الموضوع: التقرير الخاص بمأساة شراء ميجان 2

... الجزء الثالث والأخير
أخدت صورة الإفراج الجمركى وتانى يوم رحت الشغل و هناك بالصدفة سألت سواق على موضوع إثبات رقم الموتور الجديد فى الرخصة قاللى إنى لازم أعتمده الأول من مرور الدراسة وهم يبعتولى الورق على مرور حلوان (المتواجد فى مجاهل 15 مايو لإحتراق مرور حلوان أثناء الثورة)
ماكدبتش خبر و رحت سألت فى مرور الدراسة كانوا خلصوا وقالولى ابقى تعال بدري استغليت أنى أحياناٌ أجازة السبت و صحيت بدرى فى معادى المعتاد ورحت على الدراسة تخييلوا قالولى ايه .. إفراج EIM بيكون على جمرك العامرية وده تبع مرور بين السريات بس وانت رايح هناك عدى على مرور مدينة نصر يدولك رقم الصادر بتاع الإفراج الجمركى وتروح بيه بين السريات
خرجت متكحول على مرور مدينة نصر وبدون تفاصيل السكرتير طلعلى رقم الصادر من مخزن الورق اللى قاعد فيه [ملحوظة: شفت هناك مواطن السكرتير طلب منه يروح بورسعيد يجيب ختم إن الإفراجات الجمركية إتحرقت أثناء الثورة ويرجعلوا تانى عشان يكمل إجراءاتإثبات موتور]
المهم مرور مدينة نصر باصانى لمرور بين السريات وهناك سألت لغاية ماوصلت للشباك اللى المفروض أقدم الورقة فيه وهناك الموظف المحترم قاللى إيه اللى أنت جايبو ده مش نافع الورقة دى لازم مبايعة بفارغة الموتور من EIM للميكانيكيون المهم إنهرت (كالعادة) و حاولت أتصل بمسؤل قطع الغيار فى التوكيل ماردش عليا.. رحت مكلم مين..... أيوة صح مافيش غيره هانى (لو فاكرين الشاب أبو شعر مفلفل) مش هو اللى قاللى خد الكارت بتاعى و تابع معايا
أم هند كلمته والحمد لله رد عليا وعرفته بنفسى و أول ما إفتكرنى وقبل ما أكمل شرح المشكلة اللى أنا فيها قاللى مأثرته الخالدة : باشا هو أحنا اللى بعنالك العربية وأخدنا منك الفلوس خللى الدكتور هو اللى يكلمنا و يتعامل معانا.. وعندها أُسقط فى يدى
طب أكلم مين ... مافيش غيره اللى باعلى العربية وأخد الفلوس (أيوة هو الدكتور) طلبته و رد على و إفتكرنى بصعوبة لأنه واضح أنه مش حافظ رقمى أصلاٌ (كنت إكتشفت وأنا بتخانق فى الميكانيكيون أنه تاجر وواخد كذا عربية منهم عشان يبيعهم.. مش قولتلكم انه قاللى عايز يغير المجال .. بجد فرحتله) المهم شرحتله الموضوع بسرعة وقلتله يجيبلى مبايعة من EIM للميكانيكيون تصوروا رد قاللى ايه : انت كنت ممكن تجيب منهم الورق اللى أنت عايزه بس أنت اللى إتخانقت معاهم و أنا كلمت حمادة وهو قاللى أن أنت شتمته وغلطت فية وعشان كدة هو قال (حمادة يعنى):مش هو جه يتخانق و أنا كنت هجيبلوا الورق لحد عنده خليه بقى يلف ورا الورق.. رديت و قلتله هو ده معقول طب أديك انت اتعاملت معايا انت شايف أنى ممكن أكون عملت كدة.
(أنا بقى اللى قتلنى الكلام اللى إتقال عليا أنى شتمت حمادة أفندى فى محل عمله ويعلم الله أن ده ماحصلش .. ثم أنا أصلاٌ بكره العنف و أقدر قيمة حياة الإنسان أكتر من نور اللى فى ملف المستقبل).. اسف على القلشة دى بس فعلا مش قادر
المهم قفل معايا و كلمت التوكيل تانى وطلبوا انى اروحلهم تانى وأقعد مع مسؤل التراخيص هناك و أشوف الورق اللى أنا محتاجه..
أنا أسف إستراحة عشان صلاة الجمعة و إن شاء الله أكمل بعد الصلاة

