والدي معاه الفكترا بقاله 6 سنين و لسة معانا لحد دلوقتي و ربنا يبارك فيها انا بكل صراحة هديك مميزاتها و عيوبها
المميزات : - كماليات: رائعة افضل من الافنسيس بالذات لو هاي لاين او توب لاين هتتبسط اوي منها
و لو مش عارفها اطلب مني اقلهالك بالتفصيل
الموتور و الفتيس : الموتور ما شاء الله سحبه جميل جدا بعد ال 2500 rpm بيبقى بطيئ في الطلعة الاولى لحد 40 بعد كدة لو كبست جامد هتخاف تكمل فعلا سحبه رائع و بالذات على السرعات العالية تجميع رهيب و كل ده من موتور 105 حصان بس لكن التورك بتاعه عالي حوالي 150 نيوتن و مع تقل العربية 1395 كج و كل ده بيرجع للفتيس لانه مانيوال مش اوتوماتك عادي لان فكرته ان فيه اتنين كنترول و احد لنقلات الفتيس و التاني للدبرياج و ده بيطلع عزم المانيوال و راحة الاوتوماتك و لو سقته مانيوال مود هيبقى احلى كمان و خلي بالك هيعجبك اوي لو سواقتك رياضية .
نيجي للعفشة و الثبات : العفشة الى حد ما ناشفة حبتين بس هتظبط معاك لو الكاوتش كويس و ضغطه تمام بس برضه مش بنعومية اليباني لكن لو طريقك كويس مش هتدايق خالص + العفشة نادرا لو حصل فيها حاجة معمرة فعلا بمعنى الكلمة يعني مفتكرش اننا ربطنا عفشة غير ثلاث اربع مرات و احنا ساكنين في المقطم يعني المطبات كلها عندنا و الحفر و كل حاجة تتخيلها و لو محمل عمرها ما خذلتني زي العربيات الكوري تحمل كام حاجة تلاقي العربية في الارض ( برضه الالماني الماني ) المساعدين عمرهم ما بينزلوا بسرعة .
نيجي بقه للثبات و ده احلى حاجة في العربية تاخد اي ملف مطمن واثق من نفسك ترمي العربية من اليمين للشمال و لا اي حاجة و غروزة فوق 160 و ال 180 الهوا رايح جاي الدنيا فل والدي بيمشي على 160 و لا تحس بأي سرعة كأنك على 100 ، و سهلة في وسط البلد يمكن الدركسيون مش بنعومة اليباني بس بيحسسك انك متحكم و الميزة ان العربية فيها طريقتين للباور من 0 الى 60 باور كهرباء بعد ال 60 بيقلب باور هيدروليكي و اخر الكلام هنا ان الجنط مقاس 16 عرض 215 و تقيل جدا لما تيجي تشيله و عريض .
الفرامل و الصاج و الامان :
الفرامل : ليس عليها غبار جميلة و زي الفل و تسعفك و فيها ABS و بسببه عمري ما سمعت صوت صرير العجلات + توزيع الفرامل اللي في الملفات ميخلكش خايف من الفرامل ابدا و خلي بالك ممكن تعشق العربية على غيار في الايزي ترونك زي المانيوال العادي .
الامان : العربية ما شاء الله وسائل امان كويسة جدا 4 airbags في الاليجانس و بتهيألي 8 او 6 في التوب لاين و تحت الاكسدام في زي حديدة ناشفة اوي لو قعدت تخبط عليها بشاكوش صعب تتني و كمان فيها برنامج الشتاء عشان لو في مطرة او حاجة العربية تمسك نفسها من دورات الموتور العالية اللي ممكن تعمل زحلقة + ال ESP او برنامج الاتزان الالكتروني في التوب لاين و التعتيم الذاتي للمرايا عشان ما تتعميش من النور العالي في المرايا سواء الداخلية او الجانبية .
الصاج و جودة التقفيل : الصاج الالماني غني عن التعريف ، خلص الكلام .
جودة التقفيل الصراحة حاجة زي اللفل التابلوه فخم و معمول من الجلد تدوس عليه تلاقيه طري الكراسي الجلد في التوب لاين شياكة جدا و على الابواب كمان و القعدة صحية و مريحة تحس الكرسي لمك حتى لو واحد بدين جدا قعد عليه مرتاح و لا يقارن بالكوري و اليباني الصراحة .
