الموضوع: حصرىا لنايل موتورز .. اول تقرير استلام للقاشقاى فى جميع مواقع السيارات العربية

والصلاة والسلام على اشرف المرسلين سيدنا محمد عليه الصلاة والسلام
ابدا بتحية ومباركة بشهر رمضان الكريم لكل اعضاء المنتدى
سائلا الله لكم العافية ومتجمعين عند النبي باذن الله

:: رجاء خاص ::

قبل ان ابدا باي شيء رجاء ان تقرؤا الموضوع نقطة نقطة

انا حبيت اعمل تقرير مفيد ومردتش استعجل واحط تقرير اول ما استلمت قلت اجرب كويس وابلغكم

قبل ان ابدا الرجاء زيارة المواضيع التالية للاخ الحبيب (احمد تى فى) للاستفادة منها لانها هي اللي افادتني جدا .. فهي تقييمات واحد له خبرة وباع في المنتدى وفاد ناس كتير لان تقارير تمتاز بغزارة المعلومات والكثرة التفاصيل فيها غير انها معلومات موثقة من المصدر على طول لتعاملاته مع المسئولين فى نيسان ..

لينكات الموضوعات

اولا :

ثانيا :

ثالثا :

:: قصة الاختيار ::

* عام 2002 .. اشترى والدي اول عربية زيرو لينا في مصر وهي اوبل استرا .. علما ان عمل والدي في الخارج في دولة الامارات.. وانا عشت 18 عام معه في الخارج وطبعا جربنا كل انواع العربيات هناك .. لان مكتب الوالد كل فترة كان بيغير العربيات فكان الحمد لله لينا خبرة كبيرة في موضوع تجربة السيارات بمختلف الانواع ومختلف الاحجام والسعة اللترية

* نرجع لموضوعنا طبعا بعد شراء الاوبل في مصر بدات حرقة الدم من احتكاك في مطبات و نقر في شوارعنا ومجاري طالعة .. طبعا غير والدي بيمشي في الريف كتير وذلك بحكم مصالحه في مصر فمقدرش الحج يستحمل معانات الاسترا .. سنة 2004 باعها ومكنتش عاملة 10000 كيلو ويابخت من خدها وربنا يباركله فيها

* طبعا من سنة 2004 كل سنة بننزل حوالي شهرين الصيف يا اما ناجر عربية يا اما بقى حد قريبنا مسافر ويسيب لنا عربيته .. وكنا صابرين على امل ان الجمارك حتتشال عشان ندخل راف4 اوتويوتا برادو او نيسان باثفيندر

* ولكن 7سنين بتمر ولا شفنا جمارك بتنزل ولا بطيخ وقلنا بقى منين ما ربنا يكرم نجيب عربية بنك في الامارات ونسددها ونحاول ندخلها بعد كذا سنة يكون الجمارك قلت شوية عليها

* طبعا اخوكم اللي هو انا للاسف مش عاوز اقلكم مجرب في فئة الفور ويل الحمد لله كتير واللي فاكرهم منهم :
( لاندر كروزر في اكس ار + بورش كايين توربو + تويوتا فورتشنر + تويوتا راف فور + سوزوكي فيتارا + فولكس فاجن توارج + بي ام دبليو اكس فايف + واخيرا كيا سبورتج 2400 سي سي )

* دول اللي انا جربتهم في فئة الفور ويل في الامارات حبيت اقولهم عشان الناس تبقا مطمنة .. وانا مش حستحمل اني اركب حاجة سحبها بالنسبة لدول بطة .. طبعا في فرق في السحب لكن مش قادر احس انو كبير او تقيل او غلس الا مع التوارج طبعا والبورش مفيش كلاموشششششش هههههههههههه

* المهم بعد الياس شفنا سيارة اسمها كيا سول طبعا كلنا عارفنها عجبتنا لانها مرتفعة عن الارض بس طبعا كنا مترددين لاسباب مش حذكرها .. بس هي كانت موضوعة في الخطة

* طبعا تعرفت على المنتدى المحترم نايل موتروز وحطيت للحج شوية خيارات : كيا سول او سوزوكي اس كس 4 او رينو داستر وفولكس تجيوان كانت تقريبا السول اكبر كفة راجحة لان التيجوان عاوزة بنزين 95 ونادر الانتشارده غير سعرو
قبل ما ادخل كان اللي مقلقني بدون زعل من كذا عربية من الاختيارات الموجودة هو موضوع التوكيل والصراحة مشفتش حد اشتكى في نيسان الشكاوي المعتادة من التوكيلات الاخرى وده كان احد اسباب اختيار سيارة نيسان

