تختار أي تخصص في كلية الهندسة ؟

**mars3v** · 08-05-2008 09:36 PM

مفيش غير ميكانيكا او ميكاترونيكس...بلاش مدنى و عماره و اجهزه طبيه

**thegoodhacker** · 08-05-2008 10:32 PM

انا مهندس اتصالات من جامعة اسكندرية
بالنسبة لافضل قسم فكل الاقسام جيدة بس كل قسم ممكن بيحتاج ميول واهتمامات معينة ودي نبذة عن اهم وافضل الاقسام :

1-قسم اتصالات : قسم ممتاز و مستقبله كويس لان مهندس الاتصالات ممكن يشتغل في كتير من المجالات - مجال الاتصالات و مجال الاليكترونيات و ممكن الهندسة الطبية و ممكن يشتغل في التحكم الالي و ممكن يشتغل في مجال الكهربا الباوركمان ........ بس المشكلة ان القسم ده بيبقي فيه حفظ كتير جدا لكثير من البراهين والاثباتات و بيعتمد علي مواد الفيزياء والرياضيات بكافة انواعها

2- قسم الكهرباء الباور : قسم ممتاز برضه بس مفيهوش مجالات كتير بيبقي مهندس صيانة الات كهربية او مهندس وقاية للجهد العالي والمتوسط والمنخفض
والقسم ده من رايي اسهل في دراسته عن قسم الاتصالات لانه مفيهوش حفظ كتير بس بيحتاج فهم كويس اوي

3- قسم الحاسب الالي : قسم كويس بس المشكلة انه بيواجه منافسة شرسة من باقي خريجي الجامعات علشان بقي فيه خريجين كتير بيدرسوا كورسات البرمجة و الشبكات خصوصا عن طريق منح وزارة الاتصالات

3- قسم الهندسة المعمارية : قسم ممتاز و مطلوب جدا في دول الخليج بس مشكلته لازم يحتاج تخيل و ميول فنية من ناحية التصميمات المعمارية الخارجية و الداخلية و بيحتاج براعة في الرسم اليدوي وباستخدام الكمبيوتر

4- هندسة الميكانيكا باور : وهو قسم ممتاز يتعلق بكل ما يخص الماكينات بكافة اشكالها و محركات الاحتراق الداخلي و الاوناش و الكثير

5- الهندسة المدنية : قسم ممتاز بس يعيبه كثرة عدد الطلبة فيه - ولازم يكون الشخص لديه ميول ناحية البناء و المعمار و اعمال المقاولات

**engamrnour80** · 08-05-2008 10:34 PM

السلام عليكم
اولا احب اقولك ربنا يوف اخو حضرتك
بعد كده الاقسام اللى حضرتك كاتبها
عمارة سهل و يمشىمع واحد عنده ميول رسم شوية
فرص العمل الى حدما كويسة
كهربا اقسام كتير بس احسنهم اتصالات و باور بس عاوز دمااغ و شغل كتيير على المكاتب و فرص العمل داخ مصر و خارجها كويسة جدا
ميكانيكا لو هو حابب هندسة بجد انا انصحة بالقسم ده هو صعب كتير فى الدراسة بس هيشبع ميوله الهندسية جدا
فرص العمل داخل مصر قليلة خارج مصر كتيييير
مدنى و ده تخصصى سهل جدا فى الدراسة و فرص عملة كتييير داخل و خارج مصر

و اى خدمة انا تحت امرك

**Islam_galal** · 08-05-2008 11:27 PM

انا مهندس ميكانيكا قوي - اسكندرية
لو مش فارقة معاه أو مش حابب حاجة معينة و حتي لو حابب
كهرباء و يا حبذا حاسب آلي
ده اللي ليه شغل بقوة حاليا في مصر و بره مصر
يا فرحتي لو دخل قسم عاجبه و بعدين يشحت
و ممكن يحدد القسم علي حسب تخصصات الأقارب اللي يقدره يشغلوه براتب كويس
الشغل حاجة و الهواية حاجة تانيه