التكيف : التكيف روعة و اخر حلاوة بس عايز اهتمام يعني مش تسيب الفلتر و الحاجة مسدوده الدنيا هتبوظ لكن ما شاء الله توزيع التكيف جميل و في من ورا كمان و الصراحة جربت بتاع التويوتا كرولا 2008 تعبان بالنسبة للفكترا مع ان اليباني احسن بس ده ميمنعش ان تكيف الاوبل برضه جامد و في في الهاي لاين و التوب لاين توزيع التكيف في الجانبين و التحكم في درجة الحرارة لكل جانب و من خلال شاشة كمبيوتر السيارة .
التصميم و الابعاد : انا شايف ان شكلها جميل جدا و كلاسيكي و رياضي في نفس الوقت ( و دي اذواق طبعا ) و لما تشفها في الشارع او على الطريق تحس انها عريضة و ليها هيبة بين اللي جنبها بس مشكلتها انها عريضة شوية و ده ممكن يمثل صعوبة للمتعود على العربيات الصغيرة شوية .
طبعا مفيش حاجة كاملة و كل حاجة ليها عيوبها و الكمال لله وحده و دي عيوب العربية من خلال تجربتنا ليها بعد 6 سنين :
1- تلعطها تقيلة لحد 35 40 كده
2- الفتيس في نتشة رخمة شوية من الاول للتاني او العكس بالذات لو انت دايس بنزين براحة و على مطلع .
3- طبعا منصور سمعته سبقاه و بصراحة التوكيل حرامي في حجات كتير بس ميزتهم بيعرفو يظبطو الحاجة و يعرفو العطل بسرعة و التقفيل الشغل بتاعهم الى حد ما كويس .
4- قطع غيارها غالية شوية زي بقية الاوروبي بس معمرة جدا و ممكن تلاقيها بسهولة اكثر من الافنسيس اللي صعب جدا تلاقي حاجتها بسبب قلة انتشارها بس بعض قطع غيار الاوبل مبالغ فيها شوية زي الفوانيس فممكن تشوف الحجات دي استيراد او تايواني لانها مش حاجة اساسية لازم تبقى اصلي في العربية .
5- مش كل المكاناكية يقدرو يشتغلو فيها و يفضل حد فاهم في الاوبل لان العربية معتمدة على كمبيوترات و حساسات فبلاش اي حد يفتي فيها لأنها مهياش زي الفيرنا دي حاجة و دي حاجة تانية خالص بس صنايعيتها منتشرين مفيش قلق و ممكن تسأل الزملا في قسم اوبل .
6- العربية عريضة شوية و مهياش بسهولة الكوري و اليباني بس هتتعود عليها
7- النقطة العمياء من ناحية المرايا زيادة شوية يعني ممكن عربية جاية من اقصى الجانب فماتشفهاش و كذلك الرؤية الخلفية حاجة بسيطة صعبة شوية بس هتتعود عليها مع الوقت .
الكماليات في كل فئة
اليجانس و دي اللي معانا :
فتيس ايزي ترونك
4 ايرباج
حساس مطر / تكيف اوتوماتك / حساس ضوء في المرايا و تعتيم
برنامج الشتاء و المطر
مرايا كهرباء و ضم كهربائي
زجاج كهرباء في كل الابواب + قفل بلمسة واحدة + قفل مرايا و زجاج من خلال المفتاح
شاشة صغيرة الوقت و التاريخ و الحرارة + راديو cd30 اوديو
و يمكن تركيب مثبت سرعة و الراديو الشاشة اللي في الهاي لاين
الهاي لاين
كل الكماليات + تكيف موزع على الجانبين كل جانب متحكم في الحرارة
شاشة جرافيك متكاملة المعلومات عن حالة السيارة و الكيلومترات المتبقية من الوقود + راديو cd30 mp3 + AUX
فرش جلد
مثبت سرعة اساسي
توب لاين
6 او 8 ايرباج
فوانيس زينون متحركة مع الدركسيون + وحدة غسيل و سخان للفوانيس
برنامج الثبات الالكتروني ESP
فتحة سقف
كراسي كهربائية و سخان في الكراسي .
و انشاء الله اكون افدك و استخير ربنا بس صدقني ابعد عن الافنسيس لانها مش منشرة زي الفكترا و الفكترا اشهر و مش هتتعبك ولو مش عايز الفكترا شوف سكودا او سيفك بس اهم حاجة الحالة ثم الحالة اكشف على العربية من الالف للياء حتى لو في عيب في اصغر زرار و اكشف عليها في توكيل الهرم او مقار و اهم حاجة جرب العربية و في الاول و في الاخر دي راحة نفسية لان ده مبلغ مش قليل اللي هتشتري بيه العربية و بالتوفيق إن شاء الله و كل عام وانتم بخير .
المفضلات