* المهم فكرت كمان ادخل الاكس تريل فقلت ادخل منتدى نيسان لقيت موضوع بتاع القشقاي للاخ (احمد تى فى) الغالي على قلبي .. اللى بصراحة مفقط كل نقطة شارح كل حاجة فى العربية زى ما قال الكتاب وانصحكم بقراءة موضوعاته عن القاشقاى اللى خير دعاية للعربية دى .. واللى ذكرت لينكاتها فى بداية الموضوع

* وكلمت احمد بالتليفون واتعرفت عليه واتكلمنا فى القاشقاى والراجل وصفلي وصف محترم للسيارة بكل امانة في التليفون والصراحة الوصف كان اقل من حقها

* انا طبعا رحت واخد نفسي وقولت ابص على الفيديوهات وتوب جير وبست سيلر على النت ولقيت تقييمات جيدة لها .. ولقيت ان العربية بقت منافسة للمينى كوبر كنترى مان فى انتشارها فى اوروبا .. كمان وجدت حاجة اسعدتنى جدا وطمنتنى جدا فى اختيار السيارة وهى تقييم (euro ncap) وجدت فيه ان القاشقاى حصلت على اعلى درجات والدرجات النهائية فى معدلات الامان

* رحت عامل تليفون دولي للحج وقلتله بكل التفاصيل دى .. قالي انا حعدي على توكيل نيسان جنبي في الشارقة وحشوفها باذن الله .. المهم .. كلمني بعديها باسبوع قالي يا ابني لو هي نفس الارتفاع يبقى توكل على الله
علما الفئة اللي في الامارات هي فئة 2000 سي سي بس .. المهم روحت بعتله البروشور بتعها فورا

:: قصة الشراء والاستلام ::

* وبالفعل كلمت حبيبى (احمد تى فى ) وقالي روح احجزعندك في اسكندرية وكده

انا قلتله الافضل ان حاجة تكون عندك في القاهرة عشان طبعا منتظرش كتير لان المواعيد بتبقى مش مظبوطة كتير في اسكندرية .. راح مرشحلي اوتو ايجبت مدينة نصر

* بصراحة لازم اقف عند اوتوو ايجبت وقفة بس حتكون في التقييم لان بجد الناس دي قمة قمة قمة وربنا يكرم الاستاذ عبد الخالق والاستاذ عادل والاستاذ احمد حسن والاخ المحترم المسؤول عن الشاي والضيافة اللي قمة الاخلاق ووووووو مش عاوز انسى حد

* وطبعا بجانب المسئولين فى اتو ايجيبت (احمد تى فى) اللى بصراحة مكنش بيكسل ابدا فى الاتصال بيهم فى اتو ايجيبت لتسريع اجراءات الاستلام

* المهم تم بحمد الله حجز السيارة في شهر 5 بعد الثورة .. وتم الاستلام في تاريخ 27 من شهر 7
رحنا بعد صلاة الجمعة لقينا الاخ الفاضل استاذ عبد الخالق والاخ احمد حسن فى معرض اتو ايجيبت منتظرين .. ومعاهم المفاجاءة الجميلة هو (احمد تى فى) اللى بجد ربنا يجزيه خيرعنا جميعا جه ومسبنيش وقت الاستلام ربنا يكرموا باحسن من 10 قاشقاي لانه انسان قمة التعاون وقمة الحب فعل الخير للغير
استاذ عبد الخالق اخدنا طبعا ومسبش مسمار الا لما شرحه حتى حاجات تافهة جدا ممكن اي حد يعرفها مقلش اعديها فشرحها
قعدنا جوة المعرض ومسك دفتر الصيانة وشرح برضه كل صيانة بيحصل فيها اي
وتم الاستلام بحمد الله

* وبوجه الشكر مرة تانية للاساتذة الكرام بداية من استاذ عبد الخالق واستاذ عادل سعيد مدير فرع مدينة نصر للامانة فى التعامل والاهتمام بالعملاء ومش يريحه الزبون وخلاص ويقولوا كلمتين يشترو دماغهم .. لو هم مش عارفين يقولو مش عارفين ولو حتى حيتسبب في قلق العميل .. لكن مبداهم انهم ميقولوش كلام مش حقيقي عشان مجرد ترييح للزبون وجر رجل .. ودى ميزة بتميزهم عن اى معرض او موزع اخر

