا حساس الأكسجين(ال O2 Sensor وده ساعات بيكون فى مانيفول العادم(فرن الشكمان) أو بعديه فى مسار العادم) ووظيفته يعرف نسبة الأكسجين الموجوده مع غازات العادم ومنها يعرف الكمبيوتر هل تمت عماية الأحتراق تمام ولا لأ وده بيخليه يقلل أو يزود زمن الحقن(وبالتالى كمية البنزين للهواء).
--حساسات أخرى:-
*حساس الكرنك ومنه يعرف الكمبيوتر سرعة المحرك(rpm).
*حساس الكامة ومنه يعرف الكمبيوتر مع حساس الكرنك السلندر اللى عليها الدور فى الرش وكذلك إطلاق الشرارة من البوجيه.
*حساس درجة حرارة مياه التبريد ومنه يعرف الكمبيوتر المحرك بارد (فيزود كمية البنزين شويه علشان سهولة الإدارة فى الصباح مثلاَ) ولا سخن فيرش مضبوط.
*حساس الصفع (Knock sensor) ومنه يعرف الكمبيوتر لو فيه تسقيف فى المحرك وبالتالى يأخر الشرارة شوية.
--حساسات ليس لها علاقة بالرش:-
*حساس(أو سويتش) ضغط الزيت وده علشان لمبة الزيت بالتابلوه.
*وحساس حرارة الزيت وده موجود فى بعض المحركات اللى فيها انظمةاضافية لتوفير الوقود.

--مشغلات(Actuators) وليست حساسات:-
*مثل الرشاشات.
* الأيدل (ال Idle Air Control) وعن طريقه بيتحكم الكمبيوتر فى كمية الهواء الداخل للمحرك لو مش دايس على دواسة البنزين (يعنى البوابة بتاعة الخانق مقفولة).
وفى حساسات تانية كتير للتحكم فى حاجات غير المحرك.
هذا والله أعلم.......