**mo7amed_omara** · 08-05-2008 11:37 PM

ربنا يطمنك يا مهندس اسلام اصل انا مهندس ميكانيكا قوى حتخرج السنة دى اشاء الله
تبقى شغلنى معاك بقى متنساش اخووووك :)

**mo7amed_omara** · 08-05-2008 11:38 PM

على فكرة انا فى جامعة اسكندرية

**yahyanaabil** · 09-05-2008 12:32 AM

المشاركة الأصلية كتبت بواسطة ams

انا فى تانيه ميكانيكا عين شمس
أولا : ربنا يعديه من اعدادى على خير
ثانيا : هكلمك على الاقسام من ناحية الدراسة و بترتيب تنسيقهم
كهرباء عاوزه واحد بيعرف او بيحب يذاكر كتير و خياله يبقى عالى
عماره عاوزه واحد فنان و مبدع "المفروض ده يبقى قسم فى فنون جميله" و بيشتغلو كتييييييييييير اوى
ميكانيكا عاوزه واحد بيفهم و يحب يشتغل بايده ودايما فى حاجه لازم تتسلم
مدنى قسم فى اللذيذ اسهل قسم و ده مش معناه انه سهل

يا راجل ! انت بتتكلم جد !
ده عكسنا تماما اتصالات عاوزه واحد جامد جدا جدا

اتصالات قسم ممتاز جدا بس عايز واحد يكون بيعرف يحفظ كويس اوى وقسم اتصالات عندنا فى اسكندريه ناس كتير بتعرف تجيب فيه تقديرات لأنه يعتمد على الحفظ والدكاتره بتوع القسم ايديهم فرطه فى الدرجات عشان كده يعتبر اسهل من الباور
على فكره مدنى مش سهل بس برضه مش صعب لانه بالنسبه لقسم كهربا يعتبر سهل الى حد ما

**maka** · 09-05-2008 12:49 AM

المشاركة الأصلية كتبت بواسطة Dr_Smart

أخويا في اعدادي هندسة عين شمس

مالوش ميول محددة ( زي معظم الطلبة )

هو الحقيقة محتار يختار اي تخصص ... قلت ناخد رأيكم لأن في في نايل موتورز مهندسين وناس محترمة ومثقفة

اتمنى كل اللي عنده وجهة نظر في الموضوع ده مايبخلش علينا بيها وخاصة المهندسين يعني اكيد كل واحد بعد ماخرج لسوق العمل

عرف مميزات وعيوب معظم التخصصات سواء من تجربته او تجربة زمايله .

طبعا هنحط في الاعتبار لكل تخصص ( سهولة دراسته - مجال العمل متاح وبراتب كويس - الجيش - العمل خارج مصر - الخ )

وشكرا جزيلا لكل من سينفعنا برأيه .

السلام عليكم

انا فى هندسة القاهرة 3 باور

بص كل واحد هيقولك الراى اللى على هواه مش ده المهم المهم اخوك يحدد عاوز ايه

عاوز سهولة دراسة يبقى كيمياء وعمارة وبترول وفلزات وكده اضمنك انه هيريح دماغه

عاوز شغل كويس وفلوس يبقى ميكانيكا وباور ومدنى بس اضمنك انه مش هيريح دماغه

هيتبهدل صح فى الخمس سنين

العمل خارج مصر ده نصيب بس الطلب على ميكانيكا وباور وعمارة ومدنى

الجيش بيطلب معظم التخصصات ماعدا طبية وفلزات وطيران

عاوز واجهة واسم يبقى اتصالات وحاسبات بس الشغل مش كتيير وهيتعب على مايلقى

مش عاوز يشتغل خالص يبقى طيران:D:D

اهم حاجة لو هيخش ميكانيكا يكون كويس فى الرسم الهندسى ولو هيخش كهرباء يبقى

كويس فى الفيزياء والرياضة وياريت يخش الحاجة اللى ميال ليها لان الشغل ده بتاع ربنا