لا حولا ولا قوة الا بالله العلي العظيم

عودة..
رحت التوكيل تانى يوم وهناك قابلت المسؤل عن التراخيص و قاللى أيوة فعلا انت لازم تقدم مبايعة الموتور رجعت تانى لمدير قطع الغيار كلم مسؤل الفواتير وبعدين قالى هيطلعلك المبايعة بكرة و خدت الكارت بتاعه عشان أكلمه قبل ما أروح عشان أتأكد ان المبايعة خلصت و إتختمت
و تانى يوم كلمت مسؤل الفواتير (أسمه أحمد على ما أذكر) قاللى إتفضل تعالى خد الورق المهم فعلا رحتلهم بعد الشغل فى نفس اليوم و دخلت قالولى ايه تفتكروا .. بالصدفة مندوب الميكانيكيون كان هنا وخد الورق وإنت بقى ابقى روح خده من هناك (لو سمحتوا إفتكروا إن أحنا ف رمضان وبلاش شتيمة) وطبعاٌ الكيبورد هتعجز عن وصف شعورى ساعتها...
المهم كلمت الحاج عبد الخالق قاللى الورق كله هيكون جاهز خلال يومين وأنا هكلمك وفعلاٌ عدوا اليومين و كلمنى (أول مرة حد هو اللى يعبرنى ويكلمنى فى القصة كلها) و قاللى الورق خلص تعال خده بكرة رحت تانى يوم على الميكانيكيون و هناك قابلت هانى وراح واخد المبايعة اللى فيها رقم الموتور الغلط وسابنى شوية ورجع جايبلى الورق كله ونسخة منه و سلمهولى ومضانى بالإستلام على الصور مع العلم أن فيه ورق منه أنا اللى جايبه أصلاٌ من المرور و خدوه منى فى التوكيل .
خدت الورق بعد كدة رحت مرور بين السرايات تانى و سلمتهم الورق و بعد الحوارات الجانبية من الموظف المسؤل عن دفاتر الصادر و الوارد عشان ياخد منى المعلوم خلصت الورق و قالولى انت 5 أو 6 أيام بالكتير تروح المرور بتاعك هتلاقى الورق خلص و ترخص
سبتهم إسبوعين وده عشان أنا عارف الورق بيمشى إزاى بسرعة فى الحكومة (أسرع من الكهربة ف السلك) و طبعاٌ قبل ما أروح مرور مايو خدتلى يوم ف مرور النزهة عشان أطلع شهادة مخالفات جديدة بدل اللى حمضت معايا وده كان يوم خميس
المهم رحت يوم السبت المرور من النجمة ودخلت أسأل على الورق .. ماوصلش...طب روح شوفه ف سكرتارية الإدارة العامة لمرور حلوان .. طب فين دى يا أسيادنا وصفولى وبعد معاناة ماقدرتش أوصل رجعتلهم تانى ولحسن الحظ كان المندوب طالع من الوحدة رايح الإدارة.. طبعاٌ ما سبتوش وصلت جنابه أو بالأحرى خدنى هو للإدارة و تخيلوا بقى لقينا ايه.. أيوة فعلاٌ الجواب ماوصلش
رحت تانى يوم لمرور بين السريات قبل الشغل (مش مشكلة أعمل إذن) وطبعاٌ كالعادة استنيت الموظفين وسألت و دلونى على الموظفة المسؤلة عن الوارد اللى شوية ووصلت بحمد الله وبعد الهزار والسلامات .. أيوة قعدت تتفرج على شوية هدوم حريمى وشرابات كانوا مع واحدة جاية تبيع الحاجات دى للموظفين (بس للأمانة الست شكلها كان معاها تشكيلة حلوة لأن حتى الموظفين الرجالة قاموا هما كمان عشان يأخدوا فكرة) طبعاٌ كل ده و أنا قلبى بيتقطع عشان معاد الإذن بيروح منى وشغلى أصلاٌ فى المطار ودول لسة بيتفرجوا..
