المشاركة الأصلية كتبت بواسطة saidbakr
بالنسبة لموضوع الطاسات، زي ما قولت قبل كدة - في المشاركات اللي فاتت في الموضوع ده- إن دي فزلكة مننا احنا يا مصريين، وبنعملها علشان تعطل الحرامي شوية اللي عاوز يخطف الطاسات - حاكم اﻷصل الحرامية بتوعنا في مصر آدائهم ضعيف وكسلاتية حبتين، ﻷن حرامية برة بياخدوا الفردة على بعضيها، المهم موش ده موضوعنا- وموضوع إن الطاسة تقع وتطير في سرعات كبيرة ده ما بيبقاش له إلا معنى من تلاتة، 1 اما الطاسة موش متركبة كويس. 2- حواف الجنط عندك فيها مشكلة تمنع الطاسة من انها تركب كويس 3 - إن الطاسة فيها عيب صناعة.
حيث إن العربية جديدة وما فيش اي احتمال من الاتنين اللي في اﻷول، يبقى ما فيش غير انها معيبة.
اما بالنسبة ﻷخونا العزيز بشوي، فزي ما قولت برضه من قبل، عندنا الفاتورة اللي مكتوب فيها ring gasket وعندنا جوجل واي مهندس بيعرف مصطلاحات بالانجليزي، وهو هيقول إن البند اللي في الفاتورة بالاسم ده مالوش غير معنى واحد وهو أويل سيل. ولو هم في التوكيل كتبوه بالشكل ده وقالوا حاجة تانية، نبقى احنا في الحالة دي متفقين على إنهم بيعكوا وبحر العك واسع.
النقطة التالتة واللي مالهاش دعوة بالموضوع: ابارك لك يا عزيزي بشوي على اللوجان الجديدة اللي معاك، ﻷني كنت من حوالي سنتين بتابع معاك مشاركات عن بروتون وايتهيألي ساعتها إن عندك بروتون او كنت بتخطط تجيبها. موش عارف المعلومة دي صح ولا غلط.