:: الاوراق استلام العربية وتكاليف الترخيص ::

اوراق استلام العربية :-
* خطاب لادارة مرور الاسكندرية حسب العنوان
* الافراج الجمركي يحتوي على خطاب فيه رقم الشاسيه والموتور والموديل والسعة اللترية والماركة
* خطاب من نيسان للاستيراد ويوجه الخطاب لقائد ادارة المرور .. يحتوي الماركة وموديل والشاسيه ورقم الموتور وسعة المحرك واللون
وهذا الخطاب تنازل من نيسان للاستيراد للمعرض البائع "اوتو ايجبت"
* خطاب من اوتوايجبت ويوجه الخطاب لقائد ادارة المرور .. يحتوي الماركة وموديل والشاسيه ورقم الموتور وسعة المحرك واللون وهذا الخطاب تنازل من اوتو ايجبت للعميل او الشاري

الترخيص وتكاليفه :-
* الترخيص للعربية لمدة 3 سنين كلفنى 1250 جنيه .. وبالكاتشب والذى منه وصل الى 1300 جنيه

بالنسبة للتامين :-
* حبيت انقلكم بعض بنود التامين مع شركة الينز

- تامين ضد الغير بحد اقصى 100 الف
- يتم منح المؤمن خصم عدم المطالبة 5% و 10% و 15 % سنويا بالترتيب
- تحمل المؤمن له في السنة الثانية 10 % والثالثة والرابعة والخامسة 25% من قيمة الفاتورة ومن السادسة حتى العاشرة 35
- تتحمل الشركة 75 من الاير باج
- يجب التامين في الزيرو قبل الترخيص
- خدمة سحب السيارة بحد اقصى 250 جنيه رفع السيارة بحد 100 جنيه تغيير اطارات توصيل وقود وشحن بطارية

:: المواصفات ::

من الخارج : -
* ارتفاع 20 سم عن الارض
* جنوط 17 سبور يابانى محترمة 4 جنوط سبور والاستبن جنط عادى مقاس 16
* سبويلر خلفي
* سقف بانوراما
* اكصدامات بلون مختلف عن السيارة من الاسفل بلون اسود تقريبا
* فوجات
* زينون فى الفوانيس الامامية
* رشاشات مياه على الفوانيس
* المساحات الامامية على الزجاج بتشتغل عند ظبطها اتوماتيكيا انها تشتغل لوحدها عند الاحساس بالندى او المطر
* كاوتش العربية انجليزى .. كونتيننتال
* الشكل الخارجى شكل اسد جاسور وبرستيج عالى وباين عليها العراقة والمتانة من شركة نيسان .. وباين عليها الشغل الانجليزى
* نور السيارة يمكن ظبطه اتوماتيكيا عشان لو دخلت نفق الطابلوه ينور وكمان نور الكشافات الامامية لغاية ما تخرج من النفق وتقفل

