وصف عام لليوم قبل الاختبار
* الاجمل فى اليوم مش اختبار القيادة .. الاجمل فى اليوم ان كنت مع حبيبى واخى حسين مصطفى او حسين جمال ..ههههههه اخويا وحبيبى طبعا .. ودى حقيقة
* جالى تليفون من حسين .. تعالالى بسرعة على كارفور عشان انا كنت فى شغل قريب من ابو رواش .. ومستنيك هناك عشان نعمل تيست دريف بالمرة للعربية
استاذنت من الشغل .. لان حسين ده الغالى .. ورايح للغالى ورايح للعروسة القاشقاى كمان .. وفعلا روحت لحسين على كارفور .. واتقابلنا وروحنا الى المكان اللى فيه حملة اختبار القيادة ..
* كان موجود هناك مدير التسويق لنيسان ايجيبت الاستاذ محمد جمال .. ورحب بينا .. وطبعا هو عارف كويس نايل موتورز وموقعنا من فترة .. والحمد لله على السمعة الجميلة اللى وصل ليها موقعنا داخل نيسان ايجيبت
* ورحب بينا .. وسلم لينا هدايا خاصة بمناسبة الاختبار .. مجات ظريفة وجميلة عليها نيسان قاشقاى
* وجدنا فريق عمل الاختبار من اتو ايجيبت .. متواجد ومنتظرنا .. استاذ عبد الخالق واستاذ هشام .. ورحبوا بينا ايضا .. وفضلنا نتبادل الحديث مع بعض
* سجلنا اسامينا فى الاختبار .. وعرفت منهم ان لازم تيجى وتحجز عشان عمل الاختبار .. وتحدد معاد وتيجى بعد كدا عشان تعمل اختبار
ولو عايز تعمل اختبار على طول .. دى بيتوقف على حاجات معينة
منها .. ان ميكنش فى ضغط عليهم .. والعروسة القاشقاى واقفة ومفيش حد بيعمل اختبار عليها فى الوقت اللى انت جيلهم فيه
او تكون من النايل موتورز من موقعنا وتبلغهم بكدا .. وبردوا فى مشكلة .. تواجد اتو ايجيبت فى الحملة حيكون ليوم السبت بس .. وحيستلم بعدهم موزعين معتمدين اخرين .. مثل يونايتد والسبع ومودرن
فياريت تلحقوا اليومين دول .. بخصوص اللى عياز يروح على طول ويعمل الاختبار فى وقتها .. ولو راح بعد كدا هو وحظه فى موضوع انك تعمل الاختبار فى لحظتها
تقيمى بالنسبة للعربية كسائق :
1- عزل الصوت فيها ممتاز جدا .. متسمعش اى صوت نملة بره العربية ...العربية اول ما تفتح الباب وتقعد فيها وتقفل .. تحس انك فى دنيا وعالم اخر.
2- علو العربية والبرستيج الجميل اللى حاسس فيها وانت فيها سواء من فتحة البانوراما او ارتفاع العربية من على الارض .. وده طبعا مفيد جدااا لشوارعنا.
3- ثبات العربية وهى ماشية بسم الله ماشاء الله ماسكة نفسها جدا .. مع الغرز والجرى ..
4- العفشة بتعها عافشة محترمة جدا .. ناشفة بس مش النشفان المتعب زى اى عربية اخرى مركبة جنط 17 .. لان الجنط اللى راكب فيها جنط 17 .. بس اللو بروفيل بتعها عالى .. فمش حتحس باى وجع زى اى عربية اخر بجنط 17
.. وتم التاكيد ومشيت فيها فى مطبات ورزعتها كمان
5- التكييف حدث ولا حرج .. تكيف رائع وقوى .. وانت فات الباب وواقف تلج جدا .. وانت ماشى بيها ولا اكنك مشغله ... وجربته مع سحب العربية .. ولا ليه اى تاثير يذكر
6- الباور بتاع العربية ناعم .. ومش النعومية اللى تخض ابدا وتعمل قلق .. ومع السرعات بيتقل وبيفصل .. ومشيت بيها لغاية 130
7- التقفيل .. خامات العربية فى الطابلوه جيد جدااا والفرش انجليزى انجليزى على حق ومريح فى قعدته وانت سايق..تقفيل العربية كوجه عام ممتاز جدا.