زى سامح فهمى خريج قسم كيمياء مش بترول وياريت يبعد تماما عن طبية وطيران

انا عارف انا هو متوتر اصل انا مرات بكل ده :D فى الاول خالص كانت فى كلية حاسبات

ومعلومات القاهرة معجبتنيش قاعدت اسبوع ورحت حولت هندسة بعد محولت اكتشفت ان

مواد الكمبيوتر بتاعت قسم حاسبات مش طيقها وحمدت ربنا كتيير ان انا حولت بعد كده

نجحت اعدادى وكانت فرحا بالمجموع فاخترت اتصالات ملقيتش نفسى فيها قعدت اسال

لحد مربنا هدانى دكتور طيب قالى عاوز تبقى مهندس صح عليك بباور او ميكانيكا هتفتح

دماغك وشاغلهم كتيير وبرده فضلت محتار بينهم لحد ما حولت باور :)

اهم حاجة هو ميال لمواد ايه وميبصش ابدا للمجموع ( ميكانيكا اقل مجموع ومع ذلك شغله نار)

ولو عاوز اى حاجة انا فى الخدمة ;)

**Ahmad Allawy** · 09-05-2008 01:52 AM

هاقول لسعاتك حاجة ودي خلاصة الدراسة في الكلية دي..
بس انا خريج القاهرة مش عين شمي..
لو اخوك عنده ميول تصميمية.. يعني خياله واسع في العمارة و المباني و الكلام ده..
يبي يدخل عمارة.. القسم ده محتاج موهبة قبل اي حاجة.. يعني مش بالمجهود الجامد بس و المذاكرة هتبقي طالب متميز.. لازم موهبة.. و تزبطها بالمجهود و الشغل الكتير..
لو هو حابب الرياضيات و الالكترونيات.. يبقي يدخل كهربا.. بتتفرع لباور و اتصالات و كومبيوتر..
طبعا البرمجة هيتدرب عليها في اول سنة.. لو لقي انه حاببها و دايس فيها يبقي يدخل كومبيوتر.. لو رياضيات بقي و كده يبقي اتصالات او باور..ولو ان باور رياضياتها اقل شوية..
لو هو حابب ميكانيكا اعدادي.. يبقي يتوكل علي الله و يدخل ميكانيكا.. صعبة شوية.. بس كويسة..
الطبية كويسة جدا طبعا.. بس فرص شغلها قليلة شوية..و في منهم كتير بيشتغلوا برمجة و شغل كومبيوتر..

اما بالنسبة للمرتبات فطبعا ده موضوع ارزاق.. و كله بايد ربنا.. بس السوق بيقول ان مرتبات الكهربا اتصالات و كومبيوتر.. و باور.. و بعدها ييجي عمارة و بعدين ميكانيكا
بس الحمد لله علي كل حال.. ان حال المهندسين في مصر احسن من غيرهم بكتييييييييييييير..
و الحمد لله في شغل.. يعني مش هتقعد ف البيت.. بس متحطش موضوع المرتب ده في دماغك لما تيجي تشتغل اول شغلانتين ولا حاجة.. خد خبرتك و بعدين ابقي اطلب مرتب..
وربنا يوفق و يكرم ان شاء الله..