من الداخل :-
* تحط مفتاحك في جيبك وتدوس السمارت بتاع الباب وتدخل وتدور كمان بدون ما تحط المفتاح
* اول حاجة طارة مالتي فانكشن "لا تحتوي على مثبت سرعة او بلوتوث" تحتوى فقط على فتح الكاسيت وقفله وتعلية الصوت ولتغير الاغانى ومحطات الراديو
* الطارة تليسكوبية يعني بتتحرك في جميع الاتجاهات قدام للخلف فوق وتحت
* الطارة مكسوة جلد طبيعى عالى الجودة
* عدادات ار بي ام وسرعة شكلها شيك جدا ومريح للعين
* يوجد موشر حرارة
* كمبوتر رحلات في الوسط متعدد الاستخدامات
وظائف الكمببوتر تشمل المسافة المقطوعة + باقي كم على الصيانة التالية + تعديلالساعة + باقي كم على نفاذ البنزين وطبعا معدل الاستهلاك + تحذير عند فتح الابواب فى الكمبيوتر
واشياء اخرى لسه مكتشفتهاش
* التكييف اتوماتيك و فيها خاصية الدول او المزدوج ودي عشان اخلي الحرارة مختلفة اليمين عن الشمال
* اللي قاعد ورا في زرار قدام فى الطابلوه الامامى يخلي حتة في الطابلوه زي ما تكون ترمي هوا على اللي ورا
* كاسيت شبه كاسيت التيدا ياخذ 6 سي دي فيه خاصية ارتفاع الصوت مع زيادة السرعة وخواص اخرى
* مسند يد امامي يحتوي على مساحة جيدة ملاحظة لا يوجد يو اس بي في هذه السيارة
* المسند الامامى متحرك للامام وللخلف
* درج الطابلوه يحتوي على ثلاجة
* زجاج كهربا امامى وخلفي
* مرايات كهرباء ايضا تتظبط وتتعدل بالكهرباء من الداخل .. ولكن المرايات مش ضم
* مسند يد خلفي
* كنبة قابلة للطي تلت وتلتين
* مساحة الشنطة بصراحة رائعة وتحس انها شنطة سيدان بس اوسع واكبر ارتفاعا عن السيدان
* تحتوي من الداخل على حساس الظلام للانارة الاتوماتيك لما تدخل جراج او نفق تلاقى نور الطابلوه بينور لوحده
* حساسات مطر
* فرش الكراسى والكنب خاماته التفصلية اعلية الجودة والشياكة
* تنجيد الفرش مريح جدا ولا تشعر بالتعب عند الجلوس عليه فى مسافات طويلة وفيها حاجة فى الكرسى بتعملها عشان تعملك راحة لمنطقة القطنية فى الدهر .. يعنى اخر دلع .. كرسى مريح وسقف شيك اوعى تنسى الطريق هههههههههه
* يوجد فى السيارة خاصية follow me اول ما بتنزل بترعش دراع النور عليك مرة وتسبيه وبينورلك الزينون فى المكان المظلم وبتخرج من العربية وبتقفلها وبيفضل منور لمدة دقيقتين وبعد ما بتغادر المكان بيطفى لوحده
بالنسبة للمساحة الداخلية كرسي السائق طبعا والراكب الامامي جيد المساحة
اما بالنسبة للخلف تكاد تكون اقل من التيدا بشيء بسيط لكنها جيدة
سقف بانورامي تتمنى انك مستقش عشان تبص فيه ههههههههههههه
* يوجد 6 سمعات داخلية صوتهم جيد جداا

:: التجربة العملية فى القيادة الى الان ::

