مياه الرادياتير بتنقص ... حد يعرف واحد كويس يحللى الموضوع ده ..!!!!

**Yarisawy** · 09-05-2008 03:30 AM

السلام عليكم ,

انا مياه الرادياتير بتنقص عندى كل شوية ... يعنى كل اسبوع تقريبا لازم احط يجى نص لتر مياه

روحت لكذا بنزينة واللى فالحين فيه بينضفوا الدورة ويقعد يبص مايلاقيش اى تسريب بعدها يقولى عادى لازم المياه تقل كل شوية .

جربت كمان احط بتاع بودرة كده بيسد اى خرم بس برضه مفيش جديد

انا عايز احط مياه خضراء بس حرام اجيبها وتخلص فى شهر

ياجماعه حد يعرف حد متخصص وكويس لعلاج المشكلة فى دورة التبريد عندى

انا عربيتى اوبل كورسا موديل 99 اللى 1000 سى سى

وياسلام لو الراجل قريب من المعادى يبقى 100%

**peranha** · 09-05-2008 04:05 AM

انا مش عارف نوع نظام التبريد عندك ايه لكن اذا كان نظام مغلق ومتأكد ان مفيش تسريب من المواسيروان غطا القربه كويس امامك كذا احتمال
1- اكشف علي طبت الموتور وحصلت معايا ساعات بتصدي وتسرب الميه ولانها في جسم الموتور فالمياه بتتبخر في الحال وميظهرش اثر ليها.
2- طبه من الطبات الداخليه مصديه
3- جوان وش السلندر محتاج يتغير
والاحتمال 2 & 3 محتاجين تفك وش السلندر
وهذه الاحتمالات تنطبق علي النظام المفتوح ايضا اذا كنت متأكد ان غطا الرادياتير سليم
واكشف علي مواسير السخن بتاعة التكييف

**mhDeeb** · 10-05-2008 07:24 AM

فعلا الاحتمالات دى سليمة ربنا يباركلك ، والطبات اللى في الموتور دائما بتصدى وتسرب مياة واحتمال جوان وش السلندر - تقدر تعرفه لو حسيت ان سحب العربية قل شوية يبقى جوان . ودور على ميكانيكى كويس وفاهم وعنده ضمير .

**islamafifi** · 10-05-2008 10:11 AM

أنا كانت عندي تقريبا نفس المشكلة و رحت لواحد فى بنزينة موبيل اللى فى شارع الطيران فى رابعة اللى فيها توكيل أوبل , المهم قالى السبب هوه السخن بتاع التكييف و بعد ما لاغاه الميه مش بتنقص, أنا معايا جولييت 99

**Yarisawy** · 10-05-2008 10:21 AM

الاخ Perarnha انت جبت من الاخر ... انا مش عارف انا كمان النظام عندى ايه .. اعرف ازاى هو مقفول ولا مفتوح :)

فعلا طبه الموتور وجوان وش السلندر وبليه وكذا حاجة عايزين يتغيروا بس انا مستنى سيولة

بس بصراحة مكنتش فاكر انهم هايأثروا على نفس المياه

بس ياترى ده ليه تأثير على الموتور ولا حاجة ... احسن ناس بتقولى اوعى المياه تدخل الموتور وساعتها الموتور يبوظ

شكرا mhDeeb فعلا العربية مش بتسحب اوى وكمان عن الموتور الحته مزيته داير مايدور بس الزيت مش بينقص ... انا معرفش غير التوكيل

اخى islamafif انا اصلا شايل السخن وعند اوبل اللى فى الطيران برضه ... وده من سنتين تقريبا .

شكرا يا رجاله

**hamode89** · 10-05-2008 03:26 PM

هوا تسريب الميه ليه اسباب كتير ابتداءا من اني الغطا مش متثبت كويس الى وش سلندر
بس هل بتسرب لما تطفي العربيه ولا وانتا ماشي
بص جرب تمليها ميه على الاخر ولف بيها لفه بس متكنش مشغل التكييف واركنها في مكان يكون الاسفلت ناشف اطفيها واستنا 5 دقيقه وحركها لو لقيت ميه يبقا احتمال تكون طمبورة الميه اما لو بتقط وهيا شغاله ممكن يكون مواسير الرديتير مصديه

**Yarisawy** · 11-05-2008 11:33 AM

بجد شكرا على النصائح الجامدة دى ... انا هاجرب واقولك

**ADM** · 11-05-2008 02:43 PM

المشاركة الأصلية كتبت بواسطة islamafifi

أنا كانت عندي تقريبا نفس المشكلة و رحت لواحد فى بنزينة موبيل اللى فى شارع الطيران فى رابعة اللى فيها توكيل أوبل , المهم قالى السبب هوه السخن بتاع التكييف و بعد ما لاغاه الميه مش بتنقص, أنا معايا جولييت 99

وانا بأيد الكلام دة لانى كان عندى نفس المشكلة و روحت التوكيل قالولى بلف السخن بتاع التكيف عاوز يتغير و تمنة 350 ج
ممكن تلغى و تستغنى عن السخن فى الشاء و ممكن تغير - دة لو طلع الاحتمال دة صح

**mody504** · 12-05-2008 04:05 AM

طلمبة المياة........ ممكن تكون السبب لان كان عندى نفس المشكلة فى الكليو و طلع فعلا الطلمبة بتسرب

**peranha** · 13-05-2008 03:16 AM

يا اخوانا الاحتمالات اللي قلتها باعتبار انه كشف علي كل مصادر التسريب التقليديه مثل الخراطيم والرادياتير ومضخة المياه وكل المصادر اللي ممكن رؤية اثر للمياه المتسربه..
اما سؤال الأخ فركيكو عن اثر دخول المياه الي الموتور هي لا تؤثر علي المدي القصير وتقدر تعرف جوان وش السلندر انك تشوف مقياس الزيت ..اذا لقيت لون الزيت اصبح بلون الطحينه علي المقياس يبقي جوان ولازم تغيره
وفيه اخ سئل ازاي نعرف نظام الميه ..بسيطه النظام المغلق مالوش غطا رادياتير وتكملة المياه من القربه فقط .