**karmouty918** · 09-05-2008 02:20 AM

السلام عليكم
انا فى تانية مدنى (هندسة عين شمس) و اول حاجة احب اقول لحضرتك ان التخصص بيبقى على حسب المجموع وترتيب الاقسام كالاتى:
1-هندسة كهربية..(فى اول الجيد) و دة اعلى قسم من حيث التقدير
2-هندسة معمارية..(مقبول مرتفع)
3-هندسة ميكانيكية..(مقبول)
4-هندسة مدنية....(مقبول)
و اعذرنى لو مكنتش فاكر التقديرات بالارقام
اولا هو لازم يدخل قسم هو بيحبه و يكون مقتنع به مش بقول انو يكون بيعشقو بس على الاقل يكون شايف نفسة فيه.
لان بصراحة كلية الهندسة من اصعب الكليات فلو دخل حاجة هو مش حاببها هايمشى فيها بصعوبة و هايبقى قرفان طول مدة دراسته بالكلية .
(على فكرة الحيرة الى هو فيها دى عاديية جدا طبعا هو دلوقتى بيملى استمارة الرغبات و بنسبة 98% هايكتب كالاتى:
1-كهربا
2-ميكانيكا
3-عمارة
4-مدنى
انا مش عايز ابالغ و اقولك ان انا كل دفعتى كانت كاتبه الترتيب دة بما فيهم انا((كلنا كتبنا كهربا اول حاجة)
دة طبعا لان (هندسة الاتصالات -حاسبات) بقى ليها سوق عمل كبير جدا فى مصر مش زى زمان و مرتباتهم ممتازة
يعنى باختصار 98% من دفعة اعدادى بتفكر فى كهربا بس و بتكتب باقى ترتيب الاقسام اى حاجة كدة ودة بيكون بسبب انو مش قادر يفكر هو ممكن ينفع فى ايه غير كهربا نتيجة كثرة الامتحانات فى الفترة دى (شفوى و عملى و final حاجة تقرف)...
الى حصل معايا انى كنت كاتب نفس الترتيب الى فوق دة و بعدين جبت مجموع يدخلنى اى قسم ماعدا كهربا فبلتالى انا كدة هادخل ميكانيكا
و بعدين و انا فى اجازة الصيف قعدت افكر و لقيت نفسى كارة ميكانيكا جدااااااااا (((و غالبا هى دى الفترة الى اخو حضرتك هايفكر كويس هو عايز ايه))) .و بعد كدة لقيت نفسى حابب الانشاءات و التصميم جدا فقررت انى ادخل مدنى

يعنى الى عايز اقولة لحضرتك ان القرار اللى هايخدو اخوك دلوقتى مش هايكون القرار النهائى لان لسة فى فرصة انه يغير القسم ى العام الدراسى الجديد و اهم حاجه دلوقتى انه يركز فى مذاكرتة على شان يجيب مجموع يدخل بيه القسم الى هو عايزه.
و دى شوية معلومات عن الاقسام:
1-مدنى :مش سهل بس يعتبر اسهل قسم فى الكلية المشؤومة دى .سوق سوق العمل ملياااان فرص لمدنى و دول الخليج جعاااانة مهندسين مدنى
بالنسبة للمرتبات على حسب المهندس دة قدراتة اية (يعنى مثلا كان مرة دكتور بيتكلم معانه قال انا عندى فالمكتب مهندس بياخد 1000 جنية و مهندس تانى بياخد 3000 جنية )
2-كهربا :حلم شباب هندسة عين شمس و من احسن الاقسام فالكلية و شغلها موجود و مرتبات زى الفل
3-عمارة :بصراحة محدش بينفع فى القسم دة غير واحد عنده موهبه جمالية و تكون ايدة حلوة فى الرسم
4-ميكانيكا:بكرهاااا بس على العموم برضة قسم كويس و مرتبات كويسة

و فى النهاية مهما كان القسم اللى هايدخله قدراته كمهندس هى اللى هاتحدد هو هايشتغل ايه و بكام لما يتخرج و اتمنى لاخو حضرتك التوفيق.

مشاهدة نتائج الإستطلاع: ما التخصص الذي تفضله في كلية الهندسة ؟

الموضوع: تختار أي تخصص في كلية الهندسة ؟

LinkBack

أدوات الموضوع

عرض

-

-

-

-

-

المواضيع المتشابهه

لو تختار شاشة 37lcd بوصة، تختار إيه في دول؟

سؤال بخصوص كلية الهندسة

بخصوص الهندسة الخاصة

مساعدة فى الهندسة

الكلمات الدلالية لهذا الموضوع

المفضلات

المفضلات

ضوابط المشاركة