تقييمي ليها الصراحة في اول تجرية لمدة مسافة 800 كيلو وقبل صيانة الالف

* اول انطباع واهم انطباع .. الفتيس كان سلس ونقلاته سهلة وسريعة وقوية ورياضية فى النقلات الاولى
* طلعة السيارة جيدة على الاول
* السيارة بتطلع على التاني من وضع الثبات وده يدل ان ثقل العربية مع المانوال مش ماثر فى حاجة
* صوت الموتور واطي الصراحة ويكاد لا يسمع و عزل السيارة جيد جدا
* السحب بصراحة كويس وتسطيع التجاوز و الخروج من المازق باذن الله تعالى لكن اللي معاه عربية فرنا مثلا ولا كورولا 2005 اللي هي 1600 سي سي الاتنين مانوال لان العربيتين دول بالذات خفاف حيحس ان السحب اقل قليلا ... والسحب افضل من باسات 2002 1600 سي سي مانوال ... واقل من سبورتج 2400 سي سي بس مش فرق كبير والسبورتج محتاجة متقلش عن 2000 لان حجمها اكبر ومش حكمل عشان محدش يزعل ... السحب افضل من كيا كارينز اوتوماتيك ... السحب مشابه لسوزوكي فيتارا 1600 سي سي 2008 مانوال ... وجربت القاشقاى على مطلع الجراج اللي تحت العمارة وبصراحة المطلع ده لو وقفت عليه باى عربية مش حتعرف تطلع لازم تنزل تاني وتاخد سرعة عشان تطلع ومع ذلك انا وقفت بيها وعرفت اطلع بالقاشقاى ...
ملاحظة " المقارانات اللى حاولت اقارن باغلب الموديلات اللي جربتها وذكرت اسمها عشان احاول اقرب الصورة والموديلات دي جربتها هنا في مصر من ايجار وخلافه "
* السيارة لسه في مرحلة التليين وتقييمي للسحب بعدين باذن الله اكيد حيختلف وهو فى الوقت الحالى اعطيله 7.5/10 ... وبردوا لعشاق موضوع الاربي ام
على الثاني توصل لسرعة 40 و الاربي ام 3
على الثالث توصل لسرعة 70 والاربي ام على 3
على الرابع توصل لحوالي 90 والاربي ام 3.5
الخامس طبعا مقدرتش اعدي ال 90 فمش حقدر اقول عليه حاجة
* الثبات ما شاء الله كويس جدا جدا الصراحة
* الدبرياج خفيف ولما بنزل من العربية بعد مشوار طويل مش بحس بالوجع المعتاد من سواقة المانوال في السمانة ... وانا اساسا عندي مشكلة في رجلي الشمال فاي شوية اجهاد تبدا تشد فالصراحة المانول بتاعها مش متعب واللي خايف من موضوع المانوال ميقلقش ابدا
* الكراسي مريحة جدا والمضحك ان الاستاذ عبد الخالق شرح للحج ان في حاجة للقطنية في كرسي السائق وانا ماشي حسيت حاجة بتلعب في ضهري اتخضيت ههههههههههههه راح الحج شرحلي بعد ما اخدت الخضة
* الاضائة جيدة جدا على الطريق زينون وفوجات اضائتها عالية وممتازة
* العفشة الصراحة كويسة واحسن من عربيات تويوتا كتير ركبتها فور ويل وانا لسه محطتش نيتروجين على فكرة .. وفعلا مش حاسس باى دب فى المطبات مع علم ان الجنوط 17 .. بس اللوبروفيل كبير بتاع الكاوتش عن الارض .. ده غير العفشة الخلفية عفشة محترمة ومالتى لينك
* استهلاك البنزين جيد جدا العربية تانك البنزين فيها 65 لتر .. نقول مثلا نص التنك 30 لتر ونشيل الخمسة دول احتياطى .. عملت 400 كيلو كان مؤشر البنزين وصل الى النص بالظبط
* العربية جر امامى
*عملت مشوار وكنت محمل فيها اوزان فى العربية كتير وكانت ماشية تمام ومش متاثرة باى شى
* التكيف بتعها مش بياثر على اى شى والعربية ماشية ابدا وطبعا تلاجةةةة انا شغلته لما وصلت الى 400 كيلو وكنت بشغله على فترات
* الرؤية فى العربية فى المرايا الجانية روعة والمرايات الجانبية كبيرة .. ومرايات الصالون معقولة ولكن مش بكبر المرايات الجانبية بصراحة
* صاج العربية محمل ومحترم ود ميزة سيارات نيسان عموما عن اى عربية يابانى اخرى او كورى .. وده شوفته فى حوادث كتير فى مصر وربنا يحفظنا ويكفينا شر الطريق
* تقفيل وفنش العربية سواء فى الصالون او الماتور او من اسفل العربية عالى وتقفيل محترم جدا
* الباور بتاع العربية باور فى منتهى الجمال والسلاسة .. وفيش مكان صعب عليك فى الركن ابدا لانه باور كهرباء .. وبيفصل على سرعات عالية بعد ال120 بيتقل وجربته مع طالع وصلت فيها الى 130
* لما تمشى بالعربية السنتر بيقفل للعربية اتوماتيك

:: ما ينقص السيارة ::

* مرايات ضم وانا شايفها مهمة الصراحة
* سينسور للركن ولكن المرايات حجمها بيساعد جدا الصراحة
* كان نفسى يكون فيها فتحة يو اس بى فى الكنسول الامامى
* كان نفسى يكون فيها بلوتوث فى المالتى فانكشن
* بردوا كان نفسى يكون فيها مثبت سرعة

مع العلم ان عارف كويس ان مثبت السرعة والبلوتوث كان حيزودوا فى تمنها .. بس ان شاء الله ينزلوه فى الموديل الاتوماتيك نها

مش عارف دول بالنسبالي العيوب اللى انا شايفها
للاسف مقدرتش حتى الان اطلع عيب بارز بس حقول كم حاجة ممكن يكونو لبعض الناس عيب

:: النهاية ::

ودى كانت كل ملاحظاتى ومعلوماتى عن القاشقاى .. اتمنى انكم تستفادوا منها جميعا
واختيار موفق لاى عضو مقبل على شراء العربية .. والحمد لله ربنا شاهد عليه ان كلامى كان بعناية وليس تحيز لانى مالك للعربية

واى استفسار انا حاضر على الفور .. فى تقديم اى مساعدة لكل الصقور .. لان فعلا موقع نايل موتورز وقسم نيسان والصقور مفيش حد منهم اتاخر عليه فى اى استفسار .. وعشان كدا واجب عليه رد الجميل لاحلى واعز اخوة فى الله

وانتظرونى فى تقرير عن القاشقاى بعد صيانة الالف باذن الله

والسلام عليكم ورحمة الله وبركاته