الحمد لله انا كنت زيك كده انا واصدقائي وعملنا مشروع مغسله عربيات الحمد لله

طبعا انت لو معاك شركاء (لازم تبقوا ايد وحده هتبقى فيه مشاكل لاختلاف التوجهات لكن النهايه المصلحه وحده)

لازم ولازم ولازم يبقى عندك خبره في المجال الي هتفتح فيه لان الصنايعي بياع كلام واهبل بيقول اي حاجه في اي حته اي صنايعي عنده حته ان هو فتك وجامد اخر 30 40 حاجه وفاكر انه لو قالك ان حاجه هتصدقها

وطبعا في نصايح اتقالتلك ممتازه جدا جدا جدا مقدرش ازيك عليها اي حاجه

لو ملقتش مكان كويس متفتحش احسن عشان متخسرش المكان الي بيبقى فيه سوق مفيش مشكله افتح فيه

شارع فيه محلين قطع غيار شوفلك مكان حلو فيه واتكل على الله كده بقى الشارع ده سوق قطع الغيار

منطقه مفيهاش مغاسل عربيات كتير افتح هناك

تصدق وانا بفتح مغسله عربيات بتاعتنا وانا بشطب المحل في يوم من الايام ببص بعدي ب 5 عمارات لقيت مغسله عربيات فاتحه مفكرتش تفكير لا هياخد شغل مني ولا الكلام هوه على كده حلو ويبقى الشارع ده بتاع الغسيل وبس وفعلا هو ده الي حصل انا وهو شغالين الحمد لله

وانت لما ترسى انت عايز تفتح ايه ومنصحكش ب قطع الغيار دلوقتي (لانه موال كبير والمحلات ليها زباين صعب انه هما يسيبوها بالذات في قطع الغيار)

انما المغسله سهل انك تجيب زبون وسهل انك تتعلم الصنعه انا كنت بغسل بايدي وانا خريج اعلام والزباين بتبقى مبسوطه اوي لانه شايف حد محترم وفاهم الي بيعمله شغله انما الصنايعيه اوعى اوعى اوعى تسلم نفسك لصنايعي الصنايعي يبص ل جنيه يسرقه من عربيه وميبصش ان الزبون هيديليه 5 جنيه تبس شويه عالم اجارك الله

في نصيحه حد قالهالي قالي انت لازم لما تفتح اي مشروع تفتحه زي الناس عشان الناس تخاف منك تبقى ليك رهبه مثلا فتحت مكتبه متفتحش مكتبه تحت السلم وديكورات اي كلام لا كلف ديكورات ويافطه عدله وبروشورز وكروت خلي ليك صيت انك نضيف وعالي عشان الناس تخاف منك وفي نفس الوقت يبقى في فطول واطمئنان
ولو تلاحظ معظم محلات قطع الغيار الي شغاله الله ينور كلهم كبار ليهم سيطهم وفعلا بتروحله عشان تكبر دماغك من اللف عارف ان لو حاجه مش موجوده عنده مش هتلاقيها في السوق كله واخيرا الرزق ياتي من عند الله

ابن الشيخ محمد حسان كان بيغسل عربيته عندي اتكلم معايا شويه قالي من اسباب الرزق انك تقف على شغلك اوعى تتوقع انك في يوم من الايام ممكن تجيب مدير للمحل وتانتخ انت في البيت وتقفشلك اخر الشهر 10 او 15 الف جنيه عمرك ما تفكر بالطريقه دي خاااااالص

كلام ليك برضو بالنسبه لقطع الغيار المستوردين ماليين السوق ف تلف عليهم وتعرف فروق الاسعار وكميات البضاعه وبالنسبه للتوكيلات هيونداي مثلا عشان تاخد منه قطع الغيار بخصم محترم لازم تاخد بضاعه ما لاتقل عن 80 الف جنيه الفانوس في السوق ب 1000 مثلا بيجيلك ب 800 والفرق ده بتاعك تبيع باللي انت عايزه
وفي حاله انك بتجيب بضاعه فوق 80 الف جنيه في خصومات مميزه متغيره ودي اللي ماشيين بيها التجار مع توكيل هيونداي بدل ما الفانوس ب 800 ممكن يقع ب 400 ومره تانيه ب 500 ومره ب 300 عشان كده ممكن تلاقي قطعه غيار اصليه جينين بارت وتلاقيها عند محل ب 500 وهي في التوكيل ب 1000

وفي حاله لازم تبقى فاهمه وانت بتفتح لازم تبقى عندك فرشه محل يعني كل قطع غيار اي عربيه تبقى موجوده عندك بس طبعا تنقى الحاجات الي ماشيه في السوق متروحش تجيب فتيس جديد عشان انت بتفتح محل لا مهو مستحيل حد يشتريه منك اساسا
لاي شركه في العالم في نوعين قطع غيار اصلي جينين بارتز اللي عليها الضمان ونوع تاني بيبقى طالع من مصنع تاني النوع ده بيبقى ارخص بكتيييييير وبرضو اصلي على سبيل المثال هيونداي ليها مصنع الجينين بارتز وده الموزع بتاعه التوكيل طبعا في بلدك وفي حاجه تانيه اسمها هيونداي موبيس دي بتبقى ارخص بنسبه 30% على الاقل وممكن اقل من كده وبتبقى برضو اصلي لازم تبقى دي متوفره عندك بكتره لانها رخيصه وبياعه واصلي برضو يعني فتلر فتيس اوتوماتك مثلا ب 150 الجينين بارتز وب 70 جنيه الموبيس
سوق قطع الغيار واسع جدا جدا جدا وحلو وانا في دماغي المشروع ده بس فعلا محتاج مكان يكون سوق قطع غيار دور في السابع في مدينه نصر لو لقيت افتح هناك لانه هناك سوق كويس وشويه ورش مع بعض فاتحين

لما تيجي تفتح سواء المغسله او محل قطع الغيار ياريت تكلمني بس يكون في جديه هروح اوديك لناس شغاله في توكيل هيونداي وفي نفس الوقت شغاله في القطع اللي مش اصليه وليها علاقات بتجار وهزبطك بس الناس دي وقتها بفلوس ومش هتجيب معاك اسعار من الاخر الا لو انت بتنفذ خلاص وبالنسبه لمغسله العربيات هزبطك في شويه حاجات برضو باذن الله واوعى تجيب اي جهاز صيني سواء المكنسه او الكمبريسور الحاجات دي كلها فشنك تدفع فيها 2000 جنيه تلاقي باز تاني يوم بالضبط