8- انوار الاضاء فى الطابلوه فى منتهى الشياكة .. ومريحة للعين جدا .. وعلى نمط الطراز الاوروبى
9- كل حاجة فى منتناول يد السائق وقريبه منه .. سواء المالتى فنكشن او تعديل المرايا نفس مكان الصنى والتيدا .. او الزارير الكهرباء
10- اماكن التخزين والاكواب متعددة وقريب من السائق
11- بخصوص الفتيس .. فتيس المانيول يحببك فى سواقة المانيول .. حاراته قصيرة والتعامل مع النقلات من غيار الاول الى التانى قوى جدا فى الطلعات وبيعطيك شعور رياضى .. وبتسمع نقلات الغيار .. وبعد الغيار التانى مش بتسمعه .. والغيارات بتتقل من التالت الى الرابع .. مش مش تقل قوى يعنى.
12- الدبرياج حسيت انى سايق اتوماتيك ولا اكن فى دبرياج .. خفيف جدااااااا ولا حتحس بيه خالص
13- صوت الماتور اول ما تدور منخفض ولا شلت ايدك بعد ما دورت .. وقعدت ترغى وانت واقف ممكن تنسى انك دورته وكمان مع النقلات والحرق مسموع ولكن مش بازعاج .. بقوة رياضية .. ومش مسموع اوى بردوا
14- سحب العربية بتشد معاك .. بس فى حاجة .. وهى ..ان الاستجابة متاخرة لثوانى بسيطة مش عارف حسيت ان سحبها مش حقول ولا متكتف ولا بتجرى اوى .. يمكن عشان لسه الماتور متقرصش عليه ولسه العربية عاملة 900 كيلو .. بس بتجرى العربية وبتوصول الى السرعات المطلوبة .. يمكن كمان عشان العربية عالية والواحد مش متعود
تقيمى كراكب خلفى فى العربية
حسين وهو سايق كان بيفترى عليها بردوا .. وكنت قاعد ورا مستمتع ومش حاسس باى قلق ورا .. وقاعد مرتاح مع سواقته
1- الكنبة تشيل 3 افراد متوسطى الحجم مرتاحين وقعدتها مريحة جدا وتنجيد الكنبة مريح والكراسى عموما وطرى جدا ..القعدة ورا مع الفتحة البانوراما رائعة وجميلة والمنظر رائع وتنسى معاه الطريق والدنيا.
2- وحدات الاضاءة متوزعة على الابواب عشان مفيش مكان فى السقف .. بس قوية لما شغلتها وبتعطى اضاءة جيدة فى الصالون
3- المسافة بين راسك وسقف العربية .. بحر .. وتحس براحة .. ومفيش حاجة كابتة على نفسك وانت قاعد .. اكنك قاعد فى البيت .. ناقصة بس ماكنة فيشار عشان تسمتع بمنظر البانوراما مع الغروب
4- التكيف بيوصلك بسرعة وانت قاعد وراه .. ودى ميزة وقوة التكيفات اليابانى
5- القعدة ورا على الكنبة مع المطبات الناشفة .. متحسش بهبد ورا ولا اى وجع خالص
درجة التقييم فى النهاية
* التقفيل 9/10
* العفشة 9/10
* الثبات 9/10
* الماتور والسحب 7.5/10
* الفتيس استجاته للنقلات 9/10
ملحوظة :
* التقييم بيختلف من كل شخص الى اخر حسب وجهة نظره ومعتقداته
* تقيمى للسيارة لمسافة حوالى 5 او 6 كيلو رايح جى
ومنتظرين باقى تقيمات الصقور هنا فى الموضوع .. ونتائج الاحتبار
تحياتى
المفضلات