شوية ودخلت على الشباك و اترجيت الموظف أنه يستعجلها شوية عشان ألحق شغلى لقيت أن الورق اللى خلص عندهم من 7/6/2011 خرج من عندهم 21/6/2011 إلى مرور الدراسة
رحت مرور الدراسة لقيت الورق عندهم فعلاٌ (كنت هاموت من الفرحة) قاللى لازم يجى مندوب حلوان يستلمه و الحقيقة إن الراجل ساعدنى و خدت منه نمرة المندوب وكلمتة و اديته البيانات و راح تانى يوم استلم الورق و وصله لإدارة مرور حلوان.. و كلمت مندوب الوحدة وراح تانى يوم جاب الورق للوحدة (أشهد أن لا إله إلا الله) كان يوم تلات
وجاء يوم الأربعاء الموافق 6/7/2011 وهو يوم لن أنساه ماحييت لأن هو ده اليوم اللى كلل الله فيه مجهوداتى للحصول على الرخصة بالنجاح على الرغم من السخافات المعتادة فى معظم الوحدات المرورية و ‘نى إستنيت الرخصة تطلع لحد الساعة 2 و لما طلعت طلعت برقم الموتور القديم (تخيلوا المشهد) و خدتها تانى للموظف اللى خد منى الملف و طبعاٌ بعد ما قلبنى هو كمان ف شوية فلوس عشان يصلح الغلطة لأن الذنب مش ذنبه ان موظف الكمبيوتر أعمى وأخيراٌ حصلت على الرخصة بسنة واحدة على الرغم إنى دفعت ضريبة ال 3 سنينو رمولى اللوحات الجديدة و أنا بقى مع نفسى لأن الساعة كانت عدت 2:30 و الموظفين مشيوا و رحت أدور على حد يعلقهالى برة الوحدة
الشاهد من القصة الخرافية المهولة اللى قلبى وجعنى و أنا بفتكرها عشان أكتبها دلوقتى
1- لما تيجى تشترى مستعمل لازم تشوف كل الورق الخاص بالعربية و صاحب العربية و تشوف بصمتها بنفسك حتى ولو ظن صاحب العربية أنك أحد المرضى النفسيين
2- ماحدش ف الدنيا هيرحمك أو يفكر أنت ضيعت أد إيه من وقتك و فلوسك و الأهم من كل ده أعصابك عشان تخلص شوية ورق هيترموا ف ملف حقير وماحدش يمكن يفتحه لحد ما العربية تتكهن
3- لو بس شميت ريحة مش حلوة ف الموضوع أو شكيت مجرد شك فى حكاية العربية الأحسن إنك تتأكد بمنتهى الوضوح من الموضوع كله أو تسيب البيعة كلها لأن العربيات ماخلصتش
لأن لو حسبنا الوقت اللى أنا ضيعته فى الموضوع ده
- 4 مرات الميكانيكيون
- 6:8 مرات eim لدرجة أن الناس على البوابة عرفونى و مابقوش يسألونى رايح فين
- 4 مرات مرور بين السرايات
- 3 مرات الدراسة
- 3 مرات مرور مايو
- مرة مرور مدينة نصر
- مرة مرور النزهة
لو بس فكرت ف نص المشاوير دى هتبعد عن أى عربية مشبوهة من غير ما تزعل أو تحس بأى ندم
وفى النهاية أنا عارف انى طولت جدا جدا عليكم بس والله أنا إختصرت حاجات كتير عشان مأضيعش وقتكم بس أنا حبيت أنى أوصلكم تجربتى عشان ماحدش فيكم أو من اللى حواليكم يتعرض لموقف زى ده كان ممكن يتجنبه بسهولة لأن التجربة فعلاٌ والله كانت مريرة
وشكراٌ...

يا راجل حمد الله على سلامتك دنا جالى الضغط من القرايه بس الله يكون فى عونك و على الله العربيه تعمل بأصلها معاك و تريحك و ربنا يستر طريقك

مبروك، و حمد لله على السلامة، أتمنى ان يكون أداء العربية معك كويس بالموتور الجديد.